Est 4 - Mam Ostuncalco Bible

Tzaj kyb'is aj Juda tu'nju' chaq'b'il

1Tetzunj tb'inte Mardokyey tkyaqilu' matxi'toq b'aj, kub' tlaqu'n ti'j te yek'b'il k'ixk'oj, eb'jo'ktq'o'n ti'j te b'is, jaxtq'o'n tza'j toj twi' ex oktentzuntz ojqelal toju' nintnam, intoq ẍch'in njaw toj twi' b'isb'ajilx.

2Iktzun pona'ju' tzmax ttziju' tja nimaqkawb'il, mixtoqti' tu'n tokx jun xjal tok ti'j ikyju'.

3Ex ikx b'ajiju' kyojile junjun tnej tx'otx' jatoq npona' sma'nju' chaq'b'il exu' tkawb'il nimaqkawil, nim oq'el b'aj kyxolju' aj Juda, ex kyek'uju' b'is tu'n mewayi'n ex oq'e'n qu'n majx exch'yon toj kyk'u'j, ex b'a'npun eb'aj kub'kẍe tib'aj tza'j ex b'jo'k kyq'o'n kyi'j te b'is.

Yolin Ster.

4Aye'tzu'n txin ntoq che ajb'en te Ster t-xu'jil nimaqkawil exqe' xq'uqil teku', xikyma'nju' intoq b'aji te. Tzajtzun tb'isju' t-xu'jil nimaqkawil tu'n tpaj ex xit-sma'n ti'j Mardokyey tu'n tel tiq'i'nju' ti'j te b'is, atzunte Mardokyey mixti'x tk'am.

5Tzajtzun Ster ttxoku' Atak, ju' kynejel xq'uqil ti'j tja nimaqkawil, ex xitchq'o'n ka'yilte Mardokyey tu'n txi' tqani'n te titi'toqu' nb'aj ex tiqu'n ntb'incha'n tkyaqil ja'lu.

6Xi'tzu'n Atak yolil tuk'i'l Mardokyey, ju' atitoq janche tena' nim xjal toju' nintnam, ttzi tja nimaqkawb'il,

7oktzun ten Mardokyey tx'olb'alteju' intoq b'aji, ex jni'ju' saqpwaq matxi'toq txi ttziya'n Aman tu'n tkub' tq'o'n toju' tk'uwen nimaqkawb'il naqx tu'n kykub' b'yo'n aj Juda.

8Ex xitq'o'n jun u'j tilb'ilalju' chaq'b'il etz toju' nintnam Susa tu'n kyb'ajkub' b'yo'n aj Juda najlqe' kyoj kykyaqilju' tnej tx'otx', tu'n txitq'o'n Atak te Ster tu'n tb'inte tkyaqilju' nb'aji. Ex xitoqxena'n te Ster tu'n tyolinku' tuk'i'l nimaqkawil ex tu'n t-xitkub'sa'n te tu'n tkolon ti'ju' ttanam.

9Tej tanjtzti'j Atak, b'ajx tma'nju' b'aj tzaj tma'n Mardokyey te, te Ster.

10Etztzun tchq'o'n Ster jumajtlju' Atak q'malteju' tzaq'web'l te Mardokyey ikjalu:

11Kykyaqilju' ajb'el te nimaqkawil, exqe' xjal najlqe' kyoju' tnej tx'ot'x tjaq'u' tkawb'il, b'i'n kyu'n qa ati jun kawb'il ja ntma'na' tu'n kykub' b'yet kykyaqilju' ichan mujqa qya qama che okx tojxi' tpe'nju' ja te kawb'il ka'yilteju' nimaqkawil exqa mya txko'n tu'n, naq o'kx qamatzaj tnuqpi'n nimaqkawil tb'ar q'anpwaq ti'ju' xjal lu te techlal qa maq'aq'an tk'u'jlalil, laytzun kub' b'yo'ntz. Tu'ntzun tpaju' ayin june' toju' lu ja'lo, matxi' b'aj junaq lajoj q'ij min nchin txknojtze' tu'n nimaqkawil, chi Ster.

12Tetzunj tk'monte Mardokyey ttzaq'web'lu' Ster te Atak,

13xit-sma'ntlju' yol lu te: Lalun tz'okqe tk'u'ja, qa o'kxa aj Juda kyjel anq'ina tu'nju' tokxa toj tja nimaqkawb'il.

14Qa min sel ttziya ja'lo, tzulte' kolb'ilkye aj Juda toj jun plajtel, atzunta kkyimela kyuk'i'lxi' toj tja tmana. ¡Yajtzunqa a xpona'ju'ya te t-xu'jilu' nimaqkawil tu'n tonina qi'j toju' myab'a'n xi' ttzaj lu!, chi Mardokyey.

15Tzajtzun t-sma'n Ster tzaq'web'l lu te Mardokyey:

16Kutxi'ya ex b'uyinqe'ju'ya aj Juda najlqe' Susa, tu'n kymewayin ex tu'n kyna'n Dyos wi'je'. Lalun che wan ex che k'wan oxe' q'ij ex oxe' qonik'an. Ex ikx qb'incha'qe' tzalu kyuk'i'lju' txin nche ajb'en weye', tb'ajlenxi'tzun ja'lu, chin xe'le' tk'etzu' nimaqkawil, b'a'ntzun qa mya' toj tu'me'l twitz kawb'il. Qatzun machin kub'b'yo'ne', chin kub'xtzun b'yo'ntze', chi Ster.

17Xi'tzun Mardokyey ex tb'incha tkyaqilju' b'ajx tma'n Ster te.