Cnt 8 - Mam Ostuncalco Bible

1¡Naqwit ikyj nxib'ena,

awttzu' xch'u'na'ya kyi'j timi'ẍ ntxuye'!

Ajwittzunlo tokyala wu'ne' toj b'e,

jaku' tz'ok nma'tzina ex mix-a'lo' tu'n t-xmayin wi'je';

2jaku'wtlo txiwiq'i'na tja ntxuye',

jaku'wtlo tz'okx wiq'i'na tuja,

tu'n toka xnaq'tzalweye'.

Jaku'wtlo txinq'o'n tk'wa'ya tb'anil b'in

ex ta'l lob'j kranad.

3¡Q'onku' tnayaj tq'ob'a tjaq' nwi'ye',

chin tchleku'tzunta tu'n tb'a'nq'ob'a! chi xu'jilb'aj.

Tyol chmilb'aj

4Kytziyantze', qya aj Jerusalen,

tu'n lan txikyk'asu'ne' qya nchin laqje' ti'j.

¡Wtanku'j tzmax ajttzaj tna'ntib'! chij.

Tqaqi'n b'itzKyyol mojtzal

5¿Alkyetzu'n tzul toj chq'ajlaj,

kuẍlok ti'j t-semu'lju' nlaqj ti'j? chechij.

Tyol chmilb'aj

Tjaq' junwi' mansan xxa' nk'asu'na:

ja oka' ttxuya toj k'ixk'oj;

ja itz'ja'ya tu'n ttxuya, chij.

Tyol xu'jilb'aj

6Lalun chin ele' ti'j tanmiya,

¡chin tiq'ixa kse'n jun techil ti'j tq'ob'a!

Lay b'entte' tk'u'jlalil tmyet kse'n kamik;

ikyte tb'isju' kse'n muqb'il min yukchi.

¡Iky tk'u'jlalilju' kse'n q'aq' inxi'x ja'yun,

kse'n jun taq' q'aq' te Dyos!

7Lay b'ent tyupetju' tk'u'jlalil

tu'n a' kyoj kykyaqilju' ninnjab';

ex lay b'ent tyupit kyu'n tnimal a'.

Naqwit alkye jun txiq'onte tkyaqilju' tq'inumal

te t-xelju' tk'u'jlalil,

jaku'lo b'aj xmayi'n, chij.

Kyyol mojtzal

8Mixti'te' tal qanab' timi'ẍ.

¿Ti'tzu'n qse' ti'j ajtul qanb'aj?

9Naqwit jun nintapi,

jaku'wtlo jaw qb'incha'n jun b'o's ja saqpwaq tib'aj;

naqwit tjpel ja,

jaku'wtlo tz'ok qktxu'n tu'n tz'len k'ute, chechij.

Tyol xu'jilb'aj

10Ikqinwe' kse'n jun nintapi,

aye'tzu'n wimi'ẍe' ikqe' kse'n ja nimaq kywe' te ka'yb'il.

qu'mtzun toj twitz,

qa matxi' tz'el yalju' tzalajb'il wu'ne'.

11Atitoq jun tawal Salomon ub'a toj B'aal-amon.

kyej tq'o'n toj kyq'ob' junjun xjal tu'n t-xikyka'yi'n,

teyiletzun junjun tu'ntoq txi' tq'o'n kab'k'al lajnaq (1,000) saqpwaq te

aj tjawju' twitz tawal.

12Te teju'ya kab'k'al lajnaq (1,000) medi, Salomon,

atzun lajnaq (100) kyeju' xq'uqil;

¡atzun nxq'uqinxwe' wawal! chij.

Tyol chmilb'aj

13¡Q'oma anb'il tu'n t-xinb'i'ne' toj twi'ya,

t-xu'jil nimaqkawila toj awal!

¡Kyajb'ilju' qamiw tu'n t-xib'i'na kyu'n! chij.

Tyol xu'jilb'aj

14¡Ojqelxa nk'u'jlb'e'tz,

tz'ojqelana kse'n jun msat,

kse'n jun tal msat

kywi' witz inxi'x che puk'chaj! chij.