Is 24 - Mam Ostuncalco Bible

Tz'e'ysb'il kywitz kykyaqil xjal twitz tx'otx'

1Kyka'yinxe', kb'el t-xitu'n Qman Dyos twitz tx'otx',

kjel prowix ex kjel xitj tu'n,

ex che kxe'l t-sputi'n xjal najliqe' twitz.

2Junx k'elela' kye pale ex kye tnam,

kye ate' kymajin lq'o'n ex kye lq'o'n majin,

kye qya ate' kymajin lq'o'n ex kye qya lq'o'n majin,

teju' nloq'on ex teju' nk'ayin,

teju' nq'on che'x ex teju' nch'xon,

teju' ati tk'as ex teju' tajaw k'as.

3Kjel ẍb'ilete' tx'otx'.

mixti'tlte kjelten toj.

Qu'n a oje tma Qman Dyosju'.

4Mab'ajtzqij twitz tx'otx' ex mab'a ch'uẍj,

tkyaqil twitz tx'otx' xb'ajtzqij ex mab'aj kub'tilj,

makyaju' kya'j ex tx'otx' b'isb'ajilxi'x.

5Makub' yajtiju' tx'otx' kyu'n najalte,

qu'n min nche japunju' kawb'il kyu'n,

min nche'x kyb'i'nju' chaq'b'il,

matxi' kub' kytoqi'n yol kyejni b'entti'j.

6Qu'mtzun matxi' kub'aju' tx'otx' tu'n jun qanb'en,

ex makub'tz'e'ysa'n kywitzju' najalte.

Qu'mtzun mache kub'aju' najliqe' toj,

naq jte'xtlju' xjal najlqe' twitz.

7Kb'elb'aju' b'in, k'okyel kyab'ju' tqan ub'a,

che kjelju' nxi'xtoq che tzalaj toj b'is.

8Mab'aju' tzalajb'il kyu'n tanb'or ex arpa,

matxi' b'aj kyẍch'in amiw toj tzalajb'il.

9Lay che k'wantl b'in kyoj b'itz;

k'a qe'tlkye' k'wab'j kyeju' nche k'wante.

10Xitjnitlju' nintnam mixti'x ttx'o'lajil,

mix-a'lo'tl kb'antel tokx toj jun ja.

11Nche oq'ju' xjal kyoj b'e tu'n tpaj mixti' b'in;

tkyaqilju' tzalajb'il matxi' kub'naj,

matxi' b'je'l q'i'n toju' tx'otx'.

12matxi' b'ajxitju' nintnam,

tb'uchub'tlte' tjpel.

13Ikytzu'n kb'ajela' kyoj kykyaqil nimaqtnam twitz tx'otx':

kse'n naqnb'aj xyiju'n tqan aseyt,

mujqa kse'n nb'aj sik'u'n twitz ub'a

kse'n matxitoq b'aj b'uyit twitz awal.

14Che ẍch'ilju' che kjel anq'in tu'n tzalajb'il,

kjawil tq'ojq'ojel kywi' tzmax tkub'exq'ij,

ajkyka'yinte toklen Qman Dyos.

15Ikx toj tjawetzq'ij

ex kyoju' tx'otx' toj ninnjab'

kjawil kynima'n Qman Kydyos aj Israel.

16Nche qb'i'n tzmax japomna' b'aju' tx'otx' nche b'itzan kjalu:

¡Ninb'ilteju' tnik'alti'j! chechij.

Ayintzunwe' nmaye': ¡Layqinxwite', malayqinxwite'!

¡Naqx sb'ub'l ati toj kyanmiju nche jawmiltz'uj!.

17Che okyelkye' najliqe' toju' tx'otx'

kse'nqe' txkup ljo'n kykanli kyu'n ub'al

mujqa xi'kykub'tz'aq toj jun jul mo toj jun xpatxab'.

18Alkye matzaqpaj toj kyq'ob' ub'al kb'elex tz'aq toj jul,

ex alkye matzaqpaj toj jul kb'eltz'aq toj xpatxab'.

Ktzajel jun q'eqjab' toj kya'j

ex che lu'lulju' tq'uqlil tx'otx' te.

19Okxi'x lu'lulju' tx'otx',

kb'ajel txij ajtb'aj xyiju'n.

20Kẍu'tajlab'el kse'n jun tx'ujtenil,

okxi'x lu'lul kse'n jun tal pach.

Matxi' kub'talalju' kyil xjal tib'aj

kb'eltz'aq ex lay b'ent tjawe'tl.

21Tojtzu'n q'ij lu kb'el ttz'e'ysa'n Qman Dyos

kywitzju' ipumalj te toj kya'j,

exqe' nimaqkawil twitz tx'otx';

22che b'ajel tb'u'yi'n, che okyextjpu'n toj kars,

che kjel tjpu'n,

tik'lenxi'tzun nim tq'ijlalil kb'el ttz'e'ysa'n kywitz.

23Ajtb'inchante Qman Dyos nimtipumal tnimaqkawb'il

twi' witz Syon toj Jerusalen,

che b'elqloljixju' q'ij exju' xjaw

ex kkyla' nejenel toj kytanam tajwalil Qman Dyos.