Ec 11 - Mam Ostuncalco Bible

1Chtonxa twaya toj a';

kna' tk'ma'ta tu'me'l t-xel yajxi'tel.

2Aq'punku'ya ati teya kse'nxju' mab'ent tu'na,

qu'n min b'i'n tu'na titi' jaku' tzaj tib'aju' tnam.

3Qa jupli muj twitz kya'j,

tzul jb'aj twitz tx'otx'.

Qama kub'tz'aq jun tze toj tnayaj q'ij,

mujqa toj tb'a'nq'ob'kya'j,

axtzuntzu' kjela'ten

jama kub'a' tz'aq.

4Alkyete matz'okten twitz ti'ju' kyq'iq', lay tz'awan,

ex alkyete matz'okten twitz ti'ju' muj, lay jaw tawal.

5Ikxtzu'n kse'n min b'i'n tu'na janxa' kyq'iq', ex kse'n nch'iya'ju' ne'ẍ toj t-xmilal ttxu, ex min b'i'n tu'na titi' ntb'incha'n Qman Dyos, ju' b'inchante tkyaqil ti'xti'.

6Awanxa tijaja prim ex awanxa te qale', qu'n minti' b'i'n tu'na alkye k'elelb'a'n, qa aju' tnejel awal mujqa aju' tkab', mujqa kykab'il.

7Majx tb'anilxi'xju' spik'un, ex b'a'n tu'n qka'yinteju' q'ij tu'n qwitz;

8naqtzun aju' maskye maqo' anq'in b'a'npun ab'q'i twitz tx'otx' ex maqo' tzalaj toj, na'nku'ya qa nimxi'x tq'ijlalil qxopin tzul ex mixti'x ttx'o'lajil tkyaqilju' tzul.

Nab'l kye ku'xun

9Tzalajxa ja'lo ku'xun, tzma ku'xunku'ya, tzalajxa toju' b'a'n ja'lo qu'n kb'entel tu'na. B'inchama tkyaqilju' makub' t-xima'na exju' matz'ok tka'yi'na, majxtzun na'nku'ya, jun q'ij k'okyela toj xjel tu'n Qman Dyos ti'j tkyaqil ja'lu.

10Lalun txib'ajtl tk'u'ja ti'ju' ati toj tnab'la ex pa'mil tib'a ti'ju' yajb'il, qu'n ikxpete' tq'ijlalil ku'xumal mixti'x ttx'o'lajil.