Jue 5 - Mam Ostuncalco Bible

Kyb'itz Deb'ora ex B'arak

1E' b'itzan Deb'ora tuk'i'l B'arak tk'wal Ab'inoam toju' q'ij lu ikjalu:

2Che b'itzan qe'ye' kykyaqile' te Qman Dyos

qu'n ate'x ichan kyxol aj Israel

atix tb'is kyk'u'j tu'n kyq'ojin

qu'n ate'x ichan toju' tnam

nkyq'o'n kyib' tu'n kyxi' q'ojil.

3¡Chin kyb'intze' nimaqkawil

¡Kyb'intze' aye'ye' kawil! ¡Chin b'itzale' te Qman Dyos!

¡Chin b'itzale' teju' Dyos janche k'uluna' aj Israel!

4Tej tetza, Nman Dyos, toj Seyir,

tej tetza kyoju' kojb'il Edom,

lu'lunju' tx'otx', ojexi'x tinunju' kya'j,

tzaj jb'al kyu'n muj.

5E'lu'lunju' witz, twitza Nman Dyos,

Twitza Taye, lu'luna' witz Sinayi.

6Toj tq'ijlalil Samkar, tk'wal Anat,

ex toj tq'ijlalil Joel,

e'kyaj tzaqpi'n b'e kyu'n xjal nche b'et najchaq,

ex eb'et toj b'e myab'a'n;

7Eb'ajkyaj tzaqpi'n kynajb'il aj Israel.

Atzuntzu' jawa' wiq'i'n wib'e',

¡Ayine' Deb'ora, jun txub'aj kye aj Israel!

8Tej intoq ok q'oj ttziju' nintnam

ate'toq junjun ntzaj kyiq'i'n jujuntl kydyos,

ex mixtoqti' jun kolb'il mujqa jun ch'ut

kyxolju' jo'mutx' (40,000) aj Israel!

9¡Inxi'x chin tzalaje'

kyi'ju' nejenel nimaq kyoklen toj Israel,

kyi'ju' xjal toj ntaname'

tu'nju' makyaq'kyib' tu'n kyxi' toj q'oj!

¡Che b'itzan qe'ye' kykyaqile' te Qman Dyos!

10Kymanxe' aye'ye' nche jaxe' kyib'aj b'ur saqinin kyi'j;

exqe'ye' nche kub' qeye' tib'aj tb'anil xb'alun pin;

exqe'ye' nche b'ete':

11¡Kymanxe' tkanb'ab'l Qman Dyos,

kykanb'ab'lju' najb'il toj Israel,

tuk'i'l kyq'ojq'ojel txijtxij,

ja ta'qe' kyk'wab'l alu'mj!

12¡Na'ntztib'a, Deb'ora na'ntztib'a,

na'ntztib'a ex b'itzanx jun tb'itza!

¡Ex ikxta B'arak, tk'wal Ab'inoam

lwixa ex q'inqe'xa jpu'nqe' e'tzyet tu'na toj q'oj!

13Eku'tztzun aj Israeltz

q'ojil kyi'ju' nimaqxjal kuwqe';

e'ku'tzju' t-xjal Qman Dyos te q'oj wuk'i'le',

q'ojil kyi'ju' xjal te q'oj.

14Eku'tz junjun ichan tyajajil Eprayin toju' b'ya',

ex e'etzlpeju' xjal te q'oj tyajajil B'enjamin kyi'j.

Ex eku'tzju' nejenel kye tyajajil Makyir,

ex eku'tzju' kawil kyxol tyajajil Sab'ulon.

15Ex ikx exi'ju' nejenel kye tyajajil Isakar tuk'i'l Deb'ora

aye' exi' onilte B'arak,

qu'n e'ik'lpe ti'j toj b'ya'.

Qa ate' nimaqxjal kuw

Kyxolju' tyajajil Rub'en

16¿Tiqu'n ẍe kyeja' ten kyxolju' rit

b'il kyi'ju' k'ik'lel inche kytxko'nju' kyrit?

¡Ate'qe' nimaqxjal mya'l che xob'

Kyxolju' xjal te q'oj tyajajil Rub'en!

17E'kyajtenju' aj Kalaad

jlajxi' nin a' Jordan;

ex axtzu' e'kyaja'ten tyajajil Dan ja ta'qe' b'ark,

ikxqe'tlju' tyajajil Aser e'kyajten mlaj ttzi ninnjab',

ex min e'etz toju' kynajb'il;

18Aye'tzunkye' kyyajajil Sab'ulon ex Neptali,

kyaq'ju' kychwinqlal tej kyxi' toj q'oj twi' witz.

19E' ultzun nimaqkawiltz toj tnam Taanak,

tk'etzju' a' te mewido;

e'ulju' nimaqkawil aj Kanaan q'ojil,

ex mixti'te saqpwaq ex q'inumal kanb'et kyu'n.

20E' q'ojinju' che'w ti'j Sisara

tzmax toj kya'j, tzmax japomna' b'aj twitz kya'j;

21eb'ajkub' b'ajsa'n kykyaqil,

tu'nju' ojtxi' a', tu'nju' a' Sison,

¡Aya kb'el yq'onte kyqulju' nim kyipumal!

22¡Inxi'x che q'ajtiju' k'uxb'il toj kyqan chej!

¡Ojqel kyel, ojqel kyelju' sq'ib'un chej!

23Atzunju' tanjl Qman Dyos intma'n kjalu:

¡Tzajxwit jun taq'wixil

tib'aj Meros ex kyib'aju' najliqe' toj!

qu'n min xkyqani onb'il te Qman Dyos ẍe tzaj kyuk'i'lju' kuwqe'.

24¡Ky'i'wla'nxwit Jael kyxol qya,

t-xu'jil Eb'er ju' aj Kyenit!

¡Ky'i'wla'nxwit kyxolju' qya ate' toju' xmuj!

25Xitqani'n Sisara a'; lech xitq'o'n Jael te.

¡Ttzotzal lech xitq'o'n te toj jun ninlaq tb'anilxi'x!

26Tzajtzun tiq'i'n jun tze juch'sa'n twi' tu'n tnayaj

atzunju' pojb'il tu'n tb'anq'ob',

ku'x tpoji'ntzuntz toj twi' Sisara

majx ex jlajinju' stak tu'n tojxi'x tnab'l.

27Atzunte Sisara intoq tk'o'yi'n tib' t-xe tqan Jael,

tej tjaw tk'o'yi'n tib' tu'n k'ixk'oj, kub' tz'aq twitz tx'otx',

atzuntzu' kyaja' kyim ja kub'a' tz'aq.

28Etz ka'yin ttxu Sisara in b'isun toju' tokexspik'un ex tma:

¿Tiqu'n na'mx tulju' tkarwaj?

¿Tiqu'n min q'o'n tu'n tulju' tkarwaj te q'oj? chij.

29Xitzun kytzaq'we'n jte' qya, okkyq'o'n kyib' qa b'i'n kyu'n,

expe' ax intoq tma'n ttxu Sisaraju' ikjalu:

30Inlo b'ajx kypa'nju'

xkykanb'a toj q'oj kyxol.

Junlo txin lq'o'n mujqa kab'e' te junjun xjal te q'oj;

te Sisara qekye' xb'alun chukchaq che ka'yin;

jun xb'alun mujqa kab'e',

B'incha'nqe' tilb'ilal toj chukchaq che ka'yin,

te ti'j tqulju' xkanb'an, chechij.

31¡Che b'ajxwit kykyaqilju' tajq'oja ikju', Nman Dyos,

aye'tzunju' inche k'u'jlanteya che qoptz'ajxwit,

kse'n q'ij toj tipumal t-spik'umal! chechi Deb'ora ex B'arak.

Tb'ajlenxi'tzun ja'lu, kab'naq (40) ab'q'i ten nak'b'il toju' tx'otx'.