1¡Majx b'a'nte' Dyos tuk'i'l Israel,
kyuk'i'lju' ẍtilun kyanmi!
2Noq ch'intlmi ẍin kub'a' tz'aqe';
qu'n e'jawtoq jilpuju' nqane'.
3Qu'n matzaj tx'a'lti'j nk'u'je' tej xxinka'yine' nche b'jawb'ent
ju' b'inchal myab'a'n ex inkynima'n kyib'.
4Minti' nche ximankye' lu qa kche kyimel,
qu'n b'a'nqe' toj kyxmilal;
5na'mx tik' twitzlalil kyu'n, ti'ju' yajb'il ati twitz tx'otx'
ex na'mx kyajti kse'nqe' txqantl xjal.
6Qu'mtzun a kyachb'ilju' nimjtib'il
ex majx ati kytx'u'jil naku'j kyxb'alun;
7matxi' b'je'tz kywitz,
nimxi'xju' myab'a'n nkub' kyxima'n.
8Tuk'i'l xmayb'il, nimjtib'il ex taq'wix yol,
nche xob'tzana' tu'n kyb'inchan myab'a'n ex b'yojxjali'n,
9inche xon kyol ti'j Dyos te toj kya'j
in elpunxju' kyol toj tkyaqil twitz tx'otx'.
10Qu'mtzun nche jaw nima'n kyu'n xjal
ex min nnel kynik' ti'ju' taq'wixil nkyb'incha'n.
11Inkyma'n: ¿Ma oktzun ktb'i' Dyos?
¿Ma ktzunlo tzajel tka'yi'n Dyos tzmax toj kya'j? Chechij.
12¡Kyka'yinqe'xpe'ye' b'inchal myab'a'n!
Min nche yajti ex in chmet kyq'inumal.
13¡Naqx wak'a'we' nb'aj nẍtilsa'n wanmiye'
ex nche b'aj ntxjo'ne' nq'ob'e' te tkyaqil il!
14Naqx k'ixk'oj ink'mo'ne' tkyaqil kmuj,
intz'e'ysanjtz nwitze' atl junjun prim.
15Naqwit machin ximane' kse'nkye,
matxi'wtlo che kub'nsb'u'ne' tk'wala.
16Matz'oktilil wu'ne' tu'n tel nnik'e' ti'j ja'lu,
ex ch'uẍxi'x sela' weye'.
17Tzmaxi'j ẍin nokxe' toj tja Dyos xjan
xkanetzuntz toj nwitze' ja che web'ela'kye' lu:
18Matxi' che kub' tq'o'na toju' b'e ẍb'ilun
ex inche'x tlmo'na toj yajb'il.
19¡Toj jun kmujx che kjel xitu'n!
¡Kche b'ajel tu'n kxob'el!
20Ajtzun tjaw tiq'i'ntib'a Nman Dyos,
kse'n ajttzaj tna'tib' jun xjal toj watl,
k'elil tik'u'nju'ya che ka'yin.
21Machin tenwe' toj nim yajb'il
ex atitoq k'ixk'oj toj wanmiye',
22qu'n xnak qintoqe' mixtoqti'x noktojnwi'ye';
¡ikqintoqju'ye' kse'n jun chej twitza!
23Tu'npetzunju', antine' tuk'i'la kukxju'.
Machin jawtiq'i'na tuk'i'l nb'a'nq'ob'e',
24matxi' chin tzajt-ẍaqlu'na kyu'nju' tnab'la
te b'ajsb'iltzun kchin tk'ma'ya kyuk'i'l oklenj.
25¿Alkyetzun juntl ati toj kya'j? ¡O'kx aya!
Ajntene' tuk'i'la mixti'tl wajb'ile' te twitz tx'otx'.
26Xi' nkub' b'ajwe',
atzunte Dyos wetzb'ile' tejumajx
ex a tzyulte wanmiye'.
27Che kyimelju' inel kypa'n kyib' ti'ja;
kb'el t-xitu'na xjal minti' nnokslan teya.
28Ayintzunwe' chin kxe'l lq'eye' tk'etz Dyos,
qu'n a b'a'nju' weye'.
Aya, Nman Dyos, kolb'ilweye',
ex kxe'l npakb'a'ne' tkyaqilju' tb'inchb'ena. Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
