Sal 41 - Mam Ostuncalco Bible

Tna'j Dyos jun yab'

1Tzalajb'ilte' teju' nximan kyi'ju' prow ex mixti' kyipumal,

qu'n kkletel tu'n Qman Dyos toju' tq'ijlalil ch'uẍ.

2Kxq'uqinjtzel tu'n Qman Dyos,

kxe'l tq'o'n tchwinqlala ex ktzalajel twitz tx'otx' tu'n,

ex lay kyej ttzaqpi'n toj kyq'ob'ju' tajq'oj.

3Ktzajel tq'o'n Qman Dyos tipumal toj k'ixk'oj twitz kuẍb'il;

¡kb'anixel tu'n toju' yab'il!

4Oje nmaye' ikjalu:

Nman Dyos, q'aq'antz tk'u'ja wi'je';

chin tq'anama, b'a'nqa matxi' chin b'inchan ile' twitza. Nchije'

5In txkonjtz toj nwi'ye' kyu'n wajq'oje, inkyma'n:

¿Jtojlo kyim ex tu'n tik' tna'l tejumajx? Chechij.

6Mya tu'n tkyaqil kyk'u'j nche ula' nelweye';

ex noq k'u'jla'nju' kq'oj kyu'n,

ajtzun kyex toj b'e nche yolintzuntz wi'je'.

7Nb'aj kyb'u'yi'n kyib'ju' ntx'a'lti'j kyk'u'j wi'je' tu'n kyolin;

inkyma'n qa tu'n tpaj wile' nchin yajta'ye',

8ex inkyma'n:

Tu'nte tajaw ilju' tyab'il;

matxi' kub' twitz kuẍb'il ex lay jawe'tl. Chechij.

9Naqpena' wamiwe' q'uqlitoq nk'u'je' ti'j,

aju' ntoq wan wuk'i'le', matxi' tz'ok miltz'uj wi'je'.

10Atzunta Nman Dyos, q'aq'antz tk'u'ja wi'je';

chin tiq'i'nktza twitz kuẍb'il, tu'n nq'onte tu'me'l t-xele' kye.

11Kkaneb'eltzuntz toj nwitze' qa ntzalaja wi'je':

qa min xtaja tu'n tkub' wi'je' kyu'n wajq'oje.

12Tu'nju' nchin anq'ine' b'a'n twitza,

chin ttzyuma tu'n tq'ob'a,

chin tq'o'nku'ya twitza tejumajx.

13¡Nimanjtzxwitju' Qman Dyos janche k'uluna' Israel,

ja'lo ex tejumajx!

¡Ikxwitju'!, Chiju' b'itzal.