1Nman Dyos, teya nchin kub'sana'ye';
2Taye, ti'ja q'uqla' nk'u'je':
lalun taja tu'n tel nch'ixawe'.
¡Tu'n lalun chin kub'kytze'ne' wajq'oje!
3¡Miwt tz'ela' kych'ixawju'
q'uqlok kyk'u'j ti'ja!
¡Aye'wt tz'el kych'ixawju'
naqx kyak'a'n njaw kyiq'i'n kyib' ti'ja!
4Nman Dyos,
yek'unqe'tzju'ya tb'eya weye';
chin t-xb'etzama kyoj;
5chin t-ẍaqluma, chin t-xb'etzama toju' ax,
qu'n a na'ta Dyos ja q'uqla' nk'u'je' ex klol weye'.
¡Tkyaqil kmuj q'uqlok nk'u'je' ti'ja!
6Nman Dyos,
na'ntza ttzalajb'ila tuk'i'l tk'u'jlalila
ju' ntzaj tyek'u'na qeye' kukxju',
7lantzun tzaj tna'nteju'ya wile'
exju' taq'wix xnb'inchaye' toj nku'xumale'.
Nman Dyos, chin tna'tza,
tuk'i'l tk'u'jlalila ex t-xtalb'ila.
8Majx b'a'nte' Qman Dyos ex tnik'alti'j;
intzak'un ti'j kyb'inchb'enju' aj il
9aye'tzu'n min nkynima'n kyib' inche t-ẍaqlu'n toju' tb'eyil;
¡nche t-xnaq'tza'n tu'n kyb'et toj tnik'alti'j!
10Tkyaqilju' tb'e Qman Dyos tk'u'jlalil ex ax qe',
kyeju' xjal njapunju' tyol ex tchaq'b'il kyu'n.
11Nman Dyos, nimwe' wil twitza;
najsama, nimanjtzwitu' tb'iya.
12In xityek'u'n Qman Dyos b'e,
teju' xjal nniman te;
13intb'incha'n tu'n tanq'in b'a'n
ex kxe'l tq'o'n kytx'otx'ju' tyajajil toju' tx'otx'.
14In nokte Qman Dyos te kamiwju' nche niman te,
ex nxityek'u'nju' tyol kyejni b'entti'j kye.
15Majx tokwe' nwitz ti'j Qman Dyos,
qu'n inchin tklo'ne' toj tkyaqil xob'ajil.
16Chin tka'yintza, Nman Dyos, ex q'aq'antz tk'u'ja wi'je',
qu'n njunale' intinqine' ex nchin b'isune'.
17Inxi'x chin b'isune' atl junjun q'ij;
chin tkloma toju' yajb'ilweye'.
18Ka'yintzju'ya nchin nik'a'ye' toju' aq'untl ex toju' b'is,
ex najsama wile'.
19Ka'yintza, nim wajq'oje
inxi'x walti'j kyk'u'j wi'je'.
20¡Chin t-xq'uqima, klomju'ya nchwinqlale'!
¡Lalun taja tu'n tel nch'ixawe',
qu'n tuk'i'la njyona'ye' kolb'il!
21Chin kletxwite' tu'nju' b'a'n wele' mixti' wile' twitza,
qu'n matxi' tz'okqe nk'u'je' ti'ja.
22¡Nman Dyos,
klomqe'ju'ya aj Israel toj tkyaqilju' yajb'ilkye!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
