Zac 10 - Mam Ostuncalco Bible

Ttziya Qman Dyos tzaqpib'l

1Kqaninxe' jb'al toj q'ijal te Qman Dyos, ex ate Qman Dyos nb'inchanteju' xloq'lokya'j, ktzajel tq'o'n jb'al nimxi'x, ex ktzajel tq'o'nju' itzaj toj kojb'il kye kykyaqil xjal.

2Chajyolilju' kyol witzileb', ex naq chajyolilju' nkyka'yi'n jyolkyi'j xjal. Aju' pakb'ab'l nkma'n witzik'qe' mixti' knab'l, aye'ju' kyol te q'uqb'ab'l k'u'jb'aj mixti' kyoklen. Qu'mtzun aju' tnam naq ate'qe' se'n jun tnej rit, ex che yajt tu'n tpaju' mixti' k'ik'lel kyi'j.

3Qu'mtzun ntma'n Qman Dyos:

Aju' ntx'u'jile' matxi' tzaj b'ent

kyi'ju' k'ik'lel,

ex kb'el ntz'e'ysa'n kwitzjuye' nejenel teju' ntaname'.

Ate Qman Dyos nimtipumal, xq'uqilteju' tnej trit,

aye'ju' tyajajil Juda,

che okyel te tchej kuwqe' toj q'oj.

4Kxolkye k'eletza'ju' ab'j nim toklen,

aju' stak te ja exu' smaj te q'oj,

kxolkye che elitza' kykyaqilu' nejenel.

5Ikqe' kse'nqe' xjal te q'oj

nkub' kwab'a'nju' kuw tx'otx' kyoj b'e;

In oktilil kyu'n, qu'n ati Qman Dyos kyuk'i'l,

ex che b'el ch'ixwi'ju' aj chejil kyu'n.

6Chi Qman Dyos kjalu:

Ayine' chin q'olte kyipumalju' tyajajil Juda

ex che nkla'ju'ye' tyajajil Jse.

Kche nẍaqluye' tu'n kyanjtz toj ktanam,

qu'n nlaqj nk'u'je' kyi'j.

Kche okyel jumajtl naku'xwitloj b'ajx che ela' wik'u'ne',

qu'n ayine' Qman Dyos kye,

nxi' nb'i'nju'ye' kna'j Dyos.

7Naku'j jun xjal te Eprayin te q'oj,

ktzalajelju' tanmi se'nju' tu'n b'in.

Ex ikx che tzalajelju' kyk'wal ajkyka'yinte.

¡Ktzalajelju' tanmi tu'n tpaj Qman Dyos!

8Kche ntxka'ye' ex che tzajel nb'u'yine',

qu'n matxi' che nkole',

Kche chmetel jumajtlu' kb'aj

kse'nxu' kyb'aj ojtxi'.

9Ayine' ẍinx sputinkye' kyxolju' nimaqtnam

b'a'nqa najchaq ta'qe', chin tzajel kyna'ne',

ex jun q'ij k'anjetz kyi'j kyuk'i'lju' kyk'wal.

10K'anjetz kyi'j wu'ne' toj Ejipt

che eletz wiq'ine' toj Asirya,

che xe'l wiq'ine' toj Kalaad ex toj Lib'ano,

ex nim txqan kb'aj expe' lay kanunju' najb'il kye.

11Kche ik'ex jlajin toju' ninnjab' te Ejipt,

knk'ixb'saju'ye' ttolob' ninnjab'.

kb'el ntzqijsa'ne' nin a' Nilo tzmax t-xe,

kb'el nxi'tu'nju'ye' nimjtib'il te Asirya

Ex kb'el nb'ajsa'ne' tipumal Ejipt.

12Kxe'l nq'o'nwe' kyipumale',

ex kb'elti'j kyu'ne' toj nb'iye'.

Ayine' Dyos Manb'aj nchin q'mante.