Esd 3 - Mam Ostuncalco Bible

B'ajnk'et jumajtlju' k'u'lb'il

1Tej tjapunju' twuqi'n xjaw, ex matxitoq b'entkyten aj Israel tojilex kynajb'il, b'aj kyb'u'yi'n kyib' tkyaqilju' tnam toj Jerusalen.

2Aye'tzu'n Joswe, tk'wal Josadak, kyuk'i'lu' paleju' tuk'i'l, ex Sorob'ab'el, tk'wal Salatyel, exqe' twitze'l, e'okten b'inchalte q'olb'eb'l te Qman Dyos, tu'n kykub' q'etju' chojb'il k'ok'sb'il tib'aj, ju' ntma'n toj tkawb'il Moyses tmajin Dyos.

3Jaw kyb'incha'n q'olb'eb'l axtzu' jatoq ta' nejtl, maskyepe' intoq che xob' kyeju' xjal najlqe' nqayin kyk'etz, ex intoq kub' kyq'o'n chojb'il k'ok'sb'il tib'aj atl prim ex atl qale te ninb'ilte Qman Dyos.

4Expe' kub'kyik'sa'n tq'ij pach xb'alun, kse'nx tz'ib'a'n toj kawb'il, ex kub' kyq'o'n chojb'il k'ok'sb'il tkyaqil q'ij kse'nxju' nb'inchet, kse'nxju' nkub' q'o'n atl junjun q'ij,

5kse'nqe' chojb'il k'ok'sb'il junjun q'ij ex te ak'a'j xjaw, kyexju' ninq'ij xjan te Qman Dyos, exju' nkub' tq'o'n junjun xjal tu'n tk'u'j te Qman Dyos.

6Tzyet tkub' kyq'o'n chojb'il k'ok'sb'il te Qman Dyos toj tnejel q'ij teju' twuqi'n xjaw, na'mxtoqpe' ttzyet tjaw b'incha'n jumajtlu' tja Qman Dyos.

7Xikyq'o'ntzun pwaqtz kye b'inchal ja ex aq'unal kyi'j tze, ex xikyq'o'n wab'j, k'wab'j ex aseyt kye xjal aj Tiro ex aj Sidon, tu'ntzun ttzaj kyiq'i'n tze k'ute tib'aj ninnjab', tzmax Lib'ano, tu'n tul Jope, kse'nxju' anb'il ojetoq taq' Siro, nimaqkawil aj Persya kye.

Tzyet tjaw b'inchetl tja Dyos

8Toj tkab' xjaw te tkab' ab'q'i kyulen toj Jerusalen, tzyet tjaw b'incha'n jumajtlu' tja Dyos kyu'n Sorob'ab'el tk'wal Salatyel, ex Joswe tk'wal Josadak, junx kyuk'i'lu' kyuk'i'l pale ex tyajajil Leb'i, kyuk'i'l kykyaqilju' b'je'xni qe'toq' iq'i'n ex e'ul jumajtl toj Jerusalen, kyej kyq'o'n tiq'jiju' aq'untl toj kyq'ob'u' aj Leb'i ik'ni kyab'q'i tib'aj winqi'n.

9Okkyb'u'yi'nkyib' Joswe kyuk'i'lju' tk'wal, e' ttzik ex titz'in junx k'loj kyuk'i'l Kadmyel kyuk'i'l tk'wal, tyajajil Judaqe', ex kyuk'i'lju' tyajajil Enadad, e'tk'wal, e'titz'in ex ttzik, aj Leb'iqe', tu'n tiq'et twitzju' aq'unal ti'j tja Dyos.

10Tetzunj tkuxkyq'o'n b'inchal ja tq'uqlil tja Dyos, e'kub' we' pale, toktoq kyi'j ex iq'i'n kychun teju' ninq'ij lu. Iq'i'ntoq txijtxij ajwalb'ilte Qman Dyos kyu'n aj Leb'i tyajajil Asap, kse'nx tchaq' Dab'i, nimaqkawil toj Israel.

11Intoq che b'itzan junjun, aye'tzu'n junjuntl intoq xikytzaq'we'n: Kyq'onx chjonteye' te Qman Dyos, qu'n majx b'a'n te, qu'n tejumajxju' tk'u'jlalil ti'j Israel, chechij. Tkyaqiltzu'n tnam intoq jaw toj kywi' tu'n kytzalajb'il ex inche b'itzan te Qman Dyos, tu'nju' matxi'toq tzyet tb'inchanjtz jumajtlu' tja Dyos.

12Nimtzu'n pale, aj Leb'i ex nejenel kye k'loj kyyajajil, ti'jwnaqqe'tel, kyilju' tnejel tja Dyos, inxi'xtoq che oq' b'a'nxi'x tej tokkyk'a'yi'n intoq b'inchanjtz jumajtlu' tja Dyos. Ex ax kmoju', nim qe'toqtlju' nche ẍch'in tu'n tzalajb'il.

13Mixtoqti'x inel kynik'tzilju' tq'ojq'ojel wi'y injaw, alkyeqe'toq inche oq' ex alkyeqe'toq inche ẍch'in tu'n kytzalajb'il, qu'n inxi'xtoq jaw toj kywi' b'a'nxi'x, ex q'ojq'oj qe'toq najchaq.