Pr 7 - Mam Ostuncalco Bible

Tsb'ub'lju' qya ajpajil

1Nky'ajul, nimanqe'xju'ya nyole';

che kyajxju' nchaq'b'ile' toj twi'ya.

2Che japunxju' nchaq'b'ile' tu'na exqe' nxnaq'tzb'ile';

k'u'jlamqe'ya kse'nqe' tyuẍil twitza, atitzunte anq'ib'ltz.

3Q'onqe'ka te txmilq'ob'a,

majx na'nqeku'ya.

4Q'onka nab'l naku'j tanab'a,

ex tu'nju' k'atz twi'ya q'onka naku'j tamiwa.

5Aye'kye che klolteju'ya teju' qya ajpajil,

teju' qya eqch kyexi'x tb'inxju' tyol.

6Jun q'ij intoq chin ka'yimixe'

kyxolju' kutxb'il ti'ju' tokexspik'un

7tej kyxi' nka'yi'ne' jte' ku'xun na'mxi'x tok kynab'l,

ex elnnik'e' ti'ju' jun mixti'x tnab'l kyxol.

8tej tpon toj xky'ichb'e

tu'me'l tjaju' qya na'j.

9Xi'toq tok qale,

ex xi'toq qok yupj.

10Minab'en etzju' qya k'lulte,

b'inchla'n tib' ex inxi'x tze'je kse'n jun qya ajpajil,

11Jun qya elsal ch'xaw ex min nxob'

naqx toj b'e ta'

12nb'etinje kyojile b'e, jachaq ta'qe' xjal ex toj xky'ichb'e

nnayon tiju' tnejel matzik' tu'n tkub' tu'n.

13Xi' chlelte ku'xun ex oktma'tzi'n,

ex mixti'x nch'ixwi xitma'n te:

14Oje kub' nximane' tu'n txi' nq'o'ne' chojb'il te xk'ojb'il laq,

matxitzun che japun wu'ne' ja'lo.

15Qu'mtzun machin tzaje' k'lulteya;

¡wajb'ilxi'xtoqe' tu'n toknka'yina, b'a'nxpetzulo selyala wu'ne'!

16Matxi' kub' nsku'ne' jun tb'anil xb'alun sed tib'aj nkuẍb'ile'

tzajni Ejipt,

17matxi' kub' nq'o'ne' k'ok'sb'il npuk'chaj

tk'ok'jal mir, alowe ex kanel.

18Qo'ya, qo tz'ulin ex qo achin;

qo tzalajx, qo sqixel tu'n qtz'ulin,

19qu'n mix-a'lo'we' nchmil ja:

matxi' toj jun tb'e najchaq;

20majx matxi' b'ent txqan tpwaq

ex tzulxi' ajt-xk'o'mix xjaw. Chiju' qya te.

21Ok il b'a'nxi'x ti'ju' ku'xun

ex kub'ti'j tu'n tyolju' qya majx kyexi'x tb'inx,

22o'kx tik'lpe ti'ju' qya:

kse'n wakx nik' xikyikyin ajt-xi' toj b'i'yb'ilte,

naku'j jun msat ajtkub' tz'aq toj jun xpatxab',

23naqx tu'n taq'pon xontl tu'n talsmaj

kse'n jun pich' nokx jumtz'aj toj xpatxab'

ex min b'i'n tu'n qa atzu' kb'ajela'.

24Qu'mtzun nky'ajul, chin tb'iku'ya;

b'inqe'ku'ju'ya nyole'.

25Lalun tz'okxten qya lu toj twi'ya;

naq txalpuja, lalun txilpeya ti'j,

26qu'n b'a'npunxi' che'x tiq'i'n toj kamik;

¡expe' txqanxi' xjal che Kub' tb'yo'n!

27aju' tb'eyil tja

a tb'eyil kamikju'.