1 Co CHIK'B'AB'L - Mam Ostuncalco Bible
CHIK'B'AB'LMa'toq tzaj xitjtib'il kxolju' okslal aj Korint tu'n tpaju' xnaq'tzb'il ti'ju' tyol Dyos ex tu'n tpaj che anq'in, aye'j ekyej nk'u'n tu'n Pawl. Ate tnam Korint nimintoq ex tetoq tnam Kryek, chukchaqtoqqe' xjal najlqe' toj ex nim ti'xti' eb'aj b'ent toj. Ma'toq ch'iyju' xk'aẍle'n toj, ex txqantaq ktxolju' xjal najlqe' toj, nimtaq txqan ajpaji'n toj, ch'uẍtoq nela' naqtaq tu'n tpaj jaku' che kub' tz'aqju' okslal toju' tnam aju'.Atzun toju' q'olb'eb'l xitq'o'n Pawl kyeju' aj Korint, se'nxju' ntb'incha'n kyoju' tuj, inq'on chjonte tu'nju' inx nel yalju' b'a'n tu'n toju' tnam (1.1-9). Yajxi'tzuntl aq'wiju' Pawl yolil ti'ju' taq'wix nkb'incha'n. Majx nche el tik'unju' aj Korint tu'nju' nb'ajkub' kypa'n kyib' (1.10—4.21) tu'nju' nche ajpaji'n, tu'nju' nb'ajx kyi'nju' kq'oj kwitz xjal ajkawil, ex ikx tu'nju' nche q'on nab'l tib'aju' mjeb'le'n (caps. 5-7). Tu'nju' ma'toq kub' b'entju' witzleb'in ma'toq tzaj txqan xitjtib'il kxolju' okslal toju' tnam lu, ex atzunte Pawl okten q'malte txqan knab'l ex xnaq'tzalkye (8.1—11.1). Atzun tib'aju' k'u'lb'il exju' kychwinqlal okslal, nimtoq ti'xti' nojqelan tu'n tchik'b'ante Pawl kyxol okslal, kse'n tib'aj oklenj ntzaj tq'o'n Xewb'aj Xjan ex se'n tu'n kytena' toju' wab'j te Qajaw (11.2—14.40).Ma'toq che kub' chukliju' okslal ti'ju' xnaq'tzb'il tib'a'ju' tjawlen anq'in Krist extzunju' tu'n kjaw anq'in xjal, atzunte Pawl okten chik'b'alte kye se'nxi'x tu'me'l (cap. 15). Mankb'iltzun b'ajx tchik'b'a'n Pawl kye tib'aju' o'nb'il pwaq kyeju' okslal toj Judey, ex xitchik'b'a'nju' t-xim ex junjuntl ti'xti' toj tchwinqlal. Atzunju' tnej oxlajoj (13) a tb'iju' okq'o'n b'itz ti'j tk'u'jlalil.
