2 Co CHIK'B'AB'L - Mam Ostuncalco Bible
CHIK'B'AB'LAtzun u'j ja'lu kub' ttz'ib'a'n Pawl nyolin ti'ju' ttx'u'jil ex ti'j tkyaqilju' ti'xti' tzaj toj tchwinqlal. Qu'n matxitoq tzaj ch'yon twi' Pawl kyu'n okslal aj Korint, ex tzaj xitb'il kxol tuk'i'l, naqxtaq tu'n ch'inqe'tl. Ate'pe' junjun kxolju' okslal jaw kyiq'i'n kyib' ti'j Pawl tu'n tel tch'ixaw, expe' majx tzaj xim toj kyanmi xjal ti'j Pawl ex ti'ju' toklen te chq'o'n. Tu'ntzun tpaj ja'lu tzaj txqan ttx'u'jil Pawl kyi'j. Ex atzunte toju' tuj xittz'ib'a'n kye aj Korint q'ancha'lju' tk'u'jlalil kyi'j, ex q'ancha'lxi'x qa tajb'il tu'n tb'ent jumajtl kyuk'ilju' aj Korint ex kanli twitz qa nk'u'jlanjtz kyu'n aj Korint, maskye inb'aj tkyaqil ja'lu.Tb'ajlenxi' chik'b'ab'l se'nxju' ntb'incha'n Pawl (1.1-11) aq'wi yolil ti'ju' taq'untl ntb'incha'n kyuk'ilju' okslal aj Korint, ex in tchik'b'a'n titiqu'n yolina' kuw toju' tuj xi' ttz'ib'a'n kye tu'n tpaj tb'inte qa ma'toq jaw kyiq'i'n kyib' ti'j. Intzun tzalajte Pawl tu'n tpaj ma'tz'anjtz ti'j kyanmi aj Korint ex mab'ent jumajtl kten tuk'i'l tej txi'len ttz'ib'a'n tuj kuwinin kye (1.12—7.16). Ex maskye ma'toq tzaj xitjtib'il kxol ilti'jtoq nximante Pawl kyi'ju' txqantl, qu'mtzun ntb'incha'n jun ak'a'j txokb'il kyeju' okslal tu'n kxi' onilkyeju' okslal toj Judey (caps 8 ex 9). Ex yajxi'tzuntel nyolin ti'ju' kolb'ilte toklen Pawl kyeju' jun tnej xjal aj Korint intoq che poqonte qa myab'a'n chq'o'n, ex aye'tzunkye intoq nok kyq'o'n kyib' te axxi'x chq'o'n ex intoq che okten chewsalkyeju' okslal kxol aj Korint (10.1—13.10). Naqch'i'n tqanju' b'asb'il yol tu'n tojxi'x tu'me'l (13.11-14).
