1Nman Dyos, b'intzju'ya nqanb'e'tze' toj tu'me'l,
b'intzju'ya nkub'sb'ile',
chin tb'itza,
qu'n min nchin chanyole'.
2¡Aya q'malte qa ktz'e'ysetel nwitze',
qu'n tojtzqi'nju'ya japumni twitza!
3Chik'li twitza aju' xim toj wanmiye';
in ka'yina wi'je' te qonik'an;
matzik' twitza wi'je' kse'n tu'n q'aq',
ex min xknet taq'wixil woje' tu'na.
B'ajx txa' nma'n jun ti'xti'ye' myab'a'n,
4kse'n nkyb'incha'n txqantl;
matxi' tz'el npa'nwib'e' kyi'ju' jyol q'oj,
kse'nxju' tchaq'b'ila.
5B'ajx tz'ela' npa'nwib'e' ti'j tb'eyila;
qu'n wa'lqine' toj wokslab'le'.
6Nman Dyos, twitza in jawa' tq'ojq'ojel nwi'ye',
qu'n inchin tzaj ttzaq'we'na;
chin tb'itza, ex b'intzju'ya nyole'.
7Q'ontza jun yek'b'il chik'li ti'ju' tk'u'jlalila,
qu'n inche tklo'na q'uqlok kyk'u'j ti'ja,
kyeju' kyajq'oj.
8Chin t-xq'uqima kse'n tyuẍil twitza;
chin tkloma tjaq'ju' t-xlekumal t-xik'a.
9Kyeju' b'inchal myab'a'n nche oktzaqpaj wi'je',
¡kyeju' wajq'oje txoli'nkyib' wi'je' tu'n nkub' kyb'yo'ne'!
10Mixti' xtalb'il kyuk'i'l, ajkyyolin inkynima'n kyib';
11nqaku' lepchqe'ka' wi'je'
nche ayon alkye kmuj tu'n nkub' tz'aqe' kyu'n.
12Naku'j b'alunqe', inxi'x che elje ti'j kychi'
nche okxjutze toj kyewb'il
tu'ntzun nb'aje' kyu'n.
13Taye, iq'i'nktz tib'a, ¡ex we'ka kywitz!
¡B'inchama tu'n kykub' meje twitza!
Chin tkloma twitzju' b'inchal myab'a'n tu'n tk'uẍtx'e'nb'ila;
14Nman Dyos, chin tkloma tuk'i'l tipumala toj kyq'ob';
¡najsanqeku'ya twitz tx'otx',
ana' kyetzb'ilju' toju' chwinqlal ja'lo!
Q'oma anb'il kye tu'n kyjaw q'inumax,
che wanku' kyk'walj tzmaxi'j ajkyel link'aj,
expe' tu'n tkyajtentl kyeju' kychman.
15Ayintzunwe', okxi'x qeb'ilwe' nk'u'j
ajtok nka'yi'nku'ye' twitza,
¡ajttzaj nna'n wib'e' twitza!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
