1Tzajtzun tma'n Qman Dyos weye' kjalu:
2Ichan, kutanj ti'ja toj Jerusalen ex q'manxa ti'ju' ja te k'u'lb'il. Yolina toj nb'iye' ti'ju' tx'otx' Israel,
3ex q'manxa:
A ntma'n Dyos ja'lu: chin okyele' te tajq'oja. K'ajb'el nk'uẍtx'e'nb'ile', che kb'el nb'yo'ne' tnik'alkyi'j kse'nxqe' aj il.
4Iku', kjawil wiq'i'n nk'uẍtx'e'nb'ile' tu'n kykub' nb'yo'ne' kykyaqil junx, e'tnik'alkyi'j ex aj il, tzajx toj tb'a'nq'ob'kya'j ponx toj tnayajkya'j.
5Ex kkyb'i' kykyaqil xjal qa ayine' Dyos Manb'aj, matxi' jatzwiq'i'ne' nk'uẍtx'e'nb'ile' ex lay txink'u'ne'.
6Atzunta ichan, tz'oq'a b'a'nxi'x tuk'i'lju' tanmiya mixti'tl tb'anil; tz'oq'a kywitzju' tnam.
7Qatzun matxi' qani'n teya tiqu'n noq'a'ya, q'manxa qa tu'n tqanil jun ati tu'n tb'aji, exqa kykyaqil xjal twitz tx'otx' che b'elnumj ex che b'elwoqtz'aj kyq'ob'; mix-a'lo'tl ktenb'el tipumal, kykyaqil klu'lul kych'ek tu'n xob'ajil. Matxi' tzulkanun, noqx tu'n tb'ajtl. Ayine' Dyos Manb'aj nchin q'mante, chi Dyos.
8Tzaj yolin Qman Dyos weye', tzaj tma'n:
9Ichan, yolina toj nb'iye' ex q'manxa, qa ayine' Dyos Manb'aj, nchinx q'mante teya tu'n tmanteya:
¡Matxi' b'ajqet twitzju' k'uẍtx'e'nb'il!
ex q'ib'untl.
10Jqu'ntl twitzte tu'n tajb'en te b'iyb'il,
ex q'ib'untl tu'n tqoptz'aj;
11Mab'aj b'incha'n q'ib'un tu'n tb'ant ttzyet,
Jqu'ntl twitzju' k'uẍtx'e'nb'il ex q'ib'untl,
tu'n tten toj tq'ob'ju' b'yolxjal.
12Ichan, ¡ẍch'ina, ex tz'oq'a,
qu'n b'antnitl tten tu'n tkub' tb'yo'n ntaname',
ex kykyaqilju' kawil toj Israel!
B'antnitl tten tu'n kykyim kyuk'i'l ntaname',
qu'mtzun juminktib'a tu'n k'ixk'oj.
13Ayine' Dyos Manb'aj nchin q'mante.
14Ichan, yolin toj nb'iye';
lab'tixa tu'n tk'ixb'sa'n k'uẍtx'e'nb'il
tuk'i'l kamaj mo oxmaj ttx'u'jila.
Jun k'uẍtx'e'nb'ilte' te b'iyb'il xjal,
aju' k'uẍtx'e'nb'il te b'iyul
nxob'san ti'ju' tnam toj tkyaqil plaj.
15Nim xob'ajil tzultiq'i'n k'uẍtx'e'nb'il kyi'j,
nim che b'ajelkyim tu'n.
Matxi' kub' nq'o'ne' k'uẍtx'e'nb'il
b'yolxjal kyoj tkyaqilju' kyja.
A k'uẍtx'e'nb'ilju' q'ib'un tu'n tqoptz'aj,
jqu'n tu'n tb'iyun.
16¡Wajb'ile' jqu'na,
toj tb'a'nq'ob', ex toj tnayaj,
tu'n tkub' tpẍu'n toj kab'e' plaj!
17Ikxwe' knchq'a'ye'
tzmax ajtik'ju' ntx'u'jile',
Ayine' Dyos Manb'aj ẍin q'mante.
18Tzaj yolin Qman Dyos weye', tma:
19B'inchanku'ya tilb'ilal kab'e' b'e, tu'n tb'ent tik'ju' nimaqkawil aj B'ab'ilon tuk'i'l tk'uẍtx'e'nb'il. Axtzu' che eletza' kab'e' b'e tojxju' tx'otx', kb'el ttz'ib'a'na jun techel ja ktzajela' qe junjun b'e alkye nintnam kpomela.
20Ati tu'n tkub' ttz'ib'a'na jun b'e jak'ik'ela' nimaqkawil tuk'i'l tk'uẍtx'e'nb'il. Aye' nimaqtnamju' Rab'a kytanam aj Amon ex Jerusalen, ju' nintnam kuwsa'n ti'jile toj Juda.
21Matxi' kub'ten nimaqkawil aj B'ab'ilon janche tzaja qe'ju' kab'e' b'e, nxtulinti'j ex nxjelun kye tdyos, nche t-txiju'n talsmaj ex nb'aj tka'yi'n kychinaq' txkup.
22Matz'etzju' talsmaj toj tb'a'nq'ob' nxitye'ku'n Jerusalen, a ntma'nju' qa ati tu'n tq'ojin ti'j tuk'i'l q'ojb'il te xlik'pu'n ex tu'n tq'o'n chaq'b'il tu'n kyb'yet xjal, tu'n kyẍch'in te q'oji'n, tu'n tok q'oj kyi'ju' tjpel nintnam, tu'n tjaw kyb'incha'n kyxwe'lil ex tu'n tb'aj txoli'n ti'jile.
23Naqtzun jun tpakb'al te chajyolil k'elela' toj kywitzju' aj Jerusalen, mana' kyejb'ent jun kyol tu'n kyb'inchante. Poqb'iltzun kyil te'lu, ex jun tqanil qa che tzyetel.
24Qu'mtzun inma'ne' ayine' Dyos Manb'aj: Q'ancha'l qe'ju' taq'wix ex b'yojxjali'n nche kyb'incha'ne'; mab'je'l q'ancha'lixju' il kyoju' kyb'inchb'aje'. Qu'mtzun che tzyetele'.
25Ex aya, nimaqkawil toj Israel, b'yolxjal b'inchal taq'wix, xi' tul lq'eju' kmuj tu'n tk'monteya b'ajsb'il tz'e'ysb'il twitza.
26Ayine' Dyos Manb'aj, kxe'l nma'ne': k'elel q'i'n jitz'b'il twi'ya ex tkorona, ex tkyaqil kch'exb'etel; aju' ati kub'l kjawix jawtl, atzu'n ati jawtl kb'el kub'l.
27Tkyaqil kjel xitjnitl wu'ne', majx kjel xitj. Atzu'n lu kjapumel ajxi' tulju' q'o'n toklen wu'ne' tu'n tb'inchante tnik'alilti'j.
Tz'e'ysb'il kywitz aj Amon28Yolina toj nb'iye' ichan, q'manxa kye aj Amon nche ilin kye aj Israel, qa matxi' jatzju' k'uẍtx'e'nb'il toj tja: Naq tkub'tl tu'n tb'iyun ex q'ib'unti'j tu'n tqoptz'aj ex tu'n t-xitun.
29Mya ax qe' kywitzik', ex chajyolilqe' kypakb'ab'l. Tzulju' k'uẍtx'e'nb'il ti'j kyqulju' b'inchal myab'a'n ex b'yolxjal lu. Matxi' tzul lq'eju' kmuj tu'n ttz'e'yset kywitz te b'ajsb'il.
30¡K'uẍtx'e'nb'il, kutanjtl ti'ja toj tjaya! K'okyela toj xjel wu'ne' jata'ya tnejel, toju' tx'otx' jai'tzjaya,
31ex tzul nq'o'ne' ntx'u'jile' tib'aja kse'n jun q'aq' kuwxi'x; kxel nq'o'na toj kyq'ob' xjal kuwqe' ex xitulqe'.
32Kb'el tz'e'ysa'na, kjel xitja; kb'el qojli tchk'ela toj tkyaqilju' tx'otx' ex mix-a'lo'tl ktzajel na'nteya. Ayine' Dyos Manb'aj, ẍin q'mante.
Who We AreWhat We EelieveWhat We Do
2025 by iamachristian.org,Inc All rights reserved.
