Jer 33 - Mam Ostuncalco Bible

Tqanil tu'n kyanq'in jumajtl b'a'n

1Tej jpu'nxtoq Jeremiy tpenju' xq'uqb'il, tzaj yolin jumajtl Qman Dyos te, tma ikjalu:

2Ayine' Dyos Manb'aj, nkub' b'inchante tx'otx', b'aj nb'incha'ne' ex kub' nkuwsa'ne' toju' tkb'el, kxe'l nma'ne' teya:

3Chin ttxkoma ex kxel ntzaq'we'na, ex kxe'l nma'ne' kyqanil nimaq ti'xti' te lab'te'n teya, ju' min kanli twitza.

4-5Ayine' Dyos Manb'aj nche ajb'en aj Israel weye', ati jun tqanil wu'ne' kyi'ju' ja toj Jerusalen ex kyi'ju' kyja nimaqkawil toj Juda che b'ajel xitj. Qama che exe' q'ojil kyi'ju' kaldey b'incha'ntl kyxwe'lil te kyq'ojb'il ti'ju' nintnam lu, naq tu'n kykyaj txqan kyimni. Knb'incha'ye' tu'n kyb'aje' tu'nju' nin nq'oje kyi'je', qu'n matxi' txinmiltz'u'n tze'lwi'je' teju' nintnam lu tu'n tpaju' txqan kyb'inchb'aje' myab'a'n.

6Oktzun che nq'ana'tle', che q'anetele' ex knb'incha'ye' tu'n kytzalaje' toj jun kychwinqlale' b'a'n ex nak'b'il.

7Knch'exb'etle' kyanq'ib'l aj Juda ex aj Israel, ex che jawil nb'incha'n jumajtle' tu'n kyten kse'n tnejel.

8Che nẍtilsa'ye' te tkyaqilju' kyil b'aj kyb'incha'n nwitze', kb'el nnajsa'ne' tkyaqilju' kyb'inchb'aj myab'a'n ex tu'n ẍe okmiltz'uj wi'je'.

9Tzalajb'il k'okyela' Jerusalen weye', ktenb'el toklen ex ninb'ilte kywitz kykyaqil nimaqtnam twitz tx'otx'. Ajkyb'inte tqanil tkyaqilju' b'a'n ktzajel nq'o'ne' kyeju' najlqe' toj Jerusalen, ex ajkyxi' twitz jawl wu'ne', che xob'el, chi Qman Dyos.

10Ex tma Qman Dyos kjalu:

Inkyma'ne' qa chq'ajlaju' tx'otx' lu ex mixti'qe' xjal ex txkup najlqe' toj, ex mixti'xte ati kyoju' b'e toj Jerusalen ex kyoju' nimaqtnam toj Juda; ex mixti'xte xjal ex txkup kyoj. Oktzun che b'injtzel jumajtlkye'

11b'itz te ninq'ij ex tzalajb'il, ex kyb'itzju' ch'inxtl kymje, ex kb'injtzel ajkyb'itzante kjalu: Kyq'onx chjonteye' te Qman Dyos nimtipumal, qu'n b'a'n te Qman Dyos, tejumajxju' tk'u'jlalil. Ex kb'ajtzajel q'i'n oyaj te aq'b'il chjonte toju' ja te k'u'lb'il. Iku', knch'exb'eye' tanq'ib'lju' tnam lu, tu'n kyoktl kse'n tnejel. Ayine' Dyos Manb'aj nchin yolin, chi Dyos.

12Intma'n Qman Dyos nimtipumal ikjalu:

Ktenb'el jumajtl kywa alu'mj toju' tx'otx' lu, ju' chq'ajlaj ja'lo, mixti'qe' xjal ex txkup toj, ex kyoj kykyaqil nimaqtnam toj, jaxjaku' mache'xa' kyiq'i'n k'ik'lel kyalu'n ktenb'el kywa.

13Che tenb'el jumajtl k'ik'lel ajlal kyrit Kyoju' nimaqtnam kywi' witz ex kyoj plan tx'otx', kyoj nimaqtnam toj Nekeb', toj kytx'otx' tyajajil B'enjamin, ti'jile Jerusalen ex kyoju' txqantl nimaqtnam toj Juda. Ayine' Dyos Manb'aj nchin yolin, chi Dyos.

14Intma'n Qman Dyos kjalu:

Kpomel jun q'ij che japumelju' nyole' ntziyaye' tu'n kyky'i'wlet aj Israel ex aj Juda.

15Ajtjapunju' tq'ijlalil lu, knb'incha'ye' tu'n tten jun tyajajilxi'x Dab'i, kb'eltq'o'n tnik'alilti'j ex ttxolilxi'xti'j toju' nintnam.

16Che kletel aj Juda toju' tq'ijlalil lu ex che tenb'el aj Jerusalen toj q'uq'li tku'jlalil. A tb'iju' k'okyel kyq'o'n kjalu: Tu'nte Qman Dyos nqo kanb'ana'.

17Ayine' Dyos Manb'aj, a in nma'nju'ye': Ktenb'el jun tyajajil Dab'i kukxju' toju' kawb'il toj Israel,

18ex che tenb'el pale kukxju' kyxol tyajajil Leb'i tu'n kyq'onte chojb'il k'ok'sb'il nwitze' tkyaqil q'ij, tu'n kytz'e'ysante oyaj kywitz awal k'ok'e'kywitz te ninb'ilweye' ex tu'n tkub' kyq'o'n txqantl chojb'il nwitze', chi Dyos.

19Tzaj yolin Qman Dyos te Jeremiy ex tma:

20Kxe'l nma'ne' ayine' Dyos Manb'aj: Min nkub' xitjwe' nyol kyejni b'entti'j ti'ju' q'ij ex qonik'an, inul kanunte' q'ijtl ex qonik'an tojxju' kmoj te.

21Ikxtzun nyolju'ye' kyejni b'entti'j tuk'i'l nmajine' Dab'i, ex ilti'j ktenb'el jun tyajajil toju' oklenj te tkawil, mujqa tu'n tjapunju' nyole' kyej b'entti'j kyuk'i'l pale aj Leb'i ajb'elqe' weye'.

22Ex che chmetelju' tyajajil Dab'i nmajine', exqe' ajb'el weye', e'aj Leb'i, kse'n kyajlal che'w twitz kya'j ex se'n tz'awun ttzi ninnjab', layx b'ent kyajlet, chi Dyos.

23Tzaj yolin Dyos te Jeremiy ex tma:

24¿Ma matxi' tila qa inkyma'n xjal qa matxi' che elkyik'o'n kab'e' ja xjal, ju' ayinku'ye' ẍin jaw sk'onkye, aye' aj Israel ex aj Juda? ¡Qu'mtzun nche elkyik'o'n ntaname', ex min nokkyq'o'ntl te nintnam!

25Ayine' Dyos Manb'aj, kxe'l nma'ne' kjalu: Ayine', kyejb'ent jun nyole' ti'ju' q'ijtl ex q'onik'a, ex oje che kub' nq'o'ne' kawb'il kawilteju' kya'j ex tx'otx',

26layx che elwik'o'nwe' kyyajajil Jakob' ex nmajine' Dab'i, ex che eletz kawil wu'ne' kyxolju' kyyajajil Ab'raam, Isaak ex Jakob'. Qu'n ktzajel q'aq'an nk'u'je' kyi'j ex knch'exb'eye' kyanq'ib'l, chi Dyos.