Dn 6 - Mam Ostuncalco Bible

Okxq'o'n Danyel toj kyjul b'alun

1E'oktq'on nimaqkawil Dariy qaqnaq (120) kawil tu'n kykawin toj junjun tnej tx'otx' toj tkyaqilju' tkawb'il.

2Kyib'ajtzuntl ja'lu e'oktq'o'n oxe'tl nejenel, tu'n kyka'yinte kyaq'unju' kawil, tu'ntzun mitzaja' jun taq'wix ti'ju' nimaqkawil. Kyxoltzunju' nejenel lu atoq jun Danyel.

3Lwiyxi'xtzun el tnik'tzil Danyel kyxolju' nejenel tu'nju' taq'unb'en; qu'mtzun okq'o'n toklen nimxi'xtl kyib'aju' nejenel toj tkyaqilju' nimaqkawb'il toju' nintnam.

4Aye'tzu'n nejenel kyuk'i'lju' kawil kyjoy tu'me'l tu'n kypoqonte Danyel qa myab'a'n kawin, atzunte Danyel, tnik'alna'ti'j, mixti'x elyal jun til ex jun taq'wix ti'j kyu'n; qu'mtzun mixti'te jun ti'xti' ajb'en kyu'n tu'n kypoqonte.

5Mixti'x ik'tna'l kyu'n, ex kyma: Layx knet jun tu'me'l qu'n tu'n tpoqet Danyel toju' taq'un, atzu' kb'ela' tz'aqte' ti'ju' tokslab'l, chechij.

6B'enttzun ti'jtz kyu'n nejenel kyuk'i'lju' kawil tu'n kyxi' yolil tuk'i'l nimaqkawil Dariy, tetzunj kypon xikyma'n te:

—¡Jawxwit nima'na nimaqkawil tejumajx!

7Mab'aj qb'u'yi'n qib'e' qkyaqile', nejenel exqe' kawil toj tkyaqilju' nintnam, ex makyej b'entti'j qu'ne' tu'n txiqma'ne' qa jaku' tz'etz tq'o'na jun chaq'b'il toj tkyaqilju' nintkawb'ila ikjalu: toju' junaq lajoj (30) q'ij, mix-a'lo' kk'ulul te jun dyos mujqa te jun ichan, qa mya teya nimaqkawil. Alkyetzunte min xtb'incha ikju' ati tu'n tokx xoyit toj kyjul b'alun.

8Qu'mtzun q'mama qa b'a'n ex sqitunka tb'iya ti'ju' chaq'b'il lu nimaqkawil, tu'ntzun lay ch'exb'et kse'nxju' kykawb'il aj Medo ex aj Persya, tu'n lalun kub' najsa'n, chechij.

9Oktzun t-sqitu'n nimaqkawil Dariy tb'i ti'ju' chaq'b'il.

10Tetzunj tb'inte Danyel qa matxi'toq tz'ok t-sqitu'n nimaqkawil tb'i ti'ju' chaq'b'il, xi' tja, ex eb'aj tjqo'n tokix t-spik'un tja janktana' ate'toq tu'me'lju' tnam Jerusalen, kub' mejetzuntz na'l Dyos ex k'ulul. Oxmajtoq nk'ulun atl junjun q'ij, kse'nxju' intoq tb'incha'n kukxju'.

11E'pontzu'n ichan lu ka'yilte Danyel tja ex elyal kyu'n intoq na'n Dyos.

12Eb'ajxtzuntz yolil tuk'i'l nimaqkawil ti'ju' chaq'b'il ex xikyma'n te:

—Matxi' tz'ex tq'o'na chaq'b'il nimaqkawil, qa ati jun mak'ulun twitz juntl dyos mujqa twitz juntl xjal, qa mya teya nimaqkawil toju' junaq lajoj (30) q'ij, k'okyex xoyit toju' kyjul b'alun, ¿ikyju' mujqa mya nimaqkawil,? chechij te.

—Ikyna'tzu'n. Ilti'j tu'n tjapunju' chaq'b'il kse'nxju' kykawb'il aj Medo ex aj Persya, ex mixti' tu'n tkub' xitet, chiju' nimaqkawil xittzaq'we'n kye.

13E'oktentzuntz q'malte kjalu:

—Ate Danyel, kxolju' aj Juda e'tzajni iq'et toj kytanam, min nokslan teya nimaqkawil ex min nxitnima'nju' chaq'b'il extq'o'na, matxi' qile' inx na'n Dyos oxmaj toj jun q'ij, chechij.

14Tetzunj tb'inte nimaqkawil ja'lu, majx kyej b'isun, ex tjoy tu'me'l tu'n tklet Danyel. Oktilil tu'n tzmax tex q'ij,

15aye'tzu'n ichan lu e'pon tojuntl q'ij twitz nimaqkawil ex xikyma'n te:

—B'i'nata tu'n nimaqkawil kse'n kykawb'il aj Medo ex aj Persya, mixti' jun chaq'b'il toktl tb'i nimaqkawil ti'j okwit kb'el xitj, chechij te.

16Tchaq'tzun nimaqkawil tu'n ttzaj q'i'n Danyel ex tu'n tokxq'o'n toj kyjul b'alun. Tetzunj na'mxtoq tb'inchanjtz, xitma'n nimaqkawil te Danyel:

—¡Awtju' Tdyosa nk'uluna kukxju' te, klonteya,! chij te.

17Tetzunj tokx xon Danyel toj jul, tzaj q'i'n jun ab'j ex kub' q'o'n ttzi jul, kub'tzun t-seyari'n nimaqkawil tu'n t-sey te oklenj ex tuk'i'l kyseyju' nimaq kyoklen nche kawin tuk'i'l, tu'ntzun tjapunju' kawb'il ti'j Danyel kse'nxju' tz'ib'a'n toj kawb'il.

18Xi'tzun nimaqkawiltz toju' tja, xi' wtal ex mixti'x wan, ex min taj tu'n kytzaj q'i'n chnab' twitz; mixti'x oktwatl toju' qonik'an lu.

19Naqtzun nqo' sqix jawe' ex xi' ojqel ka'yilte Danyel toju' kyjul b'alun.

20Xi'toqtzu'n tpon nimaqkawil tk'etzju' jul inxi'xtoq b'isun, xiẍch'i'n te Danyel kjalu:

—Danyel tmajen Dyos itz', ¿ma makleta toj kytzi b'alun tu'n Dyos, jank'uluna'ya kukxju'?, chij.

21Atzunte Danyel tzaj ttzaq'we'n:

—¡Nimanjtzxwita nimaqkawil tejumajx!

22Matzajtchq'o'n Dyos tanjl ex matmaq kytzi b'alun tu'n lalun chinx kych'yo'ne', qu'n b'i'n tu'nte' Dyos mixti'we' wil, expena' mixti' jun ti'xti' taq'wix matxi'wt nb'inchaye' teya nimaqkawil, chij.

23Majxtzun jaw tzalaju' nimaqkawil tej t-xitb'i'n tjaw yolin Danyel, ex tchaq' tu'n tetz q'i'n Danyel toj jul. Tetzunj tetz q'i'n, mixti' elyal jun k'ixb'len ti'j qu'n okqe tk'u'j ti'j Dyos.

24Tchaq'tzun nimaqkawiltz tu'n kytzaj txko'nju' ichan eb'ajx poqonte Danyel, kyuk'i'lxi' kyxu'jil ex kyk'wal, e'okx xontzuntz toju' kyjul b'alun; na'mxtoqtzun kyokpun tojxi' jul tej kyjatz lipanju' b'alun kyi'j, majx b'aj kytoqi'n kyb'aqil ex eb'aj kytzaqu'n.

25Xi'tzun ttz'ib'a'n nimaqkawil Dariy kye xjal kyoj kykyaqil tnam ex chukchaq kyol, toj tkyaqilju' tx'otx' tzyu'ntoq tu'n, ikjalu: Tenxwit nak'b'il kyxole' ex che tenxwite' b'a'n,

26kykyaqile' ate'qe'ye' tjaq' nkawb'ile', che okslanqe'ye' ex che nimane' teju' Tdyos Danyel.

Qu'n ate Dyos itz',

ex ati tejumajx.

Layx kub' xitju' tkawb'il

mixti' b'ajsb'il teju' tipumal.

27Inkolon ex nq'on tzaqpilb'l;

intb'incha'n techlal te lab'te'n

toj kya'j ex twitz tx'otx'.

Maklet Danyel tu'n toj kytzi b'alun, chij.

28Ikytzu'n tena' Danyel te nimaq toklen toju' tkawb'il Dariy, ex toj tkawb'il Siro, nimaqkawil aj Persya.