Pr 22 - Mam Ostuncalco Bible

1Ate' tb'anilxi'xju' aju' b'a'n qb'injtz kyetwitz ati txqan qq'inumal,

exju' qyolinjtz kyetwitz txqan q'anpwaq ex saqpwaq.

2Junx kyoklenju' q'inun exju' prow

qu'n a Qman Dyos b'inchankye kykab'il.

3Aju' ati tnab'l ajtkub' tq'o'ntib' jun ti'xti' toj tb'e te joyb'ilti'j inximan nejtl ex inel tpa'ntib' ti'j;

atzunte' mixti' tnab'l mixti'x inximan ex ajtna'nte atitl toj yajb'il.

4Aju' me'sb'il exju' ninb'ilte Dyos

inche tzaj tq'o'n oyaj, q'inumal, chwinqlal ex oklenj.

5Aju' xjal b'inchal myab'a'n nim ti'xti' taq'wix tkub' toj tb'e;

atzunju' intk'u'jla'n tchwinqlal in kumin te tkyaqil lu.

6Xnaq'tzamju'ya k'wal tu'n b'a'n nab'l kyoju' tq'ijlalil ja'lo,

kse'nku'tzun aj ttijin lay tz'el tpa'ntib' ti'j.

7Kxolju' prowqe', ate' q'inun in kawin;

exju' ajk'as nnok te tmajenju' q'ol majen.

8Alkyete nb'inchan taq'wix ex taq'wixil ktk'ma' te tu'me'l t-xel;

¡ate Dyos kb'el xitunte tu'n ttze te oklenj tk'i' ttx'u'jil!

9K'i'wla'nte' xjal inlaqjtk'u'j ti'j juntl

ex tu'nju' inkub' taq'pun twa kxolju' prow.

10Xla'jamixju'ya xjal kuw xmayin, kse'nku'tzun mixti'tl xitb'il kxole'

ex tu'n tb'aj ju' ik'jtib'il ex q'oj.

11Nche tk'u'jla'n nimaqkawilju' xjal ẍtilun kyanmi,

ex nokju' xjal nyolin tuk'i'l aq'b'il chjonte te tuk'i'l.

12Ate Dyos nxq'uqin ti'ju' xjal ati tnab'l

ex inb'aj tchuksa'n kximju' b'inchal myab'a'n, ju' in kyej b'entti'j kyu'n.

13aju' ky'aj noqx tu'n lalun tz'aq'unan inkub' t-xima'n txqan ti'xti'

lay chinxwe' aq'unal qu'n qaj sokyal jun b'alun nwitze' ex jaku' chinxtch'yo'ne'.

14Iky ttzi qya ajpajil kse'n jun xoch nimin t-xe

janche b'ajku'x tz'aqa' xjal intx'u'jin Dyos kyi'j.

15Xnakil ati toj tanmiju' ku'xun,

oktzun k'elil tu'n jun tzak'b'il tk'i' asyal.

16Alkyete' inkub' tyaju'n prow noqx tu'n tjaw q'inumax

mujqa matz'onin tuk'i'lju' q'inun kb'el prowix.

Aye' junaq lajoj q'unb'en kyu'n ati kynab'l

17Q'ontza anb'il ex b'inku'ya q'unb'en kyu'n ati kynab'l;

ximana ti'ju' kxe'l nxnaq'tza'ne' teya.

18Ktzalajela ti'j qama tk'u'ya toj tnab'la

ex tu'n tb'ent tjaw tma'na kse'n nojqelan.

19Che kxe'l nchik'b'a'ne' teya ja'lo

tu'n tokqe tk'u'ja ti'j Qman Dyos.

20E'kub' ntz'ib'a'ne' junaqlajoj q'unb'en teya

ati nab'l ex ojtzqib'l kyoj,

21Tu'n t-xnaq'tzeta tu'n teltnik'a ti'ju' ax,

tu'ntzun tq'onteya jun b'a'n tqanil te jun xjal qama tqani teya.

- 1 -

22Lalun kub' t-sb'u'na prow naq tu'n toj tq'ob'a ta',

ex lalun kub' tyaju'na xjal mixti' klolte kywitz ajkawil.

23qu'n aku' Qman Dyos kklolte

ex che b'eltyaju'nju' xjal ate'k yajulte.

- 2 -

24Lalun tz'uk'ilana kyuk'ilju' kuw kytx'u'jil

ex lalun b'eta junx kyuk'i'lju' mya'lqe'.

25qu'n jaku' tz'el tkno'na tu'me'l kse'n che anq'in myab'a'n

ex jaku' axa kub'jtz'onte tqula.

- 3 -

26Lalun kyej tq'o'ntib'a

tjaq' tk'as juntl xjal,

27qana' mixti'tl tu'me'l tu'n tchjet tu'na,

expe' jaku' tz'el iq'i'n tkuẍb'ila te chojb'ilte.

- 4 -

28Lalun tch'exb'eju'ya nqach

ju' kyejni q'o'n kyu'n ojtxi' tchmana.

- 5 -

29Alkyete ntb'incha'n taq'un b'a'n,

ktenb'el ajb'el kye nimaqkawil

mya ajb'el te jun xjalxi'.