Ez 31 - Mam Ostuncalco Bible

Naku'j jun k'ute paraon

1Tzaj yolin Qman Dyos weye' toj jun tajlal toxi'n xjaw te junlajoj (11) ab'q'i, ex tma:

2Q'manxa te Paraon nimaqkawil toj Ejipt, ex kye kykyaqilju' t-xjal:

¿Alquk'i'l b'a'n tmujb'eta' toklena nimxi'x?

3Ikju'ya kse'n jun tzis mujqa jun k'ute toj Lib'ano,

ate' tq'ob' tb'anilqe' tuk'i'l kyxlekumal tib'aju' k'ul,

nimxi'x twe' njapun tunun toj muj.

4Eb'aj ch'iy tu'n jb'al ex a' twitz tx'otx';

mache b'jawb'ent nin a' ti'jele

ja awa'na'toq;

e'ak'set kykyaqil tze toju' tx'otx' kyu'n a'.

5Ch'iyxi'x kyekywitz txqantl tze toju' k'ul

qu'n nim a' ati te,

mache chmetju' tq'ob' ex eb'ajch'iy.

6B'aj kyb'incha'n tkyaqil ch'ix pich'

kypaqb'il kyxolju' tq'ob';

ex tkyaqil ch'ix tojk'ul txkup

nche b'aj alan kyjaq'ju' tq'ob'.

Kb'antel kyanq'in txqan nimaqtnam

tjaq'ju' t-xlekumal.

7Juntoq nin tze tb'anilxi'x,

e' tq'ob' nimaq kywe',

ate'toq tlok' tk'etz nim a'.

8Mixti'x jun k'ute toju' tawal Dyos

ikwitju' kse'nte;

mixti' jun tzaj atitoqwit tq'ob' kse'nte,

mixti' jun tze kastany atiwt txqan t-xaq,

mixti' jun tze toju' tawal Dyos

xa'wanku'xi'xwit kse'nte.

9Tb'anilxi'x kyuk'i'l txqan tq'ob'

e'kub' nb'incha'ne';

nche tx'u'jin txqantl tze toj tawal Dyos ti'j.

10Chite Qman Dyos kjalu:

Ch'iyxi'xte' tze nimin twe', japun tunun toj muj; ch'iyxi'x ex jaw tnima'ntib'.

11Qu'mtzun matxi' tz'el wik'u'ne'; kjel nq'o'ne' tu'n tkub'ti'j tu'n jun nejenel najchaq xjal, kb'inchanjtzel te se'nxju' til xtb'incha.

12Kb'el tx'emu'n kyu'n najchaq xjal txkupqe'xi'x ex kjel koli'n; che kb'el tz'aqju' tq'ob' toqjniqe'tl kywi' kykyaqil witz, kyoj b'ya' ex kyoj a' toju' tx'otx', ex che xe'l oq kykyaqilju' tnam najlqe'toq tjaq' t-xlekumal ex kjel kykolb'e'n.

13Tkyaqil ch'ix pich' che b'ju'l najal kyxol tq'ob'ju' tze kub'ni tz'aq, ex tkyaqil ch'ix tojk'ul txkup te chukchaq kyyajajil che b'ju'l paqeb'il kyxolju' tq'ob'.

14Ex lay ch'iy juntl tze nimxi'x, b'a'nqa ati tk'etz a', ex maskyepe' a'li'n, okwit japumetl tunun jata' muj ex lay ch'iy twe' nim. Kykyaqil che kxe'lq'o'n tu'n kykyim, tu'n kyku'x toju' juntl anq'ib'l tjaq' tx'otx' tu'n kypon kyuk'i'lju' ate'tl toj muqb'il.

15Ayine' Dyos Manb'aj nchin yolin: ajtku'xju' tze toj tkawil kamik, knb'incha'ye' tu'n ttzqi'ju' ninnjab' nim t-xe tu'n b'is; che web'elju' nimaq a' exqe' a' nche b'et; tu'nte knb'incha'ye' tu'n tkyaju' witz Lib'ano toj b'is ex che b'eltzqij kykyaqilju' tze toj k'ul.

16Ajtku'x wu'ne' toj tkawb'il kamik tu'n tten kyuk'ilju' oje che kyim, che lu'lulju' nimaqtnam ajkyb'inte tq'ojq'ojel ajtkub' tz'aq. Ex atzu' kqeb'ela' kyk'u'ju' tze toj Eden toju' anq'ib'l tjaq' tx'otx', ju' xa'wanqeku'xi'x ex a'li'nxi'x kyxe twi' witz Lib'ano.

17Ex ikxkye che b'elix kse'nte, toj tkawb'il kamik, tu'n kypon kyk'etzju' eb'aj kyim toj q'oj. Aye'tzu'n ntoq che anq'in tjaq' t-xlekumal, che b'ajex sputj kyoju' nimaqtnam.

18Mixti' jun tze toj Eden ikywitju' kse'nte tu'nju' xa'wanku'xi'x ex nimin twe'; tu'npetzunju', kb'elex kyuk'ilju' txqantl tze toj Eden, toju' anq'ib'l tjaq' tx'otx', tu'n tnajan kyxol xjal min nche niman te Dyos, kyxolju' xjal e'kyim toj q'oj.

Ate' tze a paraon kyuk'i'l kykyaqilju' t-xjal, ayine' Dyos Manb'aj, nchin yolin, chi Dyos.