Is 35 - Mam Ostuncalco Bible

K'anjetz ti'ju' tnam Syon

1Tzalajxju' chq'ajlaj, ju' tzqij tx'otx';

tzalajxwit b'a'nxi'x, tz'ub'chinxwit,

2tzajxwit b'ech twitz kse'n liryo,

tzalajxwit b'a'nxi'x.

Ktb'incha' Qman Dyos xa'wankuxi'x kse'n Lib'ano,

tb'anil tx'otx' kse'n Karmelo ex kse'n b'ya' Saron.

Kykyaqil che ka'yilte tajwalil Dyos,

ex toklen Qman Dyos.

3Che kykuwsame' mixti' kyipumal,

kyoninqe'xe' siktniqe',

4kymanxe' kyeju' nche xob':

¡Kuwqe'xe', lalun che xob'e'!

¡Luna'te' Qman Dyos ati klolkyeye',

ex kb'el ttz'e'ysa'n kywitzju' kyajq'oje' kse'nxju' kyil!, chechiku'ye' kye.

5Che ka'yiltzun moẍtz

ex che b'ilju' min nche b'in;

6che xlik'pulju' tzkaj kse'nqe' msat,

exqe' me che ẍch'il.

Kpoq'chajel a' tuk'i'l tipumal

toju' chq'ajlaj, tzqij tx'otx'.

7K'okyelju' chq'ajlaj te njab',

knojel toju' tzqij tx'otx' kyu'n kyxiklil a'.

Kb'ajel ch'iy ptz'an ex ajlaj

ja najlqe' xo'j ja'lo.

8Ex ktenb'el jun ninb'e atzu'

a tb'iju' k'okyel: xjan b'e.

Lay che'xju' mya ẍtilsa'nkyib' toj,

lay che b'etkye' xnakqe' toj.

9Lay che ten b'alun atzu'

ex lay che pon lq'eju' tojk'ul txkup.

Toju' b'e lu k'anjetza'kyi'ju' tzaqpi'nqe'tl,

10aye' matxi' che tkol Qman Dyos;

che okyex toj Syon nche b'itzan tuk'i'l tzalajb'il,

ex che anq'in toj tzalajb'il kukxju'.

Knetel tzalajb'il ex nak'b'il kyu'n,

mixti'tlte oq'e'n ex k'ixk'oj kb'ajel.