Jue 11 - Mam Ostuncalco Bible

Ok Jepte te nejenel

1Atzunte Jepte kuwtoq q'ojin, najlitoq toju' tx'otx' Kalaad. Tal jun qya ajpajil ex tk'wal jun ichan Kalaad tb'i,

2tu'ntzunju' ate'toq jte'tl tk'wal Kalaad tuk'i'lju' t-xu'jil, tej kych'iy ex kyxla'ja'n Jepte ex xikyma'n te qa mixtoqti' toklen ti'ju' etzb'il tu'n tman, qu'n talna' juntl qya.

3Kub'tzun oq Jepte kywitzju' ttzik ex titz'in, ex xi' najal toju' tx'otx' Tob', jaeb'aja' tb'u'yina' jun tnej xjal b'iyolqe', intoq che ex tuk'i'l b'inchal taq'wixil.

4Tetzunj tb'et q'ij e'q'ojin aj Amon kyi'ju' aj Israel,

5kychaq'tzun nejenel te Kalaad ttxokli Jepte najlitoq toju' tx'otx' Tob',

6ex xikyma'n te:

—Kutzaja quk'i'le', qajb'ile' tu'n toka te nejenel qeye' toj q'oj kyi'ju' aj Amon, chechij.

7Atzunte Jepte xittzaq'we'n kye:

Ik'u'nqinawe' kyu'ne', expena' inetz kyxla'ja'ne' toj tja nmane'. ¿Ma tzmaxitzun ẍe ule' jyolweye' ja'lo tej ẍe oke' toj tch'uẍal? chij.

8Aye'tzunkye xikytzaq'we'n ikjalu:

—Apena'tzu'n ato'qo'ye' toj jun tch'uẍal maqo tzaje' jyolteya, qajb'ile' tu'n ttzaja quk'i'le' q'ojil kyi'ju' aj Amon, ex tu'n toka nejenel qeye' qkyaqile' najlqo'ye' toj Kalaad, chechij.

9—Qatzun kyajb'ile' tu'n tanjwi'je' q'ojil kyi'j aj Amon, exqa machin kanb'ane' kyi'j tu'n Qman Dyos, chin kjeltzuntze' te kynejele', chi Jepte xittzaq'we'n kye.

10Aye'tzunju' nejenel xikytzaq'we'n kjalu:

—Lu Qman Dyos nka'yin, kqb'incha'qe' tkyaqilju' matxi' tmaya, chechij.

11Xi'tzun Jepte kyuk'i'l, ex okq'o'n te nejenel kyu'n tnam. Xitma'n jumajtl Jepte toj Mispa twitz Qman Dyos kse'nxju' tqani tnejel.

12Xit-sma'ntzun junjun sanjelaltz qanilte teju' nimaqkawil kye aj Amon kjalu: ¿Titi' tq'oja wi'je', tu'nju' xtzaja q'ojil ti'ju' ntaname'? chij.

13Atzunju' nimaqkawil kye aj Amon tzaj ttzaq'we'n kyeju' t-sanjelal Jepte: Tej kyetze' aye'ye' aj Israel toj Ejipt, el kyalq'a'ne' qtx'otx'e', tzajx ttzi a' Arnon ex ponx kytzi nin a' Jab'ok ex Jordan. Ja'lotzun kyanjsanjtz ti'je' toj b'anil, chij.

14Atzunte Jepte exi' tchq'o'n junjuntl t-sanjelal q'malte teju' nimaqkawil kye aj Amon,

15kjalu: Chitzun Jepte qa ayo'qe' aj Israelqo'ye', b'ajx tz'ela' qiq'i'nqe' kytx'otx' aj Moab' ex kytx'otx' aj Amon.

16Tej qetze' Ejipt, xi' o'ik'a'ye' toj chq'ajlaj tu'n qpone' ttzi Kyaq Ninnjab', ex opon kanune' tzmax Kades.

17Exi'tzun qchq'o'ne' junjun sanjelal qanilte teju' nimaqkawil te Edom, tu'n ttzaj tq'o'n anb'il tu'n qik'e' kyoju' ttx'otx', atzunte min taj. Ex xiqqani'ne' teju' nimaqkawil te Moab', ex ikxte min taj tu'n qik'e'. Qu'mtzun o'kyajtene' Kades.

18Yajxi'tzuntel ob'ete' toj chq'ajlaj, okumane' ti'jile kytx'otx' aj Edom ex aj Moab', tzmax qpone' toj tjawetzq'ij te Moab', okub'tentzuntze' atzu', jlajxi' nin a' Arnon. Mixtzunti' o'ik'xe' toj, qu'n atoqtzu' ntzyeta' kytx'otx' aj Moab'.

19Exi'tzun qchq'o'ne' junjun sanjelal qanilte te Seon, nimaqkawil kye amorey toj Esb'on, tu'n ttzaj tq'o'n anb'il tu'n qik'e' toju' ttx'otx', tu'n qpone' toju' qtx'otx'e'.

20Atzunte Seon min qe tk'u'j qi'je' ex min taj tu'n qik'e' toju' ttx'otx'; e'tzajpe' tb'u'yi'n kykyaqilju' t-xjal te q'oj, e'kub'ten Jaas, e'oktzaqpajtzuntz q'ojil qi'je'.

21Atzunte Qman Dyos, taq' tu'n tkub'ti'j Seon kyuk'i'lxi' t-xjal te q'oj qu'ne', kub' qtzyu'ntzuntze' tkyaqilju' kytx'otx' amorey toju' najb'il lu:

22Tkyaqilju' kytx'otx' amorey qtzuye', tzajx ttzi nin a' Arnon ex ponx ttzi nin a' Jab'ok, ex tzajx jata'ju' chq'ajlaj ex ponx ttzi nin a' Jordan.

23¿Tzun ja'lo ma tajb'ila tu'n teltiq'i'na eltiq'i'n Qman Dyos kye amorey ex tzaj tq'o'n qeye'?

24Ximankupe'ya, qama txiq'o'n jun ti'xti' teya tu'n Kyemos, tdyosa, ¿ma laytzun tz'oktetza'na? Ikxtzun qeju'ye' nokqq'o'ne' te qeye' aju' ntzaj tq'o'n Qman Dyos qeye'.

25¿Ma kuwxi'xtltzunta kyetwitz B'alak tk'wal Sipor, nimaqkawil aj Moab'? Mixpenati' ul te B'alak q'ojil qi'je'.

26Matxi' b'ent o'lajnaq (300) ab'q'i najliqo'ye' toj Esb'on, Aroer ex kyoju' najb'il nqaku' kyk'etz, ex kyoj kykyaqilju' nimaqtnam ttziyile a' Arnon; ¿tiqu'ntzun b'ajx tzaj kyqani'ne' tx'otx' toj tkyaqilju' tq'ijlalil lu?

27B'ajx nb'incha junwe' taq'wix ti'ja. A pena'ta qu'n in tzaja q'ojil qi'je'. Ate Qman Dyos ajkawil, ex ate kq'malte qa aye' aj Israel ati kypaj mujqa aye' aj Amon, chij.

28Tuk'i'lxi'pentzunju', min xib'i'n tyol Jepte tu'n nimaqkawil kye aj Amon.

Ttziya Jepte jun tyol tu'n tjapun tu'n

29Tentzun tipumal Jepte tu'n t-xew Qman Dyos, b'ajtzun tb'eti'n Jepte Kalaad ex Manases, ik' toj Mispa te Kalaad, tu'n tkub'ti'ju' kytx'otx' aj Amon tu'n.

30Ttziyatzun Jepte jun yol te Qman Dyos tu'n tjapun tu'n ikjalu: Qama chin kanb'ane' tu'na kyi'j aj Amon,

31aju' matz'etz nej k'molweye' toj njaye' ajtanjtz wi'je' toj q'oj, kxe'l nq'o'ne' te jun oyaj k'ok'sb'il teya, chij.

32Pontzun Jepte toj kytx'otx' aj Amon q'ojin kyi'j, ex kanb'an tu'n Qman Dyos.

33Nim ajq'oj e'kub' tb'yo'n Jepte, ex kub'kyi'j winqi'n nimaqtnam tu'n kyxol Aroer, Minit ex Ab'el-kyeramim. Iktzu'n kub'a' kyi'j aj Amon kyu'n aj Israel.

34Tetzunj tanjtzti'j Jepte tja toj Mispa, aju' jun tal tmyal etz k'lulte intoq b'ixin ex in tq'ajtza'n chilchil. O'kxtoq jun tal twitz tmyalju' ex mixti' juntl tk'wal.

35Qu'mtzun tej t-xi' tka'yi'n, kub' tlaqu'nju' t-xb'alun qu'n majx exch'yon toj tk'u'j, ex xitma'n te ikjalu: —¡nmyal, matxi' chin tak'e' tu'na! ¡ex aku'ya matxi' tz'ok te jun k'ixk'oj weye', qu'n matxi ntziya'ne' jun nyole' te Qman Dyos ex ilti'j tu'n tjapun wu'ne'! chij.

36Xi'tzun ttzaq'we'n tal tmyal:

—Ta, chin t-sema kse'n xitma'na te Qman Dyos, qu'n matxina' japunte' tu'n tu'nju' makanb'ana kyi'j aj Amon ju' tajq'oja.

37Naq o'kx b'inchama xtalb'il, q'ontza anb'il weye' tu'n nxi' kab'e' xjawe' b'etel kywi'witz kyuk'i'lju' wamiwe' t-xin, tu'n tkub' woq'je'ne' tu'n tpaj na'mxtoq nmjeye' ajnkyime', chij.

38Xi'tzun tq'o'n Jepte kab'e' xjaw anb'il te, tojtzunju' tq'ijlalil lu xi'ju' t-xin b'etil kywi'witz kyuk'i'lju' tuk'i'l, intoq oq' qu'n oktoq kyimel na'mxtoq tmje.

39Tb'ajlenxi'tzunju' tq'ijlalil lu anjti'j tk'etzju' tman, atzunte Jepte japunju' tyol xittziya'n te Qman Dyos. Kyimu' tmyal Jepte na'mxtoq tkub' kẍe jun ichan tuk'i'l.

40Qu'mtzun majx kyejten kyxol aj Israel tu'n kyb'ajx kyaje' q'iju' t-xin oq'el ti'ju' tmyal Jepte tkyaqil ab'q'i.