1Kub'tentzun Anatz na'l Dyos ikjalu:
Nchin tzalaje' tuk'i'l tkyaqil nk'u'je' ti'j Qman Dyos
qu'n intzaj tq'o'n wipumale'.
Kchin tze'le' ja'lo kyi'ju' wajq'oje
qu'n matxi' tz'onin wi'je'.
¡Ex inxi'x chin tzalaje'!
2¡Mix-a'lo'te jun xjan kse'n Qman Dyos!
¡Mix-a'lo' jun nkolon kse'n Qman Dyos!
¡Ex mixti' juntl ti'jxi'!
3Mix-a'lo' jun tu'n tyolin tuk'i'l nimjtib'il,
Mix-a'lo' jun tu'n tjaw tnimanxi'x tib',
qu'n o'kxte Qman Dyos b'ilte tkyaqil,
ate in mlonte ex nxjelun ti'j kyb'inchb'aj xjal.
4Inkub' t-xitu'n kysmaju' kuwqe',
ex ntzaj tq'o'n kyipumalju' numjniqe';
5Aye'ju' nimtoq kywa ati,
nxikyq'a' majina'kyib' ja'lo naq tu'n jun piẍ kywa;
aye'tzu'n intoq che q'aq'an, nim kywa ati ja'lo.
Aju' qya mixtoqti' nnalan, matxi' tz'alan wuq maj;
atzunju' nimtoq txqan tal, matxi'xi'x kub' b'aj.
6O'kxte Qman Dyos ntzaj q'onte ex nel q'inte chwinqlal;
nqo'x tiq'i'n toj muqb'il
ex nqo jatztiq'i'n.
7Tu'n Qman Dyos prowqo' mujqa q'inunqo';
in qo jaw tz'aq tu'n ex in qo jaw twab'a'n jumajtl.
8Injaw tiq'i'nte Qman Dyos prow twitz tx'otx'
ex njatz tiq'i'nju' nmon twa toj xob'l tz'is,
tu'n tkub' tq'uqb'a'n kyxol nimaqxjal
ex tu'n txi' tq'o'n nimaq toklen;
qu'n ate Qman Dyos tajaw tq'uqlilju' tx'otx',
ex kub' tq'o'nju' tx'otx' tib'aj.
9Inche t-xq'uqi'nju' nche niman te jaxjaku' mache'xa',
aye'tzunkye' b'inchal il nche kyim toj qxopin,
qu'n mix-a'lo' jun nkanb'an tu'nx tipumal,
10Che b'ajel tpink'u'nte Qman Dyos tajq'oj,
ex ktzajel tq'o'n q'ankyaq kyib'aj.
Che okyel kykyaqil xjal toj xjel tu'n Qman Dyos;
kxe'l tq'o'n tipumalju' nimaqkawil jawni t-sk'o'n
ex kch'iyelju' toklen tu'n, chi Ana toju' tb'itz.
11Anjtztzun Elkanatz tja toj Rama, atzunju' tal q'a kyejten ajb'el te Qman Dyos tjaq' tkawb'ilju' pale Elyi.
Kyil tk'wal Elyi12Ayeju' tk'wal Elyi pi'sqetoq twitz Qman Dyos ex mixtoqti' inche niman te,
13ex mixtoqti' in kyb'incha'nju' kyaq'un tojxi'x tu'me'l kse'n jun pale kyeju' tnam; qu'n ajtpon jun xjal tuk'i'l chojb'il, in pon jun kymajin tuk'i'l jun xokb'il chib'j, ex akxtoqtzun in tzq'aju' chib'j,
14inku'x tq'o'n xokb'il toju' k'wil, tkyaqiltzu'n ntzyet tu'n xokb'il, nxitiq'i'n teju' pale. Ayiletzun nkyb'incha'nju' kye kykyaqil aj Israel nche pon toj Silo.
15Expe' na'mxtoq tkub' tz'e'ysa'nju' unt tib'aju' q'olb'eb'l, in pon tmajenju' pale ex inxi' tma'n teju' inpon q'inte chojb'il: Q'ontza chib'j tu'n tk'a'set teju' pale; qu'n lay txi' tk'mo'nju' chib'j tzq'ajsa'n qa mya cha'x, chij.
16Qatzun matxi ttzaq'we'nju' tajaw chojb'il qa tnejel tu'n ttz'e'ysanteju' unt, exqa yajxi'tl b'a'n tu'n txi' tiq'i'nju' tajb'il, atzunju' tmajin pale inxi' ttzaq'we'n: ¡Mikxa'ju', ati tu'n ttzaj tq'o'na ja'lo! Qatzun min, k'elel nxk'a'yine' teya, chij.
17Qu'mtzun nimxi'xtoqju' il inkyb'incha'nju' ku'xun lu twitz Qman Dyos, qu'n mixti' toklenju' oyaj kye, ju' inche'x q'o'n te Qman Dyos.
18Atzunte' ku'xun Samwel kukxtoq tajb'enju' te Qman Dyos, ex oksa'nktoq jun t-ẍa'y sed.
19Tkyaqiltzun ab'q'i, inxitiq'i'n ttxu jun tal pinpa't b'o's ax b'inchalte, ajkyxi' q'ol chojb'il tuk'i'lju' tchmil toj tja Qman Dyos.
20Atzunte Elyi ntoq tqani'n b'a'n kyib'aj Elkana tuk'i'lju' t-xu'jil, kjalu: Awt Qman Dyos q'onte tu'me'l t-xel teya tu'nttzajq'o'ntl tk'wala ti'ju' t-xu'jila lu, te t-xelju' matxi' tzaj tq'o'na te Qman Dyos, chij. Nche anjtzuntz kyja,
21atzunte Qman Dyos intoq kub' tk'i'wla'n Ana, ex intoq kyej Ana ch'onwi'. E'itz'ji oxe'tl tal q'a ex kab'e' txin, atzunte Samwel intoq ch'iy twitz Qman Dyos.
22Matxitoqtzun tijinxi'x Elyi, ex b'i'ntoq tu'n titi' nkyb'incha'n tk'wal kyi'j aj Israel, expe' qa intoq che kub'kẍe kyuk'i'lju' qya ntoq che ajb'en ttziju' Ja te Mujb'ab'l tuk'i'l Qman Dyos.
23Qu'mtzun xitma'n Elyi kye tk'wal: Kykyaqil xjal nche tzaj q'mante weye' qa taq'wixju' txqan kyb'inchb'ene'. ¿Tiqu'n nkyb'incha'na'ye' ikju'?
24E'nk'wal, myab'a'nju' nb'i'ne' nkyoli'n ttanam Qman Dyos kyi'je'.
25Qa ati jun xjal matb'incha taq'wix ti'j juntl, ate Qman Dyos klolte; qatzun ati jun xjal matb'incha taq'wix ti'jku' Qman Dyos, ¿alxi'xkye klolte?, chij kye. Aye'tzunkye mixti'x xikyb'i'nju' kyman, qu'n matxi'toq kub' t-xima'n Qman Dyos tu'n kykub' tb'yo'n.
26Atzunte Samwel ljo'ntoq tch'iy, exju' tchwinqlal b'a'ntoq nela' toj twitz Qman Dyos ex toj kywitz xjal.
27Pon jun t-sanjelal Qman Dyos xb'etzalte Elyi toju' tq'ijlalil lu ex xitma'n te: Matxi' tma Qman Dyos ja'lu: Kub' nyek'u'n wib'e' b'a'nxi'x kywitzju' ojtxi' tyajilb'ena tej ntoq che ajb'en toj Ejipt te Paraon.
28Ex e'jaw nsk'o'ne' tu'n kyoke' te pale nwitze' kyxol kykyaqil tnej tyajajil Israel, tu'n tkub' kyq'o'ne' chojb'il k'ok'sb'il tib'aju' q'olb'eb'l weye', ex tu'n kytz'e'ysanteju'ye' sturak, ex tu'n tok kyoksa'ne' kyxb'alune' nwitze'. Expe' xinq'o'ne' kykyaqilju' chojb'il inkub' kyq'o'n aj Israel te ninb'ilweye' kyeju' ojtxi' tyajilb'ena.
29¿Tiqu'ntzun naqch'i'n kyoklenju' chojb'il ex oyaj kyu'ne' ju' oje nchaq'e' tu'n kyb'inchet? ¿tiqu'n aye'xi'x tk'wala nche'x tb'i'na kye nwitze', tu'n tetzkywitz kyu'nju' tb'anil kyoyaj ntaname' aj Israel?, chi Qman Dyos.
30Qu'mtzun chi Qman Dyos ja'lo: nmaye' qa k'ajb'ela weye' kukxju' exqe'ju' toj tjaya, atzu'n ja'lo mikxa'tlju'; che kjawil nnimsa'nwe' inche niman weye', aye'tzunju' nchinel kyik'o'ne' k'elel kych'ixaw. Ayine' Dyos Manb'aj inchin q'mante.
31Matxi' ponju' kmuj tu'n tkub' nxitu'ne' toklena ex kyoklenju' tyajilb'ena, ex mix-a'lo' junju' toj tjaya kb'el tijil.
32Ktzajel tb'isa ex ktzajel ttx'u'jila aj tka'yinteya tkyaqilju' b'a'n knb'incha'ye' toj Israel, atzu'n kyxolju' tyajajila mix-a'lo' jun ktijil.
33Oktzun kjel nq'o'ne' jun kyxolju' twitze'la nqayin tk'etzju' q'olb'eb'l weye', tu'ntzun ttzaj ttzitk'u'j tu'n ttx'u'jil, ex kykyaqilju' txqantl tyajajila che kb'el b'yo'n.
34Ktla'ya titi' kb'ajel kyi'ju' kab'e' tk'wala, Opni ex Pinees: kche kyimel kykab'il toj jun q'ijx.
35K'okyel nq'o'ntzuntze' jun pale b'a'n q'uqlixi'x nk'u'je' ti'j, ktb'incha'ju' wajb'ile' exju' b'a'n toj nwitze', che tenb'elju' tyajajil kukxju' ex k'okyel nq'o'ne' tu'n tajb'en kukxju' teju' nimaqkawil kjawil nsk'o'ne'.
36Aye'tzu'n mache kyej anq'in kyxolju' toj tjaya, che ul ex che b'eltzipe twitz tu'n jun saqpwaq mujqa tu'n jun piẍ wab'j, che kub'sal te tu'n txitq'o'n jun kyaq'un kyxolju' pale naqx tu'n jun kywa, chi Dyos, chiju' t-sanjelal Dyos te.
Who We AreWhat We EelieveWhat We Do
2025 by iamachristian.org,Inc All rights reserved.
