1Oje yolinte Qman Dyos nim toklen kyib'aj txqantl dyos;
oje txokon kyeju' xjal najlqe' twitz tx'otx'
toj tjawetzq'ij ex tkub'exq'ij.
2In qoptz'ajte' Qman Dyos tzmax Syon,
ju' nintnam tb'anilxi'x ka'yin.
3Tzulte' Qman Dyos, mya toj ewaj:
nejli jun q'aq' xitul twitz;
atzu'n ti'jile jun nin kyq'iq' tk'i' q'ankyaq.
4Ntxokon Qman Dyos tzmax jawl teju' kya'j ex te tx'otx'
tu'n kyka'yinteju' xitb'il tib'aju' ttanam:
5Kyb'uyinqe'tze' kykyaqilju' njapun nyole' kyu'n,
aye' oje kyej b'entti'j kyyol wuk'i'le'
tej tkub' kyq'o'n chojb'il nwitze'. Chij
6Atzu'n kya'j nyek'u'nte qa a Qman Dyos ajkawil tz'aqli.
7B'intza Israel, ntanam;
tkyaqilju' ti'xti' kb'ajxel nma'ne' tplaja.
¡Ayinwe' Dyos Manb'aj!
8Min ntzak'u'na tu'n kpaju' chojb'il ex chojb'il k'ok'sb'il
nche kub' tq'o'na weye' kukxju'.
9Min nche'x nqanine' tal tman twakyixa
ex tman tchib'a ate' toj tch'laja,
10qu'n weqewe' tkyaqilju' tojk'ul txkup,
exqe' ate'qe' kywi'witz;
11Weqe'weye' pich' ate' toj nimaq k'ul
ex kykyaqilju' txkup ate' toj kojb'il.
12Naqwit nchin q'aq'ane', lay txi' nma'nwe' teya,
qu'n wewe' tx'otx' ex tkyaqilju' ati twitz.
13¿Ma ntzun nk'a'cha'nwe' wib' ti'j tchib'jil tman wakx,
mujqa in nk'wa'ne' tchk'el tman chib'?
14¡Aye'wt toyaju'ya aye' tb'itza te aq'b'il chjonte weye', ayine' Dyos Manb'aj;
japunxju' tyola tzaj ttziya'na weye'!
15Chin ttxkoma kse'n atiya toj b'is ex yajb'il;
knkla'ya, kchin jawil tnima'ntzuntza. Chi Qman Dyos.
16Atzu'n teju' xjal b'inchal myab'a'n, chi Qman Dyos:
¿Titi' toklena tu'n tyolina kyi'ju' nkawb'ile'
ex tu'n tyolina ti'ju' yol kyejni b'entti'j wu'ne',
17qu'n mina'jon ntq'a' kawi tib'a weye'
ex naq inik' tolju' nyole' ti'twi'ya?
18Majx kye tilwiju' eleq' tu'na;
¡kyexi'x kytene' kyuk'i'lju' ajpajil!
19Minti' ntjk'u'n taq'a,
kyi'ju' xlab'yol ex chajyolil.
20Injaw ti'n yola ti'j ttzika mujqa titz'ina;
¡ti'jku' ttzika mujqa titz'ina nxa' tlanu'n tyola!
21Matxi' tb'inchaya tkyaqil ja'lu, ex mixti'xi' txi' nma'ne' teya;
toj tnab'la qa junqinxe' tuk'i'la.
Kxel nchik'b'a'nwe' tilas tplajku'ya
¡kb'el ntz'e'ysa'n twitza ja'lo!
22Kyb'intzju'ye' lu, aye'ye' in ik'tna'l Dyos kyu'ne',
qu'n jaku' o'kx aj woktene' pẍulkyeye'
ex mix-a'lo' jun tzul klolkyeye':
23alkyete nq'on chjonte weye', inchin tnima'ne'.
¡In nklo'nweju'ye' ati toj nb'eye'! Chi Qman Dyos, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
