Lv 7 - Mam Ostuncalco Bible

Chik'b'ab'l kyi'ju' chojb'il tu'ntpaj kyil aj Israel

1Xjanxi'x kyoklenju' chojb'il tu'n kytene' b'a'n wuk'i'le'. Aye' chik'b'ab'l ja'lu kyib'aj:

2Xi' kb'ela' b'yeta' alu'mj kxel q'et te chojb'il tu'n kytene' b'a'n wuk'i'le' janche kub'a' b'yeta' alu'mj inche'x q'et tu'n kykub' tz'e'yset, atzunju' tchk'el ati tu'n t-xi' witxk'et tib'aj ex ti'jileju' q'olb'eb'l.

3Ati tu'n tkub' q'et tkyaqil t-untilju' alu'mj: jni'ju' ati ti'j tje exju' tok ti'jileju' t-xqintxa,

4exju' kab'e' tchinaq', exju' unt tok kyi'j exju' ati twittze'lti'j, exju' ati ti'ju' twab'l, aju' lu ati tu'n kyel iq'et junx kyuk'i'lju' tchinaq'.

5Kb'eltzun ttz'e'ysa'n paletz tib'aju' q'olb'eb'l, te jun oyaj tz'e'ysa'n te ninb'ilweye'. Jun chojb'ilte' tu'n kytene' b'a'n wuk'i'le',

6ex b'a'n tu'n kywan kykyaqilju' pale ti'j, naq o'kx ati tu'n kywante toj jun najb'il xjan, qu'n xjanxi'xte' toklen.

7Ikx chojb'ilju' tu'n kytene' b'a'n, kse'n jun chojb'il tu'n tpaj il, ex ax chik'b'ab'lju' kyi'j te kykab'il: teju' pale kb'inchalteju' chojb'il tu'n tk'metju' najsb'il il kxe'la'ju' alu'mj kb'el q'et.

8Ex ikx kjelju' ttz'umal alu'mj teju' pale kb'inchalteju' alu'mj te chojb'il k'ok'sb'il makub'tq'o'n jun xjal.

9Ex kykyaqilju' oyaj twitz awal k'ok'e'kywitz b'incha'n toj chuj ex b'incha'n toj k'wil b'o's t-xe ex toj sarten kxe'l teju' pale kb'el q'onteju' oyaj.

10Ex ikx kb'inchetelju' kyi'j kykyaqilju' oyaj twitz awal k'ok'e'kywitz, xyuq'i'n tuk'i'l aseyt mujqa kukx ttenju', ati tu'n t-xi' kyeju' tyajajil Aaron, junelni kxe'l kye, chi Dyos.

Chik'b'ab'l kyi'ju' chojb'il te b'inchjtib'il

11Aye' chik'b'ab'l ja'lu kyib'aju' chojb'il te b'inchjtib'il, ju' inkub' q'et nwitze':

12Qa te aq'b'il chjonteju' chojb'il, ktzajel kyq'o'ne' muqin mixti' ttx'amal xyuq'i'n tuk'i'l aseyt ex xwok' muqin mixti' ttx'amal witxk'a'n aseyt ti'j ex muqin tu'n tb'anil arin xyuq'i'n tuk'i'l aseyt;

13ex ktzajel kyq'o'ne' wab'j muqin tuk'i'l ttx'amal junx tuk'i'lju' chojb'il te aq'b'il chjonte ex te mujb'ab'ltib'il.

14K'elel pa'yet jun tnej weye' ti'j tkyaqilju' oyaj tu'n t-xi' q'et teju' pale kb'el witxk'ante tchk'elju' alu'mj te chojb'il te mujb'ab'ltib'il.

15Ati tu'n t-xi' ch'yet tchib'jilju' alu'mj makub' q'et te chojb'il te aq'b'il chjonte ex te mujb'ab'ltib'il tojxju' q'ij ajtkub' q'et; mixti' tu'n tkyaj klet jun tx'naj te juntl q'ij.

16Qatzun tu'n tjapun jun yol xkub' q'eta'ju' alu'mj, mujqa matzaj anq'in kyk'u'je', ati tu'n t-xi' ch'yet tojxju' q'ij ajtkub' q'et, qatzun mixti' xb'aj, b'a'n tu'n t-xi' ch'yet toj juntl q'ij;

17qatzun atix tchib'jilju' alu'mj toj toxi'n q'ij, ati tu'n tkub' tz'e'yset tkyaqil.

18Qatzun ati jun matxi tch'yo'n tchib'jilju' alu'mj te chojb'il te mujb'ab'ltib'il toj toxi'n q'ij, lay nk'amju'ye' chojb'il lu ex lay tz'ok toj tajlal, k'elel ik'etju' chib'j lu. Alkyete mach'yon ti'j ati til tu'n tpaj.

19Qama tz'ok tiqli chib'j ti'j alkyexku' ti'xti' tz'il, kb'el tz'e'yset ex lay txi' ch'yet.

Kykyaqilju' ẍtilsa'n kyib' b'a'n tu'n kych'yonteju' chib'j.

20Qama ch'yon jun xjal tz'ilsa'n tchwinqlal ti'ju' chojb'il te mujb'ab'ltib'il, ju' makub' q'o'n nwitze', ati tu'n tex xla'jetju' xjal lu ti'jxi'ju' ttanam.

21Alkyete xjal qama tz'ok ttzyu'n alkyexku' ti'xti' tz'il, qa kytz'ilil xjal mujqa kytz'ilil alu'mj, mujqa alkyexku' juntl ti'xti' tz'il, extzun matxi tch'yo'nju' tchib'jilju' chojb'il te mujb'ab'ltib'il makub' q'o'n nwitze', k'elex xla'jet ti'jxi'ju' ttanam, chi Qman Dyos.

Chik'b'ab'l ti'ju' unt ex ti'ju' chik'

22-23Tzaj tma'n Qman Dyos te Moyses tu'n t-xitma'n kye aj Israel kjalu:

Mixti' tu'n t-xi' kych'yo'ne' ky-until tman wakx, qpoj tman rit, mujqa chib'.

24Atzu'n ky-untilju' alu'mj kub'ni b'yo'nqe' mujqa kub'niqe' tzaqu'n kyu'n tojk'ul txkup, o'kx b'a'n tu'n tajb'ena' kyu'ne' te juntl ti'xti', mixti' tu'n t-xi' kych'yo'ne'.

25Alkyete matxi tch'yo'n ky-until alu'mj ju' inche kub' q'o'n nwitze' te jun oyaj tz'e'ysa'n, ati tu'n tex xla'jet toju' ttanam.

26Jachaqxjaku' mache anq'ina'ye', mixti' tu'n kych'yonteye' tchk'el pich' ex tchk'el txkup.

27Aju' xjal in ch'yon alkyexku' chik', ati tu'n tex xla'jet toju' ttanam, chi Qman Dyos.

Aju' ati toklen pale ti'j

28-29Tzaj tma'n Qman Dyos te Moyses tu'n t-xitma'n kye aj Israel kjalu:

Alkyete matzaj q'onte jun chojb'il te mujb'ab'ltib'il weye', ati tu'n ttzaj tiq'i'n nwitze'.

30Aku' ktzajel iq'inteju' oyaj tz'e'ysa'n nwitze', aju' ttzitk'u'j tuk'i'lxi' t-until tu'n ttzaj q'o'n weye'.

31Kb'el ttz'e'ysa'n paleju' unt tib'aj q'olb'eb'l, atzunju' ttzitk'u'j kxe'l te Aaron ex kyeju' tyajajil.

32Kyeju' pale kxe'la' kykuxju' alu'mj te kyb'anq'ob', ju' inche kub' q'et te chojb'il te mujb'ab'ltib'il, te jun oyaj kye.

33Teju' pale kb'el q'onteju' unt ex tchk'elju' chojb'il te mujb'ab'ltib'il kxe'la' tkuxju' alu'mj te tb'anq'ob',

34qu'n matxi' tz'el npa'ne' ttzitk'u'ju' alu'mj intzaj kyq'o'n aj Israel weye' te chojb'il te mujb'ab'ltib'il, te jun oyaj tb'anilxi'x, exju' tkux te jun o'nb'il, che kxe'l teju' pale Aaron ex kyeju' tyajajil kukxju'.

35Atzun kxe'lju' te Aaron ex kyeju' tyajajil kyi'ju' oyaj nche kub' tz'e'yset te ninb'ilweye', ati kyoklen ti'j atxi'x t-xi' nq'o'ne' kyoklen te pale nwitze'.

36Ayine' ẍin kyej q'onte chaq'b'il lu kyeye' tu'n t-xi' kyq'o'ne' kye', ktzyetelx toju' q'ij ajkyok nq'o'ne' toj kyoklen, ilti'j tu'n kyq'onteye' kukxju', tu'n kyb'inchanteye' exqe' kyk'wal, chi Qman Dyos.

37-38Atzun chik'b'ab'l ja'lu tzaj tma'n Qman Dyos te Moyses twi' witz Sinayi kyi'ju' chojb'il k'ok'sb'il, oyaj twitz awal k'ok'e'kywitz, chojb'il tu'n tpaj il ex tu'n kyten b'a'n tuk'i'l Dyos, oyaj te xjanb'il exqe'ju' chojb'il te mujb'ab'ltib'il, tej tmante kye aj Israel toju' chq'ajlaj Sinayi tu'n tb'ajkub' kyq'o'n kyoyaj.