1¡Nman Dyos,
matxi' b'aj kyetza'n xjal ttx'otx'a, ju' nche niman kye txqantl dyos!
¡Matxi' b'aj kyxmayi'n tjaya xjan
ex matxi' b'aj kyxitu'n tnam Jerusalen!
2¡Matxi' che b'aj kub' kyb'yo'n tmajina tnik'alkyi'j,
ex matxi' che b'ajkyej kyq'o'n
te kychi' k'utz ex kychi' tojk'ul txkup!
3Makub' qojli kychk'el naku'j a'
toj tkyaqil Jerusalen,
ex mix-a'lo' te' tu'n tku'x muqunkye.
4Matxi' qo okye' te kyxmayb'il qb'esine';
ex te kytzeb'lju' xjal ate' qi'jileye'.
5Nman Dyos,
¿ma tejumajxtzun ju' ttx'u'jila?
¿Ma oktzun k'entil kukxju' qi'je' kse'n q'aq'?
6¡Tzaqpinxa ttx'u'jila kyib'aj kykawb'ilju' nimal kye txqantl dyos
ju' min ojtzqi'na kyu'n ex min nche kub'san twitza!
7Qu'n eb'jo'kten walkye tk'wal Jakob'
ex naq tik'lentl kyejten kyu'n.
8Lalun tb'inchaya tu'n qchjonteju'ye'
il kyb'inchaju' ojtxi' qchmane';
¡tzajxwitju' tk'u'jlalila lwiy k'lulqeye',
qu'n matxi' qokub'aje'!
9Nman Dyos, aya klol qeye',
¡qotoniya, qo tkloma ex najsanku'ya qile',
tu'n tnimetju' tb'iya!
10Mixti' tu'n kymantekye' nche niman kye txqantl dyos:
¿Jatzunta' Kydyos? Chechiwt.
¡Q'ontza anb'il tu'n qlonteye' tu'me'l t-xel kyeju' ẍekub' b'yonkye tmajena!
¡Ex tu'n kyb'inteju' xjal nche niman kye txqantl dyos!
11B'intza tq'ojq'ojel kywi'ju' jpu'nqe',
ex klonqe'mju'ya b'entni ti'j tu'n kykyim
tu'n tipumala.
12Nman Dyos,
q'onka wuq maj tu'me'l t-xel kyeju' qb'esine'
tu'nju' myab'a'n matxi' kyb'incha teya;
13ayo'tzunqe' ottanamqo'ya,
ex t-ritqo'ya toj tch'laja,
qo q'ol chjonteye' teya kukxju',
¡qo b'itzale' te ninb'ilteya toj tkyaqil tab'q'iyil! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
