1Nman Dyos, q'aq'antz tk'u'ja wi'je',
ate'kye xjal ljo'n toj nq'ije' kyu'n;
q'achq'alx nche q'ojin wi'je' ex nche okten yajul weye'.
2Tkyaqil kmuj nchin jyonjtze' kyu'n wajq'oje
nim kyb'aju' nche oktzaqpaj wi'je' tuk'i'l nimjtib'il.
3Qa nchin xob'e' inok qe nk'u'je' ti'ja.
4Q'uqli nk'u'je' ti'j Dyos ex in nnima'nju'ye' tyol;
q'uqli nk'u'je' ti'j Dyos ex min chin xob'e'.
¿Titi' k'okyel tb'incha'n xjal wi'je'?
5Tkyaqil kmuj nchin kyk'ixb'sa'ne' tu'n kyyol;
o'kx nkyxima'ju' tu'n kyb'inchante taq'wixil wi'je'.
6Inxi'x che jutzajla xq'uqilweye',
tokkywitz wi'je'.
ja chin okyela' yale' kyu'n tu'n nkub' kyb'yo'ne'.
7¿Ma oktzun che tzaqpajel toju' kyil?
Nman Dyos, xitunqe'ku'ya tnam tu'n ttx'u'jila.
8Q'i'na'ta tajlal tu'n jte'xi' maj chin kub' oqe';
ex aya inel sunte ta'l nwitze'.
¿Ma mixtzunti' tz'ib'a'n tu'na toju' tuja?
9Che xe'l oqu' wajq'oje
naqa xxi'nqanine' o'nb'il teya.
B'i'nxi'xwe' wu'n qa ati Dyos wuk'i'le'.
10Q'uqliwe' nk'u'j ti'j Dyos ex njaw nnima'ne' tyol,
q'uqli nk'u'je' ti'j Qman Dyos ex njaw nnima'ne' tyol.
11Q'uqliwe' nk'u'j ti'j Dyos ex min nchin xob'e'.
¿Titi' k'okyel tb'incha'n xjal weye'?
12Nman Dyos, che japumelwe' nyol wu'n xintziya'ne' teya
kyuk'i'l nb'itze' teya,
13Qu'n machin tkola teju' kamik,
mana' chin tkola tu'n lalun chin kub' tz'aqe',
tu'ntzun nb'ete' toju' t-spik'umal chwinqlal
twitz Qman Dyos, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
