Pr 26 - Mam Ostuncalco Bible

1Myab'a'n qa nkub' che'w toj jb'alil

ex myab'a'n qama kub' jb'al toj q'ijal

ikyxtzun xnakju' myab'a'n tu'n tjaw nimet.

2kse'n jun tz'unin tzpetni mujqa mixti' tpaqb'il,

iktzu'n qanb'ilju' lay pon kanun ti'ju' xjal mixti' til.

3Jun chej nxla'jit tu'n k'iẍlob',

atzunju' kuwchej njk'et tu'n k'uxb'il toj ttzi

ikxtzun xnakju' nkawit tu'n asyal.

4Lalun txitmujtza'na xnak,

qu'n qama txittzaq'we'na jaku' tz'ela junx tuk'i'l.

5Chik'b'anxa tb'inchb'enju' xnak,

tu'ntzun lalun tnimatib'.

6Qama txi' qq'o'n jun qsanjel te jun xtrak

layx pon tuk'i'l naqpe' nok te joyb'il q'oj

naku'j matz'el jun twi' qqan.

7Jun xjal kox nqaku' nb'eta'

iktzun q'unb'enju' kyu'n xjal xnak.

8Mixti'x qnab'l qama tz'ok qk'lo'n ab'j ti'ju' chik'tze

ikxtzun tz'ela' qama txiqq'o'n ninb'ilte jun xnak.

9Jun tx'ujtenil mixti' ntna'nju' ch'i'x,

ikxtzun xnakju' mixti'x noku' q'unb'en toj twi'.

10Nxonju' ajsmajil kyi'j alkyechaqx xjal nche ik'

iky nela' kse'n jun xjal nxitk'le'n xnak tja.

11Aju' tx'yan nanjtl ti'j leq'ulte t-xab'

iktzun xnakju' ilti'j nxi' b'inchal il.

12Layx qe qk'u'j ti'j jun xjal xnak

mitzunyate' jun xjal nxi'x tnima'ntib' qa ati tnab'l.

13Aju' ky'ej noqx tu'n lalun tz'aq'unan ntma'n:

ati jun b'alun toj b'e inxq'uqin tu'n nxi' tch'yone'.

14Insutyanju' tjpel ja kyu'nju' tzuyb'ilte

ikxtzun ky'eju' nt-xtola'n tib' toj tkuẍb'il.

15Aju' ky'ej inpe' ttky'aji'n naqpe' tu'n twan.

16Aju' ky'aj a tyolju' qa nimxi'x tnab'l

kyekwitz wuq xjal.

17Qa nokx qq'o'nqib' toj kyq'oj txqantl

ikju' kse'n qama jaw qtzyu'n t-ẍkyin jun tx'yan.

18Ikyju' kse'n okni toj twi'

tok smajil ex xol ch'ut tu'n tb'iyun tuk'i'l q'aq'.

19Iktzun xjalju' nkub' t-sb'u'n tamiw

in tma'ntzuntz: noqtaq nchin yaqinwe'.

20Nkub' yupju' q'aq' qa min nokx pichk'et si,

ex in b'aj ttxa'nju' q'oj qa mixti' jk'ujyoli'n.

21In ajb'en sb'aq tu'n tkub' ttxalq'aq';

ex tu'n tkub' q'aq', najb'en si;

atzu'n tu'n qq'ojin, axixte' twi' q'ojil.

22Ikyte jk'ujyolil kse'n tzequl,

majxtzun nqo' b'o'lj tu'n.

23A tyolju' xmletz' majx tb'anilxi'x tb'inx

ikyju' kse'n tx'otx' xar uk'tza'nk tu'n saqpwaq.

24Aju' ntx'a'lti'j tk'u'j min tma'n ajtyolin,

atzun toj tanmi ati t-xim taq'wix.

25Laluntzun txi' toksla'na qama tzaj yolin teya tk'i' tk'u'jlalil,

qu'n aju' tnab'l nojni tu'n txqan taq'wixil.

26Maskyepe' min ntyek'u'n qa ntx'u'jin,

k'elil tnik'tzil kyu'n xjal.

27Alkyete' ntlku'n jul te kamik axte kb'elix tz'aq toj;

ex alkyete' ntolin ab'j twitz jawl tib'ajx ktzajela' tz'aq.

28Aju' chalyol nel tik'u'n ax,

exju' naq yoljne ntzaj ti'n xitb'il.