Os 3 - Mam Ostuncalco Bible

Aju' qya ajpajil ex Osey

1Tzaj tma'n jumajtl Qman Dyos weye':

Kutxi'ya ex k'u'jlama jun qya

k'u'jla'n tu'n tamiwa ex ajpajil.

Ikytzu'n nche nk'u'jla'ne' aj Israel ayine' Dyos Manb'aj,

maskyepe' matz'anjtlkyi'j k'ulul kye junxi'tl dyos

ex nkywanju' muqin tzqij ub'a nokx kyq'o'n kywitz witzileb', chij.

2Tzajtzun nlq'o'ne' nxu'jile'

tu'n o'lajoj medi (15) saqpwaq.

ex qaqlajnaq lajoj (330) litr Seb'ad.

3Xinma'ntzuntze' te: k'okyela te nxu'jile' nim tq'ijlalil;

lalun tz'ajpajina ex lalun txi'tla tuk'i'l juntl ichan,

ex ikxwe' majx chin nokyelwe' b'a'n teya, nchije' te.

4Ikyqextzun aj Israelju' b'a'npun ab'q'i che kjelten

mixti' kynimaqkawil ex mixti' kynejel,

lay kub' kyq'o'ntl chojb'il expe' lay che tentl kyab'aj xjanqe',

mixti'tl kyxb'alun pale ex mixti'tl kywitzleb' ktenb'el tojele kyja.

5Yajxi'tzuntel k'anjetz kyi'ju' aj Israel

ok kyjya' Qman Dyos

exju' Dab'i kynimaqkawil.

Kche pomel tk'etz Qman Dyos tuk'i'l ninb'il

toj mankb'il tq'ijlalil

ex kyk'mo'ju t-xtalb'il.