Pr 10 - Mam Ostuncalco Bible

Tnejel q'unb'en tma Salomon

1Aye' yol ja'lu q'umli tu'n Salomon:

Tzalajb'ilte' kyeju' manb'aj ati kynab'lju' kyk'wal ex kymyal;

aye'tzu'n k'walb'aj xnakqe' nche yajti kyu'n.

2Myab'a'nte' q'inumal myab'a'n kanb'ab'ente,

atzu'n tnik'alilti'j nqo tklo'n te kamik.

3Lay taj Qman Dyos tu'n tnaju' b'a'n xjal tu'n we'yaj,

atzu'n b'inchal myab'a'n min ntjo'n Dyos tu'n tqetk'u'j.

4In qoprowix tu'n ky'ejil;

atzu'n sak'il nten qq'inumal tu'n.

5Ati kynab'lju' nkyb'u'yi'n twitz kyawal toj q'ijal;

aye'tzu'n naq nex kyq'ij inel kych'ixaw.

6Nim ky'i'wb'il tib'aju' b'a'n xjal,

atzu'n b'inchal taq'wix nkub' tewa'n q'oj kyu'nju' tyol.

7Ati jun nab'ab'lteju' b'a'n xjal;

atzu'n b'inchal myab'a'n majx nik'tna'l.

8Aju' ati tnab'l b'a'n b'in kye chaq'b'il;

atzu'n xnak kb'el b'o'lj tu'nx tnab'l.

9Aju' b'a'n nanq'ina', min nxob';

atzunju' myab'a'n tel, myab'a'n kpomila' b'aj.

10Alkyete nxmutz'mun twitz, til ntchmo'n,

atzu'n npa'nyol jun q'ij kb'ajel.

11Te chwinqlal qekye' tyolju' xjal tnik'alti'j,

atzu'n b'inchal taq'wix nkub' tewa'n q'oj kyu'nju' tyol.

12Tu'nju' tx'a'lti'j k'u'jb'aj ntzaja' q'oj,

atzunju' tk'u'jlalil nkub' tnajsa'n tkyaqilju' chuksb'en.

13Nyolinju' ati tnab'l tuk'i'l nab'l;

atzu'n mixti' tnab'l, tzete' ntqani'n.

14Aye'kye' ati kynab'l min nkla'ji'n kyib',

aye'tzu'n mixti' kynab'l ntzaj kyi'n xitb'il.

15Kuwte' q'inun tu'nju' tq'inumal;

atzunju' prow nyajti tu'nxju' tprowil.

16A tkanb'ab'lju' b'a'n xjal aju' tchwinqlal;

atzu'n il tkanb'ab'lju' myab'a'n xjal.

17Alkyete' b'a'n b'in, ljo'nju' tb'eyil chwinqlal tu'n;

atzunju' min nokslan, kb'el b'o'lj.

18Aju' xjal naq k'u'jla'n tq'oj, chalyol,

atzunju' jk'ulyol, mixti'x tnab'l.

19Alkyete' nim nyolin, nky'ixb'sanju' tyol;

atzunju' nkub' nume' ja nojqelana' ati tnab'l.

20A tyolju' b'a'n xjal naku'j saqpwaq tb'anilxi'x;

atzu'n b'inchal myab'a'n mixti'xte' tnab'l.

21Inxi'x xnaq'tzanju' tnik'alti'j,

atzunju' xnak tu'nx tnab'l nkyima'.

22Tu'nju' tk'iwb'il Qman Dyos nqo' q'inumaxa'

minojqelan tu'n kub'yo'n qib' tu'n tkanb'et.

23Majx ntzalaju' xnak tu'n tb'inchan taq'wixil;

atzu'n ati tnab'l ntzalaj ti'ju' nab'l.

24Aju' nt-xob'le'n b'inchal myab'a'n axtzun nb'aju' ti'j,

atzunju' xjal tnik'alti'j nche japunju' tb'is tk'u'j.

25Kb'el naju' b'inchal myab'a'n ajttzaj kyq'iq' jb'al,

atzunju' xjal tnik'alti'j kyjelten wa'lx.

26Iky noka' ky'aj teju' chq'olte,

kse'n sib' ajtokx toj qwitz, mo kse'n b'inayr tx'am t-xe qwitzte.

27Qa nqo nima'n Qman Dyos ati qchwinqlal nim,

aye'tzunju' b'inchal myab'a'n ntaqk'uju' kychwinqlal.

28Tzalajb'ilte' nkyayo'nju' tnik'alkyi'j;

aye'tzunju' b'inchal myab'a'n mixti'xte' kyoyb'il.

29Xq'uqi'n qekye' b'a'n xjal tu'n Qman Dyos,

aye'tzunju' b'inchal myab'a'n nche kub' tb'ajsa'n.

30Jaloja kub'ku' tnik'alti'j,

atzunju' b'inchan myab'a'n lay ten twitz tx'otx'.

31Nab'lte' netz toj ttziju' xjal tnik'alti'j,

atzunju' b'inchal myab'a'n lay txi' b'i'n tyol.

32Tb'anil tyolju' xjal tnik'alti'j;

Atzu'nju' b'inchal myab'a'n naqx xlab'yol netz toj ttzi.