1 R 10 - Mam Ostuncalco Bible

Ulju' Qya nimaqkawil toj Sab'a ka'yilte Salomon(2 Cr 9.1-12)

1Tej tb'inteju' qya, nimaqkawil toj Sab'a, tpakb'alilju' matxitoq tkan Salomon te ajwalb'ilte tb'i Qman Dyos, pontzuntz toj Jerusalen tu'n tok Salomon kyoj xjel ch'uẍ tu'n.

2Nim txqan xjal k'le'nqe' tu'n kyuk'i'l txqan kamey iqa'n k'ok'sb'il kyu'n ex nim txqan q'anpwaq ex tb'anil ab'j. Tetzunj tpon twitz Salomon, xit-xjelu'n te tkyaqilju' xima'ntltoq tu'n,

3tkyaqiltzu'n t-xjel eb'aj tzaq'wet tu'n Salomon. Mixti' jun t-xjel mixwitti' b'ent ttzaq'we te.

4Atzunj tka'yinteju' qya, nimaqkawil toj Sab'a, tnab'l Salomon, exju' tja nimaqkawb'il ojetoq jawtb'incha'n,

5e'tb'anil wab'j twi' tmes, ex janajla'qe' xjal nim kyoklen toj tkawb'il exju' b'inchb'ente kyxb'alunju' ajb'el toj tja, exqe' q'olte tk'wa', exqe' chojb'il k'ok'sb'il ntoq che kub' tq'o'n toju' tja Dyos, ojexi'x lab'ti ti'j

6xitma'ntzuntz teju' nimaqkawil: Axte' tqanil nb'iye' toj ntaname' ti'ju' tb'inchb'ena exju' tnab'la;

7tzmaxi'tzun xxiwoksla'nju'ye' tej sokku' nka'yi'ne' ẍin ule' tzalu. Tk'ixpe'wt nik'jan tzaj q'ma'n weye', qu'n nimxi'xte' tnab'la ex tq'inumala kyetwitzju' oje nb'iye'.

8¡Majxlo tzajalb'ilte' kyeju' t-xu'jila, exlo tzalajb'ilxi'x kyeju' ajb'el teya ate'qe' tk'etza, kukx kyb'inte tyolju'ya tuk'i'l nab'l!

9¡Nimanjtzxwit Dyos Manb'aj Tdyosa, qu'n ntzalaj ti'ja ex matzaj tq'o'n kawb'il toj Israel toj tq'ob'a! ¡Matz'ok q'o'na te nimaqkawil tu'n, tu'n tkawina toj ttxolilti'j ex tnik'alilti'j, tu'n tk'u'jlalil Dyos ti'j Israel kukxju'! chij.

10Xi'tzun tq'o'n qya kyajnaq wuq kyintal tk'i' kab'lajoj lib'r (87.12) q'anpwaq teju' nimaqkawil, ex nim tajlal txqan k'ok'sb'il ex tb'anil ab'j. Min pon jumajtl tajlal txqan k'ok'sb'il kse'n pon tu'n qya nimaqkawil aj Sab'a teju' nimaqkawil Salomon.

11Exqepe' jun tnej tb'ark Iram ojetoq tzaj kyiq'i'n q'anpwaq tzmax Opir, ex tzaj kyiq'i'n txqan tze sandalo ex tb'anil ab'j axtzu'.

12Tchaq' nimaqkawil tu'n tb'inchet peta'n toju' tja Dyos ex toju' tja nimaqkawil kyi'j tze Sandalo, ex chnab' arpa ex tzintzin kyeju' aj chnab'. B'ajxtoq pona' jumaj kse'n tajlal txqan tze Sandalo lu ex mixti' pontl yajxi'tl.

13Atzunte nimaqkawil Salomon, xitq'o'n tkyaqilu' tqaniju' qya nimaqkawil toj Sab'a te, expe' b'ajxtq'ontlu' nimaqkawil toyaj te tu'nku' tb'is tk'u'j. Anjtzun ti'j qyatz nimaqkawil toj Sab'a toju' ttanam kyuk'i'lju' xjal ajb'el te.

Tqanil ti'j Salomon Ex tq'inumal(2 Cr 9.13-24)

14Qapelo junk'al kyajnaq kyaje' kyintal (484) q'anpwaq ntoq tk'mo'n Salomon atl junjun ab'q'i,

15myaqe'tlkye' chojb'il inkyq'o'nju' xk'aẍlel, e'k'ayil ex kykyaqilju' nimaqkawil toj Arab'ya exqe' kawil toj tkyaqilju' tx'otx'.

16Tchaq' nimaqkawil Salomon tu'n kyb'inchet lajnaq (200) kolb'il nimaq, q'anpwaqqe', te waqaq lib'r q'anpwaq junjun.

17Ex ikx tchaq' tu'n kyb'inchet o'lajnaq (300) kolb'il k'ok'e', ch'inxmi kab'e' lib'r tk'i' nik'jan q'anpwaq junjun, ex eb'aj kub' tq'o'n toju' ja te kawb'il tok tb'i k'ul te Lib'ano.

18Ex tchaq' tu'n tb'inchet jun nin q'uqb'il kywitzte elepantile, ex tchaq' tu'n tokq'o'n q'anpwaq ti'jile.

19Waqaq tpeta'nilju' q'uqb'il lu; ex sewun ttenju' tqejb'il, ex t-xq'e'l junjun plaj teju' q'uqb'il, ati junjun tilb'ilal b'alun wa'l junjun plaj.

20Ex toktoq kab'lajoj (12) tilb'ilal b'alun ti'j, junjun wa'lqe' toj junjun plaju' qaq tpeta'nilu' q'uqb'il. ¡B'ajxtoq b'incheta' jun q'uqb'il kse'n ja'lu toj jun kawb'il!

21Expe' kykyaqilju' tb'itidor nimaqkawil q'anpwaqqe', ex ikx kykyaqilju' txqantl ti'xti' inche ajb'en toju' ja te kawb'il tok tb'i K'ul te Lib'ano. Mixti' jun saqpwaqwit kyxol, qu'n myaxi'xtoq wi'yilju' saqpwaq toj tq'ijlalil Salomon,

22Qu'n tojxi' oxe' ab'q'ichaq nche pona'toqju' b'ark te Tarsis teju' nimaqkawil, junx kyuk'i'lju' tb'ark Iram, intoq tzaj kyiq'i'n q'anpwaq, saqpwaq, kywitzte elepant, e' maẍ ex chojpich'.

23Nimxi'xtoq txqan tq'inumal nimaqkawil Salomon ex tnab'l kyekywitzju' txqantl nimaqkawil twitz tx'otx'.

24Kykyaqil xjal twitz tx'otx' kyajb'iltoq tu'n kyka'yinte nimaqkawil Salomon ex tu'n kyb'inteju' nab'l tzaj tq'o'n Qman Dyos te,

25ex kykyaqilx intoq xikyiq'i'n jun oyaj te atl junjun ab'q'i: e'ti'xti' saqpwaq ex q'anpwaqqe', pinpa't, aq'unb'il te q'oj, k'ok'sb'il, eb'a'nchej ex chej mul.

Xk'aẍlen Salomon karwaj ex chej(2 Cr 1.14-17; 9.25-28)

26Eb'aj tb'u'yi'n Salomon karwaj e' aj chejil. Atitoq oxk'al lajnaq (1,400) karwaj ex junmutx' lajk'al (12,000) b'a'n chejil, eb'ajx tq'o'n kyoju' nin ja kye karwaj q'ojb'il ex teju' k'loj xq'uqil nimaqkawil toj Jerusalen.

27Nim txqan saqpwaq ex txqan ab'j ten toj Jerusalen tu'n nimaqkawil Salomon; ex chmet txqan k'ute tu'n, e'toj k'ul iw toju' plan tx'otx'.

28Atoqtzu' nche tzaja' q'i'na' tchej Salomon Musri ex Silisya, qu'n atoqtzu' nche'xa'ju' xk'aẍlel lq'olkye.

29Junk'al lajnaq (600) saqpwaq intzaja'toq jun karwaj toj Ejipt, atzun wuqnaq lajoj (150) saqpwaq intzaja'toq jun b'a'nchej. Ex kykyaqilju' kynimaqkawil itit ex aj Sirya intoq che lq'o'nkye kyeju' t-xk'aẍlel nimaqkawil Salomon.