1Nman Dyos, tuk'i'la in njyo'na'ye' kolb'il;
¡lalun taja tu'n tel nch'ixawe'!
¡Chin tkloma, qu'n tz'aqli ta!
2Chin tb'intza;
¡chin tkloma ja'loxi'x!
Tz'okxwita kse'n jun nin ab'j te kolb'ilweye',
¡tz'okxwita te wewb'ile' tu'n nklete'!
3¡Aya nin ab'j ex ja te kolb'ilweye'!
¡Chin t-ẍaqluma ex chin t-xq'uqima; tu'n tb'ent nnimanteye' tb'iya!
4¡Chin tiq'imitza toju' xpatxab' kub'ni q'o'n nwitze',
qu'n a na'ta klol weye'!
5Kxe'l woqxena'ne' wanmiye' toj tq'ob'a;
¡chin tkloma, Wajaw, aya Dyos axxi'x!
6Inche elwik'o'ne' k'lul witzileb' mixti' kyajb'en.
Matxi' tz'okqewe' nk'u'j ti'j Qman Dyos.
7Intzaj tq'o'n tk'u'jlalila tzalajb'il ex nak'b'il weye'.
Matila machin b'isune',
tojtzqi'na k'ixk'oj ntzaj wi'je';
8min ẍinx tq'o'na toj kyq'ob'ju' wajq'oje;
¡Machin kub'we'ye' toj nkub'ele' b'a'n tu'na!
9Nman Dyos, q'aq'antz tk'u'ja wi'je',
qu'n xob'ajilx atinqina'ye'.
Matxi' tz'el kyipumalju' nwitze',
¡tkyaqil toj nwinqile' in ch'yon!
10¡Matxi' chin kub'e' tu'n k'ixk'oj ex oq'el
ex noq ch'inx nkyime'!
Matxi' chin kub' numje' tu'n b'is,
¡Mixti'tl wipumale'!
11Matxi' chin nokye' te kytzeb'e'tz wajq'oje,
ex te kyxmayb'il najlqe' wi'jileye',
xob'ajilqinxe' kyeju' ojtzqi'nqine' kyu'n.
¡Kykyaqilju' nche okyal nwitze' nche el oq!
12Majx matxi' tzik'nna'le' kyu'n,
naku'j oje chin kyime' kye.
Ikqinju'ye' kse'n jun xar kub'ni b'uchj.
13In nb'i'ne' nche jasjne xjal wi'je':
Jaxjaku' atinqina'ye' nchin xob'e'.
Inkb'u'yi'nkyib' tu'n kyyolin wi'je';
¡inche ximan tu'n nkub' kyb'yo'ne'!
14Ayintzunwe', q'uqlok nk'u'je' ti'ja, Nman Dyos;
oje nmaye': ¡Ateju'ya Nman Dyos!
15Toj tq'ob'a ta'ju' nchwinqlale';
¡chin tkloma kyeju' wajq'oje, inche jyon wi'je'!
16Chin tka'yintza tu'n t-xtalb'ila ayine' tmajena,
chin tkloma, tu'n tk'u'jlalila.
17inchin kub'sane' teya Nman Dyos;
¡lalun taja tu'n tel nch'ixawe'!
¡Aye'wtu' aj il tz'el kych'ixaw;
che ku'xwit qoptz'aj tzmax t-xexi' muqb'il!
18Jpet-xwit kytziju' chalyol,
aye' nche yolin tuk'i'l xmayb'il ex i'k'jtib'ill,
ex nche yolin ti'ju' xjal tnik'alti'j.
19¡Nimta t-xtalb'il kyeju' nche niman teya!
Intk'u'na kse'n jun k'uwenj
ex kywitzku' xjal,
nxa' t-sipa'na kyeju' q'uqlok kyk'u'j ti'ja.
20Tu'nju' atiya kyuk'i'l,
inche tklo'na te tkyaqilju' kyxim xjal myab'a'n;
inche tklo'na toj tjaya
kyeju' kyajq'oj nche ok ik'lenkye.
21Nimanxwit tb'i Qman Dyos tu'nju' tk'u'jlalil
nim t-xtalb'il xtb'incha weye',
tej antintoqe' toj k'ixk'oj.
22Tej njaw ximane' nmaye'
qa matxi' tzik'nna'le' tu'na;
atzunj txi' nqani'ne' o'nb'il teya,
tzaj tb'i'na tq'ojq'ojel nwi'ye'.
23Kyk'u'jlame' Qman Dyos, kykyaqile' okslalqe'xi'xe' te.
Inche t-xq'uqi'nte Qman Dyos ax che yolin,
aye'tzu'n nkynima'n kyib'
inkub' ttz'e'ysa'n kywitz b'a'nxi'x.
24Kykuwsam kyk'u'je'
kykyaqile' q'uqlok kyk'u'je' ti'j Qman Dyos, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
