Pr 15 - Mam Ostuncalco Bible

1Aju' tzaq'web'l tuk'i'l me'sb'il ntchewsa'n ttx'u'jil xjal;

atzun tzaq'web'l mya' ttxolilti'j majx ntzaj q'oj tu'n.

2Inche q'on nab'lju' xjal ati kynab'l;

aye'tzu'n xnak noqx xlab'yol netz toj kytzi.

3Atite Qman Dyos jaxjaku'

in ka'yin kyi'ju' tnik'alkyi'j ex kyi'ju' aj il.

4Aju' yol tk'i' tk'u'jlalil nakuj jun tze te chwinqlal;

aye'tzun xlab'yol nk'ixb'san qanmi tu'n.

5Aju' xnak min kub' tb'i'n ttzak'b'il tman;

atzunte' b'a'n b'i'n, ntyek'u'n qa ati tnab'l.

6Ati q'inumal toj tjaju' xjal tnik'alti'j,

atzu'n b'inchal myab'a'n min nku'x tnik'b'e'n tkanb'ab'l.

7Aye'ju' ati kynab'l nche q'on nab'l;

aye'tzunju' xnak mikxa'qeju'.

8Min ntk'mo'nte Qman Dyos kyoyaju' b'inchal myab'a'n,

atzun kyna'j Dyos tnik'alkyi'j intzalaj ti'j.

9Inel tik'u'n Qman Dyos kychwinqlalju' b'inchal myab'a'n,

aye'tzu'n tnik'alkyi'j nche tk'u'jla'n.

10Alkyete makyej ttzaqpi'n tb'eyil b'a'n, kytzak'unjtzel kuw;

alkyetzunte' nel ik'unte tzak'b'il, kkyimel.

11Twitz Qman Dyos ta' kamik exju' muqb'il,

¡yajwittzunlo ju' t-xim xjal!

12Aju' mixti' tnab'l mya' b'a'n toj twitz qama txi' tzak'u'n,

ex minti' ntuk'i'la'n tib' kyuk'i'lu ati kynab'l.

13aju' xjal qa ntzalaj ntzalaju' twitz;

exqa ati tb'is ex in b'isun twitz.

14Njyon tojtzqib'lju' xjal k'atztwi'.

aye'tzu'n mixti' kynab'l nqe kyk'u'j toju' xnakyil.

15Aju' myab'a'n tten kukx nb'isun;

atzunte' xjal ntzalaj tkyaqil q'ij tzalajb'ilte'.

16B'a'nte' prowqo' qa nqnima'n Dyos,

kyetwitz q'inun ex nqo' anq'in toj q'oj.

17B'a'nxte' nqo' wan itzaj tk'i' tk'u'jlalil,

kyetwitz noq chib'j qchi' toj ik'jtib'il.

18Aju' txinwi' noqx njyon q'oj;

atzunju' me's ntq'o'n nak'b'il.

19Nojni toju' b'e tu'n ch'i'x teju' ky'aj;

atzu'n teju' tnik'alti'j ninb'e ex tb'anil.

20Nche tzalaju' manb'aj tu'n kyk'wal ati tnab'l;

atzu'n k'walb'aj xnak nche eltik'o'n.

21Ntzalaju' xnak toju' t-xnakyil;

atzunte' ati tnab'l ax nxika'yinte tib'.

22Qa min xqo xjelin aju' xim minti' nel b'a'n;

atzun b'a'npun q'ol nab'l b'a'n nela xim.

23¡Majx tzalajb'il aj tknet aku' tzaq'web'l,

ex majx tb'anil qa toj kuxi'xju' kmuj nojqelan!

24Wa'lxix twitzju' tb'eyil chwinqlal,

ex intklo'nju' ati tnab'l tu'n lay txi' toj tz'e'ysb'il witzb'aj.

25Nche kub't-xitu'n Qman Dyosju' nkynima'n kyib',

aye'tzu'n kyimni kychmil xq'uqi'nqe' tu'n Dyos.

26Min kub'ju' taq'wix xim toj twitz Qman Dyos,

atzun yol te tk'u'jlalil ntzalaj ti'j.

27Aju' pwaq myab'a'n kanb'ab'ente ntzaj tiq'i'n yajb'il tuja,

atzun nel tik'un pwaq tk'i' sb'ub'l, ktenb'il nim tchwinqlal.

28aju' xjal tnik'alti'j nximan nejtl ti'ju' ttzaq'web'l,

atzunju' b'inchal myab'a'n noqx nel tlanu'n tyol.

29Nel tpa'ntib' Qman Dyos kyi'ju' b'inchal myab'a'n,

aye'tzu'n tnik'alkyi'j intzaj tb'i'n kyna'j Dyos.

30Aju' witzb'aj ntzalaj ntq'o'n tzalajb'il toj qanmi;

exju' b'a'n tqanil ntq'o'n ak'a'j ipumalj.

31Alkyete' nb'in tzak'b'il ati tchwinqlal,

ex ktenb'il kxolju' ati kynab'l.

32Alkyete' nel tik'u'n tzak'b'il min tk'u'jlantib';

alkyetzunte nk'mon tzak'b'il nb'enxi'x t-ximan.

33Aju' ninb'ilte Qman Dyos ntq'o'n nab'l;

tnejelxi'x ati tu'n qok me's tu'n qk'monte oklenj.