Is 19 - Mam Ostuncalco Bible

Tpakb'alilju' tzul ti'j Ejipt

1A tpakb'alju' tzul ti'ju' tnam Ejipt:

Kyka'yinxe' Qman Dyos:

Tzul Ejipt tib'aj jun tnej muj ojqel tel.

Nche lu'lun kywitzleb' aj Ejipt twitz,

ex nche xob'ju' aj Ejipt te.

2Intma'n kjalu: Knb'incha'ye' tu'n tkub' kypa'n kyib' aj Ejipt

ex tu'n kyq'ojin kyxolx:

che q'ojil amiw ti'j kamiwx, e'nimaqtnam kyi'j nimaqtnam,

kawb'il ti'j kawb'il.

3Kb'el nchuku'ne' kynab'l,

kb'el nxitu'ne' kyxim.

Che xjelultzuntz kye witzleb' ex kye ajpkab',

kye anmi ex kye jyolkyi'j xjal.

4Kb'el nq'o'ne' Ejipt toj tq'ob' jun tajaw kuw;

jun nimaqkawil kuw kkawilte.

Chi Qman Dyos nimtipumal.

5Kb'ajelju' nin a' Nilo,

majx kb'el tzqiju' nin a',

6che tzu'wixtlju' tb'e a'.

Che b'el b'o'sixju' nin a' toj Ejipt

tzmax ajkykub' tzqij,

che kb'el tzqiju' ajlaj ex k'ul;

7che kb'el tzqiju' ajlaj ttziyile nin a' Nilo,

ex tkyaqil awal ttziyile a',

ex lay che tentl.

8Kykyaqilju' nche tzyun kyiẍ ttzi' a' Nilo

che jiq'tchal ex che oq'el

che b'isulju' nku'x kyq'o'n kypa kyiẍb'il toj a'.

9Che b'isulju' nche aq'unan ti'j sed xb'alun chub'i'ntwitz;

ex che b'el sb'une'ju' chqol ex chmol;

10che b'elyajtiju' b'inchal xb'alun,

ex kykyaqilju' b'inchal chukchaq ti'xti' kb'el chukj kynab'l.

11¡Xnakqe'ye', nejenel toj Soan,

e'q'olnab'l nim kyojtzqib'le' toj Ejipt,

axxi'x q'ol nab'l qe'ye' mixti' kynab'le'!

¿Tiqu'n nxikyma'ne' te paraon kjalu:

Kyyajajil nim kynab'l qo'ye',

ex kyyajajil ojtxi' nimaqkawil, chechije'?.

12¿Jatzun ta'qe' tajnab'lila paraon,

tu'n kyxnaq'tzante ex tu'n kymante

titi' t-xim Qman Dyos nimtipumal

nab'e'ntl ti'j Ejipt?

13Xnakqekye' nejenel te Soan,

makyaq' sb'u'kyib'u' nejenel te Menpis

matxiq'i'n Ejipt toj b'e mya ax

kyu'n nejenel tneji'n tx'otx'.

14Makub' tq'o'n Qman Dyos

jun xewb'aj chuksal kynab'l;

matxi kyiq'i'n Ejipt toj jun b'e txalchi

toj tkyaqilju' nkyb'incha'n,

kse'n jun tx'ujtenil nxab' ex nẍutujla.

15Mix-a'loxte kb'antel tonin ti'j Ejipt,

b'a'nqa nim toklen mujqa ch'i'n toklen,

tqan tut mujqa ajlaj.

16Naku'j qya che okyela' aj Ejipt toju' q'ij lu; che b'ajel xob' ajkyka'yinte ajtjaw tiq'i'n Qman Dyos nimtipumal tq'ob' kyi'j.

17K'okyeltchi kyi'j aj Ejipt kye aj Juda, naq ajttzajkyna'n tb'i che xob'el teju' t-xim Qman Dyos nimtipumal ti'j Ejipt.

18Tojtzu'n q'ij lu che tenb'el jwe' nimaqtnam toj Ejipt che yolil toj eb'rey ex kytziya' kyol ax te Qman Dyos nimtipumal. Nintnam te Q'ij tb'iju' jun k'okyel.

19Ktenb'el jun q'olb'eb'l te Qman Dyos tojku' tnam Ejipt toju' q'ij lu, ex kjawil b'incha'n jun ab'j ninb'ilte Qman Dyos nqayin tk'etz tnaqachal.

20K'ajb'el te techlal tu'n ttzaj na'yit Qman Dyos nimtipumal toju' tnam Ejipt. Ajkyẍch'in te Qman Dyos tu'n kyqanin onb'il kyi'ju' nche yajlankye, ktzajel tchq'o'n Qman Dyos jun tzaqpilkye, tu'n kyklet tu'n.

21Ktyek'u'tib' Qman Dyos kye aj Ejipt, ex k'elelkynik' te, che k'ulul te, kxel kyq'o'n chojb'il ex kyoyaj te. Kytziya' kyyol ex kjapumel kyu'n te Qman Dyos.

22Ktk'ixb'sa' Qman Dyos Ejipt, yajxi'tzuntl ktq'a'na'. K'anjetz kyi'j tuk'i'l Qman Dyos, ex kq'aq'altk'uj kyi'j ex che tq'a'na'.

23Ktenb'el jun ninb'e toju' q'ij lu, tzajx Ejipt kpomel tzmax Asirya. Kb'antel kypon aj Asirya tzmax Ejipt exqe' aj Ejipt kb'a'ntel kypon tzmax Asirya, ex che k'ulul aj Ejipt ex aj Asirya junx te Qman Dyos.

24Tojtzu'n q'ij lu che okyelten aj Israel junx kyk'etz aj Ejipt ex aj Asirya, ex che okyel te jun k'iwb'il kyoju' tx'otx'.

25Che tzajel tky'i'wla'n Qman Dyos nimtipumal, oktma: Knk'i'wla'ye' ntaname' Ejipt, ex Asirya nb'inchb'aje' kyu'n nq'ob'e', exju' Israel we'kuxi'xe', chij.