Ec 9 - Mam Ostuncalco Bible

Se'nju' Chwinqlal ex se'nju' kamik

1Matz'oktilil wu'ne' naqx tu'n tel nnik'e' ti'j qa toj tq'ob' Qman Dyos ta' kyaq'un b'a'n xjal ex kyaq'un ati kynab'l. Min b'i'n tu'nte xjal ti'ju' tk'u'jlalil ex ti'ju' ik'jtib'il, b'a'ntzun qa twitzx ta'qe'.

2T-ximanjtz b'a'nxi'x, ax che ik'ela' kykyaqil: kyi'j tnik'alkyi'j ex kyi'ju' mya tnik'alkyi'j, kyi'j b'a'n xjal ex kyi'ju' txkup xjal, kyi'j b'a'n kychwinqlal ex kyi'ju' myab'a'n kychwinqlal, kyi'j nkub' kyq'o'n chojb'il ex kyi'j min nche q'on chojb'il; ikx kb'ajelju' kyi'ju' min nche b'inchan il kse'nx kyi'ju' b'inchal il, kyi'ju' nkytziya'n jun kyol ex kyi'ju' min kytziya'n kyol.

3Atzun myab'a'nju' tu'n tkyaqilju' nb'aj twitz tx'otx': tu'n ax che ik'ela'ju' kykyaqil. Expena' nojni tnab'lu' xjal tu'n myab'a'n; inkub'ti'j tnab'l tu'n xnakyil toj tkyaqilju' tchwinqlal; inpon b'ajtzuntz toj muqb'il.

4Q'uqlixi'x tk'u'jlalilju' xjal atix tchwinwqlal, qu'n ate b'a'n jun tx'yan itz' kyetwitz jun b'alun kyimni.

5Exqepe' itz'qe' b'i'n kyu'n qa che kyimel, aye'tzu'n kyimniqe'tl mixti' b'i'n kyu'n ex mixti'xte nkykanb'a'n, qu'n majx nnik' kyna'l.

6Atzuntzu' nb'aja' kyk'u'jlalil, kyq'oj ex kyxim, ex milo tu'n kyula'tl b'inchal jun ti'xti' twitz tx'otx'.

7¡Qu'mtzun, kuwxa! Q'onku'x twaya titk'u'ja; q'onku'x tk'wa'ya b'in titk'u'ja, qu'n b'a'n ẍe ela' taq'una twitz Qman Dyos.

8Q'onk ti'ja saq kukxju'; ex sunkxa k'ok'sb'il toj twi'ya kukxju'.

9Tzalajxa atl junjun kmuj tuk'i'lju' t-xu'jila toju' tchwinqlala mixti'x ttx'o'lajil saj tq'o'n Qman Dyos twitz tx'otx'; qu'n o'kxte ktkanb'a'ju'ya tu'n txqan taq'una ntb'incha'na twitz tx'otx'.

10Ex B'inchama tu'n tkyaqil tk'u'ja tkyaqilju' kb'antel tb'inchanteya; qu'n mixti'tlte tu'n tb'inchet toju' muqb'il jakpomela'ya ex mixti'te tu'n t-ximet, mixti'te ojtzqib'l ex nab'l.

Mya tnik'alti'ju' nb'aj toju' chwinqlal

11Matxi' wile' junjuntl ti'xti' twitz tx'otx', myaye' kuw che ojqelan nche kanb'an toj jun sqach, ex myaye' kuw che q'ojin nche kanb'ante q'oj; mya o'qe'kxju' ati kynab'l ati kywa, ex mya o'qe'kxju' k'atzkywi' q'inunqe', ex mya o'qe'kxju' xnaq'tza'nqe' b'a'n kyilwi; tkyaqil ja'lu teylex junjun.

12Toj juntl tu'me'l, mix-a'lo' jun b'ilte jtoj pon q'ij te: kse'nqe' kyiẍ ajkytzyet tu'n tzuyb'ilkye exqe' pich' toj xpatxab', ikxtzunte xjalju', mixti' tnab'en ti'j ajtok takpuj twitz jun ti'xti' myab'a'n.

13Ex matxi' wil juntl ti'xti'ye' twitz tx'otx', inok te jun nimaq xnaq'tzb'il weye':

14jun b'o's nintnam, naqjte'x xjal toj, oktzaqpaj jun nimaqkawil kuw q'ojil ti'j, b'aj tmqo'n ti'jile tu'n tkub'ti'j tu'n.

15Ex najli jun xjal prow, extzun ati tnab'l, toju' nintnam, ex b'ent tklonteju' nintnam tu'n tnab'l, ¡ex mix-a'lo'te ntzaj na'nte!

A nab'l ati tib'aj tkyaqil ti'xti'

16Atzu'n nchiwe', ana'te b'a'nju' ati qnab'l kyetwitz kuwqo', maskyepe' min nxib'i'n tnab'lju' xjal prow, ex min nkub'i'nju' tyol.

17Ate b'a'n tyol jun xjal ati tojtzqib'l chab'a' nb'aj tma'n,

kyetwitz tyol jun kynimaqkawil xnak nxi'x ẍalb'i kuw.

18Ate ojtzqib'lju' nim toklen

kyekywitz aq'unb'il te q'ojb'il.

Naq tu'n jun ti'xti' myab'a'n sela'

intzaja' nim xitb'il.