Lv 6 - Mam Ostuncalco Bible

Chojb'il tu'ntpaj sb'ub'l

1Tzaj tma'n Qman Dyos te Moyses kjalu:

2Qa ati jun xjal mab'inchan il nwitze' tu'nju' makub' t-sb'u'n twnaqil ti'j jun ti'xti' makyej oqxena'n te mujqa matxi majina'n te, mujqa matz'el telq'a'n jun ti'xti' te,

3mujqa makub' tewa'n qama tz'el yal jun ti'xti' tu'n, ju' xini tz'aqi, mujqa tu'nju' mattziya jun yol mya ax, (kyu'n alchaqxkyeku' ti'xti' lu inqo b'inchana' il),

4ati tpaj tu'nju' il lu. Qu'mtzun ati tu'n t-xi' tanjsa'n ti'ju' ti'xti' xkub' telq'a'n, mujqa naq sel t-xk'a'yu'n, mujqa aju' kyajni oqxeni'n te mujqa aju' naq sel yal tu'n,

5mujqa naq alkyexku' ti'xti'ju' mattziya jun tyol ti'j mya ax. Ati tu'n t-xi' tanjsa'n ti'j tkyaqil teju' tajaw tuk'i'l jun tjwe'yi'n tnej, aj tq'onteju' chojb'il tu'n tten b'a'n wuk'i'le'.

6Atzunju' chojb'il kb'eltq'o'n nwitze' jun tman rit mixti' ttzakajil, aya kq'malte jte' twi'ju' rit ktzajel tiq'i'n kyi'ju' trit, kxel tq'o'ntzuntz teju' pale te chojb'il tu'n tten b'a'n wuk'i'le'.

7Iktzu'n kchjetela' tilju' xjal tu'nju' pale nwitze' ti'j alkyexku' ti'xti' lu ja xb'inchana' il, ex kb'el najsetju' til, chi Dyos.

Chik'b'ab'l kyi'j chojb'il k'ok'sb'il

8-9Tzaj tma'n Qman Dyos te Moyses tu'n kyb'ajx tma'nju' nuk'b'il kyi'ju' chojb'il k'ok'sb'il, te Aaron ex kyeju' tk'wal ikjalu:

Kjel q'etju' alu'mj te chojb'il tib'aj ttxalq'aq' tib'aj q'olb'eb'l toj tkyaqil qonik'an tzmaxi'j ajtb'aj tu'n q'aq'.

10K'okyel tq'o'n pale t-xb'alun ex tkalsonsiy sed, k'okyil tentzuntz jtolte ttza'jilju' alu'mj tib'aj q'olb'eb'l, ex kb'eltq'o'n ttx'u'k q'olb'eb'l.

11Yajxi'tzuntel k'elel tch'ixpu'n t-xb'alun, kxel tiq'i'nju' tza'j ex kb'eltq'o'n toj jun tkub'el ẍnu'l ti'jxi' kynajb'ile'.

12Aju' q'aq' ink'ant tib'aj q'olb'eb'l mixti' tu'n tyupj. Ati tu'n tokxtq'o'n pale t-siyilju' q'aq' tkyaqil prim ex tu'n tokx tb'incha'nju' alu'mj tib'a q'aq', ju' ktz'e'ysetel, ex kb'el tz'e'ysetju' t-until chojb'il te mujb'ab'ltib'il tib'aj q'olb'eb'l.

13Ati tu'n tk'antju' q'aq' kukxju' tib'aj q'olb'eb'l. Mixti' tu'n tyupj, chi Dyos te Moyses.

Chik'b'ab'l ti'j oyaj twitz awal k'ok'e'kywitz

14Aye'ju' xnaq'tzb'il lu nyolin kyi'ju' oyaj twitz awal: Kb'el kyq'o'n pale tib'aju' q'olb'eb'l nwitze'.

15Juntzun kyxol kjawil tiq'i'n jun txab' arin, ju' kub'ni q'o'n te oyaj ex ch'i'n aseyt, tuk'i'ltzu'n tkyaqilju' sturak ati tmoj oyaj, che kb'el ttz'e'ysa'n tib'aju' q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'.

16Atzunju' lay b'aj ti'ju' oyaj kxel kywan Aaron kyuk'i'lju' tk'wal, mixti' ttx'amal ex toj jun najb'il xjansa'n twitpenju' Ja te Mujb'ab'ltib'il.

17Mixti' tu'n kytzq'ajsante tuk'i'l ttx'amal. Qu'n a kyeju' oje txi' nq'o'ne' ti'ju' oyaj tz'e'ysa'n inkub' q'o'n nwitze', ex xjanxi'x kyoklen kse'n kyoklen chojb'il tu'n tpaj il ex tu'n kyten b'a'n wuk'i'le'.

18Majx kjeltenju' lu toju' tq'ijlalil tzul, kykyaqilju' ichan tyajajil Aaron qe' che wal ti'ju' q'o'n kye kyi'ju' oyaj tz'e'ysa'n nwitze'. Ex alkyexku' jun ti'xti' mapon tiqli ti'j kjel xjan, chi Qman Dyos te Moyses.

Kyoyaju' pale

19Tzaj tma'n Qman Dyos te Moyses kjalu:

20A kyoyaj Aaron ja'lu kyuk'i'lju' tk'wal kb'el kyq'o'n nwitze' ajkyok te pale: kyaje' lib'r tk'i' nik'jan tb'anil arin te jun oyaj twitz awal k'ok'e'kywitz, nik'jan kb'el kyq'o'n te prim ex nik'jantl ajtok qale, mixti' jun q'ij laywit kub' kyq'o'n.

21Ati tu'n kyb'inchanteju' oyaj toj jun sarten, smo'n twitz b'a'nxi'x tuk'i'l aseyt, kb'el kyq'o'ntzuntz aq'pu'nchaqtl te jun oyaj tk'ok'jal nwitze'.

22Ikytzu'n kb'ela' tb'incha'n kynejel pale tyajajil Aaron aju' xjansa'ntl te t-xel; wewe' oyaj lu kukxju', ex majx kb'ajel tu'n q'aq'.

23Tkyaqil kyoyaju' pale majx kb'ajel tu'n q'aq', ex mix-a'lote kxel wante, chi Dyos.

Chik'b'ab'l Kyi'j chojb'il tu'ntpaj il

24-25Tzaj tma'n Qman Dyos te Moyses tu'n kyb'ajx tma'nju' nuk'b'il kyib'aju' chojb'il tu'n tpaj il, kye Aaron kyuk'i'lju' tk'wal ikjalu:

Ati tu'n tkub' b'yetju' alu'mj nwitze' aju' kb'el q'et te chojb'il tu'n tpaj il, janche kub'b'yeta' alu'mj tu'n kykub' tz'e'yset, qu'n xjanxi'x toklen.

26Aju' pale kb'el q'onte chojb'il tu'n tpaj il, b'a'n tu'n twan ti'j, naq o'kx ati tu'n tkub'ten walte toj jun najb'il xjan twitpenju' Ja te Mujb'ab'ltib'il.

27Ex alkyexku' ti'xti' matz'ok tiqli ti'j tchib'jilju' alu'mj kjelten xjan, qatzun matz'ok witxli chik' ti'ju' t-xb'alun ati tu'n ttxjet toj jun najb'il xjan.

28Kb'el pa'yetju' tx'otx' k'wil ja xloqlona' chib'j oyaj, qatzun q'ank'uxb'ilju' k'wil ja xloqlona' naq kb'ajel jqet twitz ex kjawil txjet toj.

29Xjanxi'x toklenju' chojb'il lu, oqe'kxju' pale b'a'n tu'n kywan ti'j.

30Atzunju' alu'mj xini q'et te chojb'il tu'n tpaj il, ju' xini iq'etju' tchk'el toju' Ja te Mujb'ab'ltib'il tu'n tnajsetju' il, mixti' tu'n t-xi' ch'yet. Ati tu'n tkub' tz'e'yset.