1Lu tzaj tyek'u'n Qman Dyos weye': Tej akxi'xtoq njawu'l twi'ju' awal tawal q'ijal, aju' nok tjawlenxi' tawal nimaqkawil, intoq che tch'isa'n Qman Dyosju' ẍt'ikt'u'l, wile'.
2Tetzunj ch'inxtltoq tb'aju' awal kyu'n ẍt'ikt'u'l, nmatzuntze':
—¡Qman Dyos najsanku'ya qile'! ¿Se'n taq'wi k'ik'ex tu'nju' ttanama Jakob' extzun tal b'o's? Nchije' te.
3Anjtzte' Qman Dyos ti'jtk'u'j ti'ju' matxi'toq kub' t-xima'n, ex tma:
¡Lay tzajtlju' tz'e'ysb'il witzb'aj lu!
Tzaj yek'u'n q'aq' toj naku'j witzik'4Tzaj tyek'u'n Qman Dyos lu weye': Xinka'yine' tzaj tq'o'n Qman Dyos q'aq' te tz'e'ysb'il witzb'aj, ex majx tzqiju' ninnjab' nim t-xe tu'n extoq ljo'n tb'aj tz'e'yju' tx'otx' tu'n toj kojb'il.
5Xinma'ntzuntze' te Qman Dyos:
—¡B'inchama xtalb'il, tk'i'xtzu'n! ¡Layna' tzik'xte' tu'n ttanama Jakob', qu'n tal b'o'sna'!
6Atzunte Qman Dyos anjtzti'j tk'u'j ti'ju t-xim, ex tma:
—¡Ex lay tzajtlte' tz'e'ysb'il witzb'aj lu!
Tzaj yek'u'n jun plom naku'j toj witzik'7Ex tzaj tyek'u'n Qman Dyos ja'lu weye': Atitoq Qman Dyos tk'etz jun tapi, ex tzyu'ntoq jun tplom b'inchal ja tu'n.
8Ex tzaj tqani'n weye':
—¿Titi' ja'lu, Amos? Chij.
Jun tplom b'inchal ja, nchije' xintzaq'we'ne'.
Atzunte tzaj tma'n:
Tu'ntzunju' plom lu k'elela' nnik'e' ti'ju' tchwinqlal ntaname' Israel. Lay kub' nnajsa'n jumajtlju'ye' kyil.
9Che kb'el xitu'n xjanb'ilte Isaak, ex che kjel xitunju' ja te k'u'lb'il toj Israel. ¡Aye'tzunju' tk'wal nimaqkawil Jerob'oam che kb'el nb'yo'ne' tu'n k'uẍtx'e'nb'il!
Min xob' Amos te Amasiy10Xit-sma'n Amasiy, pale te B'etel tq'umli te Jerob'oam, nimaqkawil toj Israel kjalu: Ate Amos nb'et yolil kxolju' xjal aj Israel, tu'n tjaw kyiq'i'n kyib' ti'ja nimaqkawil. Lay tzik'xtl kyu'n xjal qa kukx tyolinju'.
11Qu'n ntma'n qa kkyimela' nimaqkawil tu'n k'uẍtx'e'nb'il exqa kkyaqilju' xjal aj Israel che kxe'l iq'i'n toj juntl tnam. Chij.
12Xitma'ntzun Amasiy te Amos:
—¡Kutexa tza'lu, sanjelal! Qa tajb'ila tu'n twana ti'ju' ntpakb'a'na kutxi'ya toj Juda;
13ex lay pakb'antla toj B'etel, qu'n xjan jate' teju' nimaqkawil ex tja k'u'lb'il nim toklen teju' kawb'il. Chij te.
14Atzunte Amos xittzaq'we'n te:
—Mya sanjelalqinwe', ex mya wajb'ile' tu'n wokye'. Ti'j k'ik'lej rit nchin anq'inawe' ex b'uyil twitz iw toj k'ul,
15atzunte Qman Dyos sel iq'inweye' ti'j k'iklej rit, ex tzaj tma'n weye': Kutxi'ya ex yolina toj nb'iye' teju' ntaname' Israel.
16Qu'mtzun, b'inxa tyol Qman Dyos. Qu'n a ntma'nju'ya: Lalun yolin jun ti'xti'ya toj tb'i Qman Dyos ti'ju' tnam Israel, ex lalun tma jun ti'xti'ya kyi'ju' tyajajil Isaak. Chija.
17Atzunte Qman Dyos ntma'n kjalu: K'ajpajilu' t-xu'jila tojku'xi'xju' nintnam, aye'tzu'n tk'wala ex tmyala che kyimel tu'n k'uẍtx'e'nb'il; exju' ttx'otx'a kxe'l sipa'n kyxolu' mache kanb'an ti'j; atzunta kkyimela toj kytx'otx' k'lul witzleb', aye'tzu'n aj Israel che kxe'l q'i'n toj juntl tx'otx', najchaq ti'jxi' kytx'otx'.
Who We AreWhat We EelieveWhat We Do
2025 by iamachristian.org,Inc All rights reserved.
