Is 33 - Mam Ostuncalco Bible

Tq'uqlil tk'u'jlalil ti'j Qman Dyos

1¡Qab'anx twitza xitul, b'ajx kub'a' xitu'nxi'ya;

nnoktzaqpaja q'ojil kyi'ju' b'a'n kyten tuk'i'la, atzunta mix-a'lo' nokmiltz'uj ti'ja!

Ajtb'aj xituna, kb'el najsa'na,

ajtb'aj q'ojina, k'okyel q'oj ti'ja.

2Taye, q'aq'antz tk'u'ja qi'je',

nqo ayone' teya.

Awta o'nb'ilqeye' tkyaqil prim,

kolb'ilqeye' toj tq'ijlalil ch'uẍ.

3Nche kub' oqju' tnam ajt-xikyb'i'n tq'ojq'ojel twi'ya,

ajtyolina nche b'ajxsputju' nimaqtnam;

4naku'j ẍt'ikt'u'l kyajq'oj jupliqe' kyib'aj,

che b'el lik'puj kyib'aj ex k'elelkyiq'i'n kyq'inumal.

5Ate Qman Dyos tib'aj tkyaqil, najli toj kya'j;

matxi' tzaj tq'o'n ttzinunal ex tnik'alilti'j toj Syon,

6xq'uqi'n tu'n kukxju'.

K'uwenjte' nab'l ex ojtzqib'l te kolb'il;

q'inumalte' ati tchi Qman Dyos qe.

7¡B'inxpe'ya nche oq'ju' kuw che q'ojin toj b'e

ex nche oq'ju' chq'o'nqe' yolil tu'n tten nak'b'il!

8Tz'inun kyoju' b'e

mix-a'lo'te nb'et kyoj.

Mache kub' xitju' yol kyejni b'entti'j exqe' nk'u'ntlkyi'j;

mixti'xte xob'il ti'j jun ti'xti'.

9Toj b'is ta'ju' tx'otx',

xi' tkub' tzqiju' Lib'ano toj tch'ixaw,

matxi' kyej chq'ajlajixju' b'ya' Saron,

matxi' kub'sji'lixju' B'asan exju' witz Karmelo.

10Ntma'n Qman Dyos kjalu:

Kjawil wiq'i'n wib'e' ja'lo;

kxel nyek'u'ne' tkyaqil wipumale' ex woklene' ja'lo.

11Ttxa triy ex tz'is qekye' kxime' ex kyaq'une';

che b'ajele' tu'n nxewe' naku'j tu'n q'aq'.

12Che b'eltza'jixkye' tnam;

che b'ajel kse'n ch'i'x toj q'aq'.

13Kyb'intzju'ye' matxi' nb'inchaye' aye'ye' najchaq ta'qe'ye',

aye'tzune' nqaku' ta'qe'ye' tz'elx kynik'e' ti'ju' wipumale', chi Dyos.

14Nche lu'lunkye' xjal aj il toj Syon,

ex majx ntzaj tchi kyi'ju' b'inchal myab'a'n ex nkyma'n:

¿Alxi'xkye junqe jaku' b'ent tanq'in

toj jun q'aq' nxitun, toj jun q'aq' nk'ant tejumajx?, chechij.

15Alkyete nnanq'in toj tu'me'lxi'x ex nyolin ax,

alkyete min jaw q'inumax tu'n sb'ub'l

ex min ntq'o'ntib' naq tu'n jun oyaj,

alkyete min nxitb'i'n yol ti'j b'yojxjali'n,

ex min nok tq'o'n twitz ti'j myab'a'n,

16atzunte k'anq'ilju' b'a'n,

kkletel toj jun ja kuwsa'n kyu'n pik,

ktenb'el twa kukxju' ex lay b'aju' ta.

17K'okyel tka'yi'n jumajtlju'ya nimaqkawil toj tajwalil;

che kxe'l lq'eju' nqach teju' tnam najchaq.

18Ajttzajtna'na xob'il kse'n sanq'ina'ya nejtl, ktma'ya:

¿Jatzunta'ju' intoq ajlan chojb'il te tnam?

¿Jatzunta' ntoq ik'twitz ti'ju' malb'il?

¿Jatzunta' nik'ultekyten ja nimaq kywe'?, chiloya.

19Lay tz'anq'intla toj jun tnam mixti' tnab'l,

ch'uẍ tu'n tkane tyol,

chukjni tyol, mix-a'lo'x neltnik' ti'j.

20Ka'yinxpe'ya Syon, aju' nintnam janik'seta' qtzalajb'il;

ka'yinxa Jerusalen, aju' nintnam q'uqlixi'x tk'u'jlalil;

k'okyel kse'n kyxmuj xjal majx ati,

lay che jawxb'oqli t-stakyil

ex lay che laqju' taqwilil.

21Atzu' nkub'tyek'u'na' Qman Dyos tajwalil.

Jun najb'ilte' ja ta'qe' nin a', ex tnimal a' nim kywitz,

extzun lay tz'elkyiq'i'n ajq'oj

kyuk'i'l kyb'ark naqlmo'nqe' ex kyb'ark nim kyipumal.

22-23Lay kyipa kyaqwililju' b'ark lu

tu'n kytzyetju' tze wa'lqe' kyoj

lay b'ent kyk'letju' xb'alun lmolkye b'ark tu'n kyb'et.

Nim q'inumal k'elel qiq'i'n kyej ajq'oj,

naqpena' kox che elel q'inte tuk'i'l kye

ex siktenilqe' che okyex elq'alkye.

Qu'n a Qman Dyos ajkawil qe,

ate b'inchal kawb'il qib'aj ex qnimaqkawil,

ex a kklolqe.

24Mix-a'lo'te najli tojku' tnam tu'n tmante: Yab'qine', chiwt.

Kb'el tnajsa'nte Qman Dyos kyilju' xjal toj tnam Syon.