1 Ts 3 - Mam Ostuncalco Bible

1Mixtzunti' ik'xtl qu'ne' tu'n tex txqantl tq'ijlalil, kub' qxima'ne' tu'n qkyaje' o'kxtzu' toj Atenas

2ex tu'n txi' qchq'o'ne' qitz'in Timotey, tmajin Dyos ex onil quk'i'le' tu'n tpakb'et tpakb'al b'a'n tu'n Krist. Xiqchq'o'ne' onilkyeye' ex kuwsal kyeye' toj kyokslab'le',

3tu'ntzun mix-a'lo' kub' chukji kyu'n yajb'ilkyeye' lu. Kanli kwitze' ilxi'xti'j tu'n kyik'xju' yajb'il lu qu'n.

4Expe' tej ato'xtoqe' kxole', xiqab'tzi'ne' kyeye' qa atitoq tu'n kyi'kxu' yajb'il lu qu'n; kanli kwitze' ikxtzun ik'a'ju'.

5Qu'mtzun, ayine', min ik'xtl wu'ne' tu'n tex txqantl tq'ijlalil, xinqani'n tpakb'ale' se'ntoq ta'qeye' toj kyokslab'le', nchin xob'e' qaj nche okku'ye' toj joyb'ilkyi'je' tu'n tajaw il ex jaku' naq kub' naju' qaq'unb'ene'.

6Atzu'n ja'lo matxi' tza'ntzti'j Timotey Tesalonik, ex matzul tiq'i'n b'a'n tqanil ti'ju' kyokslab'le' ex kk'u'jlalile'. Matzul tma'n qa nqo tzaj kna'ne' tuk'i'l kk'u'jlalile', ex kyajb'ilxi'xe' tu'n qok kka'yi'ntle' kse'nxqe' qajb'ile' tu'n kyok qka'yi'ntle'.

7Qu'mtzun e'ntzik ex e'witz'in, toj tkyaqilju' yajb'ilqeye' ex qb'ise', maqe qk'u'je' b'a'nxi'x tej xqb'inteye' ljo'n kyu'ne' wa'lqe'ye' toj kyokslab'le'.

8Matentl qipumale' tej qb'inteye' wa'lqe'ye' toj kyokslab'le'.

9¿Se'n tu'me'l jun aq'b'il chjonte tu'n qq'onteye' te Dyos kyi'je' ex tu'nju' ma'xi'x qo tzalaje' twitz Dyos?

10Nxi' qqani'ne' te Dyos q'ijtl ex qonik'an tu'n tq'onte anb'il qeye' tu'n kyok ku'xi'x qka'yi'ne' ex tu'n qonine' tu'n tqexi'x kk'u'je' toj kyokslab'le'.

11Axwit Qman Dyos ex Qajaw Jesus tz'onin qeye' tu'n tb'ant qxi'ye' ka'yilkyeye'.

12Ex che ch'iyxwite' tu'n Qajaw ex tenxwitl kk'u'jlalile' kxolilexe' ex kyi'j kkyaqil, kse'nqe' nche qk'u'jla'ne'.

13Awt Qajaw kuwsan kyeye', tenxwit kyanmiye' ẍtilun ex mixti' ktz'ilile' twitz Qman Dyos ajtultl Qajaw Jesus kyuk'i'l kkyaqilju' ttanam xjan. Ikxwitju'.