Lm 4 - Mam Ostuncalco Bible

TKYAJI'N OQ'E'N (4.1-22)

1¡Matxi' kub'sju'kixju' q'anpwaq!

¡Min nqoptz'atlju' tb'anil q'anpwaq!

¡Jaxja pak'a'jqe'tl tab'jilju' ja xjan

kyojile xky'ichb'e!

2Aye'kyej aj Syon, kye kyilwi',

ikytoq kyoklenju' kse'n q'anpwaq,

atzu'n ja'lo nche senjtz kse'n tx'otx' k'wil

jun xjalxi' b'inchalkye.

3In pena' xikyq'o'n ttxu ẍal kyimi'ẍ

tu'n kych'u'n kyal,

atzunte' ntaname' matxi' tz'ok tx'u'j

naku'j pich' ab'estrus tb'i toj chq'ajlaj.

4Inche k'wajti tal ne'ẍ

nok lak'e kyaq' toj kyk'o'n.

Nkyqani'n tal k'wal kywa,

ex mix-a'lo'x jun nxiq'onte kywa.

5Aye'kyej inxi'xtoq che wan b'a'nxi'x nej

nche woqojla tu'n we'yaj kyoj b'e ja'lo.

Aye'kyej ẍeb'ajch'iy toj q'inumal,

inche anq'in toj tkb'el tz'is ja'lo.

6Nimxi'xte' tilju' ntaname'

kyetwitzju' til Sodom,

aj mix-a'lo'te q'ojin ti'j

tej tkub' xitu'n toj jun kmujx.

7Saq qexi'xju' t-xjal sk'o'nqe' twitz txun che'w

saq qexi'x twitz ta'l mi'ẍj;

kyaqxi'x ka'yin kyxmilal kyetwitz tal ab'j koral;

tb'anil ka'yin naku'j ab'j sapiro.

8Atzu'n ja'lo qxopinxi'x che ka'yin twitz qlolj;

mix-a'lo'x jun jaku' tz'el tnik' kye toj b'e.

Nnoktzqij kytz'umal ti'j kyb'aqil,

¡Matxi' tz'oktzqij naku'j si!

9Axte b'a'n kse'nqe' ẍe kyim toj q'oj

kyekywitz ẍe b'aj kyim tu'n we'yaj,

qu'n ch'i'naq kykyim

tu'n tpaj min xknetl kywa.

10Tu'nku' kyq'ob'ju' txub'aj b'a'nxjalqe'

eb'ajku'x kytzq'ajsa'n kyal;

ayexju' kyej eb'ajx kychy'o'n

tej tkub' xitu'n tanmi ntaname'.

11Elb'aj tq'oj Qman Dyos,

ojexi'x q'ojin tu'n ttx'u'jil;

oktq'o'n tq'aq'al Syon

expe' majx kub't-xitu'n tq'uqlil.

12Mixti'x xikyoksla'n nimaqkawil,

intoq che kawin toj tkyaqil twitz tx'otx',

qa jaku'toq tz'okxju' ajq'oj,

kyoju' ttzi Jerusalen.

13¡Tkyaqil ja'lu tu'n tpaj kyilju' kysanjelal,

ex tu'n tpaj kyilju' kypale,

tojxpe'ju' nintnam

b'aj qojli kychk'elju' mixti' kyil kyu'n!

14Inche takajla ajkyb'et toju' nintnam

naku'j mo'ẍqe'.

b'ajniqe' tx'a'j toj chik'

mix-a'lo'x jun noktzyunte kyxb'alun.

15Nxi'x jawkyẍch'i'n witzleb'il kjalu:

¡che lq'emile', che lq'emile',

tz'il qekye' xjal lu, lan che okkytzyu'ne'!

Naq nche b'etenje kye'lu b'je'xniqe' oq,

lay b'ent kyanq'in tzalu, chechij.

16Twitzku' Qman Dyos ẍe'xa' slamja',

ex min ẍetzaj tka'yi'ntl.

Min exi' oksla'n pale

ex min tzaj q'aq'an kyk'u'jlalilju' tijwnaq.

17Intoq che ch'yon qwitze', ex inxtoq qo ka'ylaje',

tu'n qtzaj onine', mixti'xte'.

Intoq qo ayone' tu'n tul jun tnam

ju' layxtoq b'ent tkolon qi'je'.

18Xq'uqi'n qo'ye' kyu'n jamaqo'xa'ye';

layx b'ent qexe' toj b'e.

Naq ch'i'ntl to'ka'ye', matxi' qoq'naxe';

¡matxi' japun toj qq'ije'!

19Ojqelxi'x kyelju' ljolte toj qa'ije'

kyekywitz q'anjel twitz kya'j;

xla'ja'nqo'ye' kyu'n kyoj k'ul,

¡nkub' kyq'o'n xpatxab' qeye' toj chq'ajlaj!

20Matxiq'i'n sk'o'n tu'n Dyos tojapub'l,

jaq'uqla'toq qk'u'j,

aj nimaqkawil intoq qma'n ti'j:

Tjaq' t-xlekumal qo anq'ila' kyxol tnam, qochij.

21¡Tze'na ex tzalajxa, nintnam Edom;

aya nkawina toj tx'otx' Us!

¡Ex kpomelju' k'wab'j k'a teya,

ktx'u'jtela b'a'nxi'x tu'n ex ksanajlab'ila!

22Matxi' pon b'aju' tz'e'ysb'il twitza nintnam Syon;

lay tz'exq'i'ntla toj juntl tx'otx' tu'n Dyos.

Atzunta Edom, kb'el ttz'e'ysa'n twitza,

ex che b'eltyek'u'nju' tila.