2 S 10 - Mam Ostuncalco Bible

Kub'kyi'j aj Siryo ex aj Amon tu'n Dab'i(1 Cr 19.1-19)

1Tik'lenxi'tzun jte' q'ij kyim Naas, nimaqkawil kye aj Amon, atl Anun ju' tk'wal kawin te t-xel.

2Kub'tzun t-xima'n Dab'i tu'n tk'u'jlante Anun, tk'wal Naas, kse'nx tb'inchaju' tman te, e'xitchq'o'ntzun jte' nejeneltz kye t-xjal te q'oj q'olb'elte Anun tu'n tpaj kyimju' tman. Atzunj kyponju' nejenel kye t-xjal Dab'i toj kytanam aj Amon,

3xikyma'nju' kynejel aj Amon te Anun, ju' kynimaqkawil: ¿Oktzun xe'l toksla'na qama che tzaj t-sma'n Dab'i xjal lu q'olb'elteya, ex k'ol chjonte tu'nju' tb'incha tmana te? ¡Naqlo ẍe' ulkye' xjal lu ka'yilte ex nenulte nintnam tu'n tkub'kyxitu'n!, chechij.

4Tchaq'tzun Anuntz tu'n kykub' tzyu'n nejenel kye t-xjal Dab'i, ex tu'n tel jon nik'jan kyxmatzi ex tu'n tkub' laqu'n nik'janju' kyi'j, ku'pumnix twi' kẍo'p. Eb'aj anj tchq'o'ntzuntz.

5Tetzunj tb'inte Dab'i, tchaq' tu'n kyxi' k'lub'aj tu'n mlalon tz'el kych'ixaw, ex tu'n txi' q'ma'n kye tu'n kykyajten Jeriko ex tu'n kyanjtz tzmaxi' ajtb'aj ch'iyju' kyxmatzi.

6Ex kane toj kywitz aj Amon qa matxi'toq che ok te tajq'oj Dab'i, qu'mtzun kychoj kab'mutx' lajk'al (20,000) xjal aj Siryo te q'oj te B'et-reob' ex te Sob'a, kab'k'al lajnaq (1,000) te nimaqkawil Maaka, atzun junmutx' lajk'al (12,000) te Is-tob'.

7Tb'itzun Dab'i ex xitchq'o'n Joab' kyuk'i'l kykyaqil t-xjal te q'oj.

8Eb'je'tztzun aj Amontz ex kub' kytxoli'n kyib' tu'n kyq'ojin ttziju' nintnam, aye'tzunkye' aj siryo, te Sob'a ex te Reob', exqe'ju' t-xjal Is-tob' ex te Maaka e'kub'ten toj kojb'il.

9Tetzunj tka'yinte Joab' tej kytzaj niq'j ajq'oj twitz ex ti'jxi', eb'jaw t-sk'o'nju' t-xjal te q'oj aj Israel kuwxi'x che q'ojin, tb'inchatzun tib'tz tu'n tq'ojin kyi'ju' aj siryo.

10Aye'tzun txqantl e'kyaj tq'o'n tjaq' tkawb'il Ab'isay ju' titz'in, tu'n kyq'ojin kyi'j aj Amon,

11ex xitma'n te: Qama tka'yiya xi'toq qkub'e', wixkukytzaje' onilqeye', qatzun matxinka'yine' xi'tkub'kyi'je', qo xe'le' onilkyeye'.

12Kuwxa, ex qoq'ojin tu'n tkyaqil qipumal tu'n tkletju' ninqtanam ex nimaqttanam Qman Dyos. ¡Ex tb'inchaxwittzun Qman Dyosju' b'a'n toj twitz!, chij te.

13Xi'tzun Joab'tz kyuk'i'l t-xjal q'ojil kyi'j aj siryo, aye'tzunkye e'kub' oq twitz.

14Tetzunj kyka'yinte aj Amon e'kub' oqju' aj Siryo, ex e'kub' oqkye twitz Ab'isay, eb'jo'kx toj nintnam. Mixtzunti'tl ok il Joab' tu'n tq'ojin kyi'j aj Amon ex anjti'j Jerusalen.

15Tetzunj kyka'yinte aj Siryo qa matxi'toq kub'kyi'j kyu'n aj Israel, b'aj kyb'u'yi'n jumajtlkyib'.

16Tchaq' Adad-eser tu'n kyxi' q'ib'aju' siryo ate'toq jlajxi' nin a' Ewprates, ex e'pon Elam. Nejlitoq Sob'ak kywitz, nejenel kye t-xjal Adad-eser te q'oj.

17Naqtzun inb'ent tb'inte Dab'i ja'lu, eb'aj tb'u'yi'n kykyaqil aj Israel te q'oj, ex e'jlajin a' Jordan ex e'pon Elam. Atzuntzu' eq'ojina' aj Siryo tuk'i'l Dab'i, ex oktilil kyu'n tu'n tkub' Dab'i,

18tetzunj kyka'yinte xi'toq tkub'kyi'j, e'kub' oq kywitz aj Israel, qu'n matxitoq che kyim jo'mutx' (40,000) xjal ti'j chej, atzun junk'al o'lajnaq (700) iq'i'n kykarwaj te q'oj; expe' tak'xi'x Sob'ak ju' nejenel kyeju' xjal aj Siryo tu'n Dab'i, ex axtzu' kyaja' kyim.

19Tetzunj kyka'yinte kykyaqilju' nimaqkawil q'o'ntoq kyib' tuk'i'l Adad-eser matxi'toq che kub' kyu'n aj Israel, e'yolin tu'n lan che q'ojintl kyuk'i'l aj Israel ex e'kyajten tjaq' kykawb'il. Atxi'xtzunj exob' aj Sirya tu'n kyonintl kyi'ju' aj Amon.