Pr 16 - Mam Ostuncalco Bible

1Ate' xjal nkub' ximante';

tojtzun tq'ob'te' Dyos ta' qa kjapumel.

2Tkyaqilju' ntb'incha'n xjal b'a'nile toj twitz,

atzunte Dyos inq'mante qa b'a'n mujqa mya.

3Q'onku'ya taq'una toj tq'ob' Dyos

ex tkyaqilju' t-xima che japumel.

4Kub' tch'isa'n Dyos tkyaqil tuk'i'l jun tb'is tk'u'j:

ikxpena'ju' b'inchal myab'a'n toj mankb'il tq'ijlalil.

5Myab'a'n qe' nkynima'n kyib' toj twitz Qman Dyos;

qu'n ilti'j kb'el tz'e'ysa'n kywitz.

6Nkub'najsetju' il tuk'i'l ax ex tk'u'jlalil;

qa nqnima'n Qman Dyos, nel qpa'nqib' ti'ju' myab'a'n.

7Qa ntzalaj Dyos ti'ju' tu'me'l tz'anq'in jun xjal,

b'a'npe' nche tena' tajq'oj tuk'i'l tu'n Dyos.

8Ate b'a'nju' ch'i'n kanb'ab'l toj tnik'alti'j,

Kyetwitz txqan myab'a'n kanb'ab'ente.

9Ate' xjal nk'ulte t-xim,

atzunte Dyos kẍaqlulte tu'n tb'inchet.

10A Qman Dyos noninte' nimaqkawil tu'n tyolin toj tnik'alti'j

tu'n min tmaya' tz'e'ysb'il witzb'aj mya tojtu'me'l.

11Kanliyile qekye' malb'il twitz Qman Dyos;

qu'n ate b'inchalkye kykyaqil.

12Myab'a'n nela' nimaqkawb'il qama tb'incha jun taq'wixil,

qu'n nojqelan tu'n tkawin toj tnik'alilti'j.

13Nche tzalaju' nimaqkawil kyi'ju' xjal

qa nche yolin toj tnik'alilti'j ex njapun kyol.

14Aju' ttx'u'jil nimaqkawil jun techlal kamik,

atzunju' xjal ati tnab'l kymyetil tu'n.

15A b'a'nju' qa ntzalaju' nimaqkawil,

iky t-xtalb'ilju' kse'n ajtetz tqan jb'al.

16Ate b'a'nju' nab'l kyetwitz q'anpwaq;

ex ikx qa k'atzqwi' kyetwitz saqpwaq.

17A kynuk'b'il tnik'alkyi'ju' tu'n tel kypa'n kyib' ti'ju' myab'a'n;

nkyxq'uqi'n kychwinqlal qa nxikyka'yi'nkyib'.

18Tu'nju' nimjtib'il ntzaja' xitb'il;

ex tu'nju' la'jtib'il kb'el tz'aqi.

19Ate b'a'n tu'n qok prow kyuk'i'lju' me's

kyetwitz tu'n qok q'inun kyuk'i'lju' nkynima'kyib'.

20Aju' b'a'n nuk'ul b'a'n nela taq'un;

¡k'i'wla'nte' xjal q'uqlok tk'u'j ti'j Dyos!.

21Alkyete nkub' t-xima'n b'a'nxi'x, ati tnab'l;

alkyete' b'a'nyolin lwiy nkub' qi'j tu'n.

22T-xiklil a' te' te chwinqlal qa ati qnab'l;

xnakyilxte' tu'n kyxnaq'tzetju' xnakqe'.

23Alkyete' nkub' t-xima'n tyol,

majx kyexi'x tb'inxju' tyol.

24Ikyqe' tb'anil yolju' kse'n ta'lkab' kyu'n onon:

najb'en te kyq'a'nb'il xjal.

25Ati b'e naku'j tzinun kyi'j toj twitz xjal,

ajtzun tpon b'aj tb'eyil kamikte'.

26B'a'nte' qa nqo' we'yajti qu'n noktilil aq'untl;

tu'n tqe tk'u'j.

27Iky b'inchal myab'a'n kse'n jun chuj njayun;

¡naqpena' tyol naku'j tqan taq' q'aq'!

28Aju' b'inchal myab'a'n noq njyon q'oj;

exju' njk'unyol noqx nik'u'n kyxol tuk'i'l.

29Aju' kuw ttx'u'jil inche kub' t-sb'u'n tuk'i'l

ex nche' txalpuj tu'n.

30In txmutz'b'e'n twitzju' xjal nximan tu'n tb'inchan il;

atzunju' matxi' b'inchan il, naq nkub' ttx'a'n t-xe twitzte.

31Jun ninb'ilte' t-xya'mal twi' xjal saqtl,

kanb'ab'l tu'nju' tb'anil tchwinqlal.

32B'a'nxte' ati qpasens kyetwitz kuw xjalqo';

b'a'nte' tu'n qjk'unteqib' kyetwitz tu'n tkub'kyi'j nimaqtnam qu'n.

33Aye' xjal nkyqani'n kychwinqlal b'a'n,

atzunte' Qman Dyos q'malte qa b'a'n mujqa mya.