2 S 16 - Mam Ostuncalco Bible

Yolin Dab'i tuk'i'l Sib'a

1Naqtzun ch'i'n tik'len b'et Dab'i ti'jxi' witz, tej tetz Sib'a ju' tmajin Mepi-b'oset, k'lulte. Kyuk'i'l kab'e' b'ur iqa'n lajnaq (200) wab'j kyu'n, ex jo'naq (100) muqin tzqijsa'n ub'a, ex jo'naq (100) lob'j atitoq toj tq'ij ex jun tz'u'n b'in.

2Xi'tzun tqani'n nimaqkawil te:

—¿Ti'tzu'n tajb'enju' lu saj ti'na?, chij.

Xi'tzun ttzaq'we'n Sib'a te:

—Aye' b'ur tu'n kyxi' kyiqa'n toj tjaya nimaqkawil; aye'tzu'n wab'j exqe' lob'j tu'nt-xi' kywanju' t-xjala te q'oj, atzu'n b'in te kyk'wa'ju' mache kub' sikti toj chq'ajlaj, chij.

3Xi'tzun tqani'n nimaqkawil te:

—¿Jatzunta' tchmanju' tajawa?, chij.

Atzunte Sib'a xittzaq'we'n te:

—Makyajten Jerusalen, qu'n toj twitz qa k'anjel kyanjsa'n aj Israel tkawb'il qtzan tchman te ja'lo, chij.

4Xi'tzun ttzaq'we'n nimaqkawil te:

B'a'natzun, ja'lo tetla tkyaqilju' tetoq Mepi-b'oset, chij.

Atzunte Sib'a xittzaq'we'n majx kub'joqe twitzju' nimaqkawil:

—¡Kukxwit wilwiju'ye' tu'na nimaqkawil!, chij te.

5Tetzunj tponju' nimaqkawil Dab'i toj B'awrim, okyal jun ichan tyajajil Sawul twitz. Tk'wal Wera, Simey tb'i, okten ililte Dab'i

6ex intoq xon ab'j ti'j Dab'i ex kyi'j kykyaqilju' nejenel kye t-xjal; extzun xq'uqi'ntoqju' nimaqkawil kyu'n t-xjal ex kyu'n kykyaqil xjal,

7atoktoq Simey yasulte kjalu:

—¡Kuxtxi'ya tza'lu, myab'a'n xjal, b'yol wnaq!

8¡Matxi' kub' tz'e'ysa'n twitza tu'n Qman Dyos tu'n tpaju' txqan toj tja Sawul eb'aj kub' tb'yo'na naq tu'n toka kawil te t-xel! ¡Atzu'n ja'lo matxi' txi' tq'o'n Qman Dyos tkawb'ila te tk'wala Ab'salon, lutzuna inkub' tchjo'na txqan tila ja'lo, qu'n b'yolxjal na'ta!, chij te.

9Atzunte Ab'isay, tk'wal Seruya, xitma'n teju' nimaqkawil:

—¿Ma naqtzun in nik'xtu'na nimaqkawil, tokju' tchi' k'utz xjal lu ililteya? ¡Machine' k'uẍpilte twi'! chij.

10Atzunte nimaqkawil xittzaq'we'n te:

—Mixti'ta toklen ti'j, tk'wal Saruya. Tok te'lu yasulweye', chq'o'nlote' tu'n Qman Dyos. Extzunqa ikju', ¿alxi'xkye jun b'a'n tu'n txi' qaninte te titi' intb'incha'n?, chij.

11Ex xitma'n kye Ab'isay ex kye kykyaqilju' nejenel kye t-xjal, kjalu:

—Aku'pena' nk'wale' tajb'il tu'n nkub' tb'yo'ne', ¡mitzunloya jun tyajajil B'enjamin! ¡Kyq'onkje' tu'n tmante taq'wix wi'je', chq'o'nlo tu'n Qman Dyos!

12Qape' ajtka'yinte Qman Dyos yajb'ilweye', chin tk'i'wla'ye' te t-xelju' qanb'en in nb'i'ne' ja'lo, chij.

13Xi'tzun tljo'n Dab'i tb'e kyuk'i'lju' t-xjal, atzunte Simi xi'xa'tl tk'u'jile witz, junx kyel tuk'i'l Dab'i nyasun te, in xon ab'j ex in tchto'n quq.

14Tetzunj tponju' nimaqkawil kyuk'i'lju' xjal lepchqe'toq ti'j ttziju' nin a' Jordan, matxi'toq che kub' sikti, ex e'ojlan atzu'.

Okx Ab'salon toj Jerusalen

15Atzuntlte Ab'salon okx toj Jerusalen, lepchqe' kykyaqilu' aj Israel tuk'i'l Ayitopel.

16Ex xi' usay ju' arkyit, tamiw Dab'i, k'lulte Ab'salon, intoq ẍch'in kjalu:

—¡Nimanjtzxwitu' nimaqkawil!, chij.

17Xi'tzun tqani'n Ab'salon te:

—¿Ma atzun xtb'inchaju'ya teju' tamiwa? ¿Tiqu'ntzun min xxi'ya tuk'i'l?, chij.

18Atzunte usay xittzaq'we'n te:

—Lay b'ent, qu'n atzu' tu'n ntena'ye' tuk'i'lju' matxi' jaw t-sk'o'n Qman Dyos ex kyu'n kykyaqilju' tnam aj Israel.

19Ex juntl, qa ati tu'n wajb'ene' te juntl, atzu' tu'n wajb'ena'we' te tk'walju' wamiwe'. Qu'mtzun chin ajb'elwe' teya nimaqkawil, kse'nxju' matxi' chin najb'ene' te ttatiya, chij.

20Yajxi'tzuntel xitqani'n Ab'salon te Aytopel:

—¿Titi'kye' nkyma'n, titi' qb'incha' ja'lo? chij.

21Atzunte Ayitopel xittzaq'we'n te:

—Kẍeku'ya kyuk'i'lju' tqya tmana, ẍekyaj tq'o'n xq'uqilteju' ja te kawb'il. Kkaneb'eltzuntz toj kywitz kykyaqil aj Israel qa matxi' tz'el tik'uma'na twitz ttatiya, Iktzu'n kkyiq'i'xi'xtl kyib'ju' kyekyten tuk'i'la, chij.

22Kub'tzun b'incha'n jun pach xb'alun te Ab'salon tib'ajxi'ju' ja, atzuntzu' oka' ten jwolkye tqya tman kywitz kykyaqil aj Israel;

23qu'n aj txi' qanit jun nab'l te Ayitopel toju' tq'ijlalil lu, ikxtoq inela'ju' kse'n inxi' jyet nab'l toj tyol Dyos. Nimxi'xtoq toklen Ayitopel te Dab'i ex te Ab'salon.