1Tzaj jumajtl ttx'u'jil Qman Dyos kyi'j aj Israel, ex kub' tq'o'n toj tanmi Dab'i tu'n tjaw tiq'i'ntib' kyi'j, tchaq' te tu'n tjawtiq'i'n jun kyajlal aj Israel ex aj Juda.
2Tchaq'tzun nimaqkawiltz te Joab', kynejel xjal te q'oj xq'uqilte:
—Kutxi'ya kyxol kykyaqil tnej tyajajil Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, ex iq'i'nktza kyajlal, tu'ntzun nb'inteye' jte' b'a'nqe' te q'oj, chij.
3Atzunte Joab' xittzaq'we'n te nimaqkawil:
—Awt Qman Dyos chmet-santexi'xju' ttanam twitzju' ati ja'lo, ex tenxwit tchwinqlala nimaqkawil tu'n tka'yinteya; naqtzun a, ¿titi' k'ajb'ela' teya tu'n tjaw ti'na kyajlal?, chij.
4Ilxi'xtzunti'j xitb'i'n Joab' exqe' nejenel kye xjal te q'oj, tchaq'b'ilju' nimaqkawil, e'etztzuntz twitz nimaqkawil tu'n tjawkyi'n kyajlalju' tnam Israel.
5E' ik'x jlaju' nin a' Jordan, tzyettzuntz kyu'n toj Aroer ex toju' nintnam ati toj nky'ajchaqju' b'ya', tu'me'l Kad ex Jaser.
6Kyik'lenxi'tzun atzu', exi' Kalaad ex Kades, kytanam itit. E'pontzuntz Dan, tzmaxtzuntzu' anjtza'kyi'j tu'n kypon Sidon.
7Yajxi'tzuntel exi' toju' ja kuwsa'n toj Tiro ex kyoj kykyaqil nimaqkytanam eb'ey ex aj Kanaan, tzmax kyelpun yal toj tnayaj Juda, tu'n tpon B'eerseb'a.
8Tetzunj tjapun b'eljoj xjaw tuk'i'l junaq (20) q'ij, tb'ajlenxi' kyb'eti'n tkyaqilju' tx'otx', e'pon Jerusalen.
9Xi'tzun tq'o'n Joab' tajlalu' tnam teju' nimaqkawil, atitoq jo'naq mutx' (800,000) ichan b'a'nqe' te q'oj kyxol aj Israel, atzun oxnaq kab'mutx' lajk'al (500,000) kyxol aj Juda.
10Eltzun tniky' Dab'i qa a ati tpaj tu'nju' tchaq' tu'n tjaw kyajlalu' tnam, ex jatz tpa'n til twitz Qman Dyos:
—Matxi' chin nb'incha jun nin ile', tu'nju' xnb'inchaye' lu. Qu'mtzun b'inchama xtalb'il Taye, chin tnajsama ja'lo, qu'n mixti' ẍin ximane' ti'j, chij.
11Tetzunj tjawe' Dab'i te prim toj juntl q'ij, xitma'n Qman Dyos te Kad ju' sanjelal, janxjeluna' Dab'i:
12Kutxi'ya tk'etz Dab'i, ex q'manxa oxe' ti'xti' nkub' nq'o'ne' twitz, tu'n tjaw t-sk'o'n jun kyxol alkye tajb'il tu'n nb'inchanteye', chij te.
13Xi'tzun Kad tk'etz Dab'i, ex xitma'n te:
—Matzaj tma'n Qman Dyos weye' tu'n tjaw t-sk'o'na alkye b'a'n toj twitza: ma aju' oxe' ab'q'i we'yaj toju' tx'otx', mo aju' tu'n toq oxe' xjawa kywitzju' tajq'oja, mujqa oxe' q'ij tx'u'j yab'il toju' tx'otx'. Ximankutzuna ja'lo, ex sk'o'nktza tu'ntzun txinma'ne' te Qman Dyos, chij.
14Atzunte Dab'i xittzaq'we'n te Kad:
Matxi' chin jtz'ete'. Ja'lo ate b'a'nju' aku' Qman Dyos k'okyel tq'ob' qi'je', qu'n nimte tk'u'jlalil, kyetwitz toj kyq'ob' xjal, chij.
15Tzajtzun tq'o'n Qman Dyos jun tx'u'j yab'il kyib'aj aj Israel, tzyet-x te prim lu, tzmax tjapunju' q'ij q'ma'ntl, ex eb'aj kyim wajxaqmutx' o'lajk'al (70,000) ichan, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j.
16Tetzunj naqxi'xtoq tu'n kykyimtlju' najlqe' toj Jerusalen tu'nju' anjl, exch'yonju' xitb'il lu toj tk'u'j Qman Dyos, xitma'ntzuntz teju' anjl b'iyol: ¡O'kxtzu'n, tky'i'xju'!, chij te.
Xi'toqtzun ta'ju' anjl toju' kmuj lu, ja ntriyina'toq Arawna ju' jeb'usey.
17Tetzun tka'yinte Dab'i, ljo'ntoq kyb'aju' tnam tu'nju' anjl, xitma'n te Qman Dyos:
—¡Ayinwe' ẍin b'inchal il! ¡Ayinwe' ti npaj! ¿Titi'tzu'n xkyb'inchaju' tnam lu? ¡Wib'ajwe' q'ontza'teju'ya tz'e'ysb'il witzb'aj lu ex kyib'aju' toj njaye'!, chij.
Jawtb'incha'n Dab'i jun q'olb'eb'l(1 Cr 21.18-27)18Tojxtzu'n q'ij lu, xi' Kad tk'etz Dab'i, ex xitma'n te tu'n tjaw tb'incha'n jun q'olb'eb'l te Qman Dyos, jatoq ntriyina' Arawna ju' jeb'usey.
19Xi'tzun Dab'i b'inchalte xitma'n Kad te kse'nxju' tchaq' Qman Dyos.
20O'kx txi' tka'yi'n Arawna najchaq, xi'toq ttzaju' nimaqkawil kyuk'i'lju' ajb'el te tk'etz. Tzajtzun nej Arawna k'lulkye, ex kub' tzipe twitzju' nimaqkawil,
21ex xitma'n te:
—¿Ti'tzun ch'i'nta twitqan nimaqkawil saja xb'etzalweye'?, chij.
Xi'tzun ttzaq'we'n Dab'i te:
—Wajb'ile' tu'n ttzaj tk'a'yi'na jantriyana'ya, tu'n tjaw nb'incha'ne' jun q'olb'eb'l te Qman Dyos atzu', tu'ntzun telju' tx'u'j yab'il toju' tnam, chij.
22Atzunte Arawna xittzaq'we'n te:
—Mixti'te' nimaqkawil, tzyumta' aju' b'a'nxi'x toj twitza, ex q'onku'ya chojb'il k'ok'sb'il. Luqe' tman wakx lu te chojb'il k'ok'sb'il, ex b'a'n tu'n kyajb'enju' pitxb'il exqe' tze ti'j kyqul wakx te si.
23¡Kxe'l nq'o'nwe' tkyaqilju' lu teya nimaqkawil!, chij te.
—Expe' tmatl Arawna:
—¡Kub'xwittzun tk'u'ju' Qman Dyos tu'na, nimaqkawil!, chij.
24Atzunte nimaqkawil xittzaq'we'n te:
—Chjontexi'x teya, naqtzun a knlq'a'we' kse'nxju' twi', qu'n lay kub' nq'o'nwe' chojb'il k'ok'sb'il twitz Qman Dyos qa mya nloq'oje'.
Ikytzu'n tloq' Dab'i tx'otx' lu exqe' tman wakx tu'n kab'naq lajoj (50) saqpwaq,
25atzuntzu' jawa' tb'incha'n jun q'olb'eb'l te Qman Dyos, ex e'kub' tq'o'n chojb'il k'ok'sb'il ex chojb'il te b'inchjtib'il. Tzajtzun tb'i'n Qman Dyos kub'sb'il ti'ju' tx'otx', ex eltiq'i'nju' tx'u'j yab'il toju' tnam Israel.
Who We AreWhat We EelieveWhat We Do
2025 by iamachristian.org,Inc All rights reserved.
