1Tchaq' Dab'i tu'n kyjaw b'incha'n tja toju' Ninttanam Dab'i, ex tu'n tb'inchet jun tkub'elju' kax k'ub'lte tchaq'b'il Qman Dyos toj jun ja xb'alun jawtb'incha'n.
2Tchaq'tzuntz: Mix-a'lo' juntl, myawt aj Leb'i, tu'n txi' iq'inteju' kax k'ub'lte tchaq'b'il Dyos, qu'n oje che jaw t-sk'o'n Qman Dyos aj Leb'i tu'n kyxi' iq'i'nte, ex tu'n kyajb'en kukxju' te, chij.
3E'b'ajtzun tb'u'yi'n kykyaqilju' aj Israel toj Jerusalen tu'n txi' iq'etju' tkax Qman Dyos toju' tkb'el ojetoq jawtb'incha'n.
4Ex e'tzaj tb'u'yi'n tyajajil Aaron exqe' aj Leb'i.
5Qaqnaq (120) e' b'uyet kyxolju' tyajajil Kyeat: a Uryel nejenel, exqe'tzu'n twitze'l.
6Junlajnaq (220) kyxolju' tyajajil Merari: a Asayiy nejenel, exqe'tzu'n twitze'l.
7Qaqnaq lajoj (130) kyxolju' tyajajil Werson: a Joel nejenel, exqe'tzu'n twitze'l.
8Lajnaq (200) kyxolju' tyajajil Elisapan: a Semayiy nejenel, exqe'tzu'n twitze'l.
9Kyajnaq (80) kyxolju' tyajajil Eb'ron: a Elyel nejenel, exqe'tzu'n twitze'l.
10Jo'naq kab'lajoj (112) kyxolju' tyajajil Usyel: a Aminadab' nejenel, exqe'tzu'n twitze'l.
11E' tzajtzun ttxko'n Dab'i ju' pale Sadok ex Ab'yatar, exqe' Uryel, Asayiy, Joel, Elyel, ex Aminadab', aj Leb'iqe',
12ex xitma'n kye: Kyxjansam kyib'e' twitz Dyos, e'nejenel kyeju' k'loj aj Leb'i, kyuk'i'lxi' kywitze'le', tu'ntzun tb'ent txi' kyiq'i'ne' tkax Qman Dyos ja matxi' kub'a' nb'incha'ne' tkub'el;
13mixnati' kyb'inchaye' ikyju' toju' tnejel maj, qu'mtzun eltiq'i'n Qman Dyos kychwinqlal junjun qxol, qu'n minti' o'xjelun te kse'nxju' tu'me'l, chi Dab'i.
14Kyxjansatzun kyib'ju' pale exqe' aj Leb'i, tu'n txi' kyiq'i'nju' kax te Qman Dyos.
15Xikyiq'i'ntzuntz kyuk'i'lju' tqul twi' kysemu'l kse'nxju' tchaq' Moyses tej ttzaj q'ma'n te tu'n Qman Dyos.
16Ex tchaq' Dab'i kyeju' nejenel kye aj Leb'i, tu'n txi' kyma'n kyeju' aj b'itzal kyxolju' kyyajajil tu'n kychinb'an tu'n tkyaqil kyk'u'j kyi'j tzintzin, arpa ex txijtxij te tzalajb'il.
17Xi'tzun kyma'n aj Leb'i te Eman tk'wal Joel, ex te Asap tk'wal B'erekyiy, twitze'l Eman; ex te Etan tk'wal Kusayiy, kyxolju' tyajajil Merari ex kywitze'lxju' tnejel;
18expe' xikyma'n kye jte'tl kywitze'lx, ju' tok kyoklen te tkab' ajb'el, aye': Sakariy, Jaasyel, Semiramot, Jeyel, Uni, Elyab', B'enayiy, Maaseyiy, Matatiy, Elipelew, Mekneyiy, exqe' xq'uqil ttziju' tja Dyos, aye' Ob'ed-edom ex Jeyel.
19Aye'toqu' aj b'itzal Eman, Asap ex Etan nche q'ajtzankye' txijtxij q'ank'uxb'il.
20Aye'tzu'n Sakariy, Asyel, Semiramot, Jeyel, Uni, Elyab', Maaseyiy ex B'enayiy, atiyiletoq kytzintzin tu'n kychinb'an tuk'i'l tq'ojq'ojil wich',
21aye'tzu'n Matatiy, Elipelew, Mekneyiy, Ob'ed-edom, Jeyel ex Asasiy, atiyiletoq ky-arpa tu'n kychinb'an tzinun toj twi', tu'n kytzyunteju' b'itz.
22Atzu'n Kyenaniy, nejenel kye aj Leb'i tu'n kyxi' iq'inteju' kax, intoq kub'nej ti'ju' b'itz, qu'n atitoq tojtzqib'l ti'j.
23Aye'toq B'erekyiy ex Elkana, xq'uqil ttzija teju' kax.
24Aye'tzu'n pale Seb'aniy Josapat, Natanael, Amasay, Sakariy, B'enayiy ex Elyeser, intoq che chinb'an kyi'ju' chun twitzju' kax te Dyos. Ex ikx xq'uqilqe'toq Ob'ed-edom ex Jeyiy ttzija teju' kax.
25E'xi'tzun Dab'itz kyuk'i'lju' tijwnaq kyxol aj Israel exqe'ju' nejenel kye junjun tnej xjal te q'oj tuk'i'l tzalajb'il tja Ob'ed-edom, iq'ilteju' kax k'ub'lteju' yol kyejni b'entti'j tu'n Qman Dyos.
26Tu'ntzu'n intoq onin Qman Dyos kyi'j aj Leb'i iq'iltetoqju' kax, e'kub' tz'e'ysa'n wuq tal wakx ex wuq rit te chojb'il.
27Oksa'ntoq jun t-xb'alun Dab'i tz'umin sed, exqe'ju' aj Leb'i iq'ilteju' kax kyuk'i'lju' aj b'itzal ex Kyenaniy, ju' nejenel tej txi' iq'i'nju' kax; expe' oksa'ntoq jun t-ẍa'y Dab'i sed.
28Kykyaqil aj Israel xikyiq'i'n kax k'ub'lteju' yol kyejni b'entti'j tu'n Qman Dyos, tuk'i'l sich' te tzalajb'il ex tuk'i'l kyq'ojq'ojel tuk'a rit, chun, txijtxij, ex kyuky'i'l chnab' tzintzin ex arpa.
29Tetzunj tponju' kax k'ub'lteju' yol kyej b'entti'j tu'n Qman Dyos toju' Ninttanam Dab'i, etz ka'yin Mikal tmyal Sawul toj jun tokexspik'un, tetzunj tka'yinte intoq b'ixin Dab'i tu'n ttzalajb'il, majx eltik'o'n.
Who We AreWhat We EelieveWhat We Do
2025 by iamachristian.org,Inc All rights reserved.
