Ez 48 - Mam Ostuncalco Bible

Kub' pa'yetju' tx'otx' kyxol tnej kyyajajil

1-7A kyb'i tnej kyyajajil ja'lu.

Ttzajx twitz nqach toj tb'a'nq'ob'kya'j, ntzajx ttzi ninnjab' Mediteraney in nik' Etlon, ttzi Amat ex Asar-enan, toj tnayajkya'j kye tx'otx' Damask ex Amat, teyile junjun tnej kyyajajil ktk'ma' jun tnej tx'otx' tzajx ttzi nqach toj tjawetzq'ij tu'n tpon toj tkub'exq'ij, a nuk'b'ente ja'lu:

Dan

Aser

Neptali

Manases

Eprayin

Rub'en

Juda

8Yajxi'tzuntl tzul toju' tx'otx' ati tu'n tkyaj kpa'n, ex ntzajx toj tjawetzq'ij tu'n tpon toj tkub'exq'ij. Kab'lajoj tk'i' nik'jan (12.5 Km.) kyilometr twitz, atzu'n tnuqub' kyinx echb'inteju' kse'n echb'inte junjuntl tx'otx' tzajx tjawetzq'ij tu'n tpon tkub'exq'ij. Tojtzu'n tx'otx' lu ktenb'ela' ja te k'u'lb'il.

Aju' tx'otx' xjansa'n te Qman Dyos(Ez 45.1-6)

9Aju' tnej tx'otx' xjansa'n te Dyos toju' tx'otx' lu, te kab'lajoj tk'i' nik'jan (12.5 Km.) kyilometr tnuqub' atzun lajoj twitz.

10Tojtzu'n tx'otx' lu ati jun tx'otx' xjansa'n noqxkyeku' pale; kab'lajoj tk'i' nik'jan (12.50) kyilometr tnuqub' toj tb'a'nq'ob'kya'j ex toj tnayajkya'j, atzun jwe' kyilometr twitz toj tjawetzq'ij ex tkub'exq'ij. Toj nky'ajchaqju' tx'otx' lu ktenb'ela' ja te k'u'lb'il.

11Kjel kletju' tx'otx' lu kye pale tyajajil Sadok, xjansa'nkyib' weye' ayine' Dyos Manb'aj, nche ajb'en toju' ajb'eb'l weye' ex min ẍe'xlpe kyi'ju' txqantl aj Israel tej tel kypa'n kyib' ti'ju' nb'eye', kse'n kyb'incha aj Leb'i.

12Qu'mtzun ktenb'el jun kytx'otx'ju' pale xjansa'nxi'x tk'etz kytx'otx' aj Leb'i toju' tnej tx'otx' xjansa'n weye' ayine' Dyos Manb'aj.

13Tk'etzxtzu'n kytx'otx' pale ktenb'ela' kytx'otx' aj Leb'i, te kab'lajoj tk'i' nik'jan (12.50) kyilometr tnuqub', atzun jwe' twitz. Kab'lajoj tk'i' nik'jan (12.50) kyilometr tnuqub' ex lajoj twitzju' tx'otx' tu'n tkyaqil ktenb'el xjansa'n weye' ayine' Dyos Manb'aj.

14A tb'anilxi'x tnej tx'otx' ja'lu toj tkyaqilju' tx'otx'. Mixti' tu'n tk'ayet jun piẍ ti'ju' tx'otx' lu mo tu'n tch'exb'et mo tu'n txi' te juntl xjal, qu'n xjansa'n weye'.

15Atzu'n jni'tl tx'otx' nkyajten, te kab'lajoj tk'i' nik'jan (12.50) kyilometr tnuqub' ex kab'e' tk'i' nik'jan kyilometr twitz, mya xjansa'n. Atzuntzu' b'a'n kynajana' xjal ex atzu' ta' kywab'l wakx. Ex toj nky'ajchaq ktenb'ela' nintnam,

16kb'el toj jun tnej tx'otx' te kyaje' ttx'u'k junelni, te jok'al kab'lajnaq lajoj (2,250) metr twitz junjun plaj.

17Ti'jeletzu'n nintnam ktenb'ela' kywab'l alu'mj toj kykyajel plaj, te qaqnaq jwe' (125) metr twitz junjun plaj.

18Kjelten jun tx'otx' tojile junjun plaj teju' nintnam tk'etzju' tnej tx'otx' xjansa'n weye' ayine' Dyos Manb'aj, jwe' kyilometr tnuqub' toj tjawetzq'ij ex jni'tl tkub'exq'ij. Kb'el aq'unetju' tx'otx' lu, atzu'n tawal kjawil k'ajb'el te kywa xjal nche aq'unan toju' nintnam.

19Alkyexku' tnej tyajajil Israel nche aq'unan toju' nintnam, kb'el kyaq'una'n tx'otx' lu.

20Tkyaqilju' tx'otx' klo'n, aju' tnej xjansa'n weye' ayine' Dyos Manb'aj, tk'i'xi' te nintnam, junx te kyaje' ttx'u'k junelni te kab'lajoj tk'i' nik'jan (12.50) kyilometr twitz junjun plaj.

Ttx'otx'ju' nkawin(Ez 45.7-8)

21-22Teju' nkawin kxe'la' tx'otx' xkyaj t-xontib' kyxolju' kytx'otx' Juda tuk'i'l B'enjamin; aye' tx'otx' ate' junjun plaj teju' tnej tx'otx' pa'n weye' ayine' Dyos Manb'aj exju' tx'otx' te nintnam. Kab'lajoj tk'i' nik'jan (12.50) kyilometr twitz, kpomelx toju' nqach tjawetzq'ij, ex kpomelx tkub'exq'ij toj ninnjab'. Kjeltenju' tnej tx'otx' klo'n weye' toj nky'ajchaq ayine' Dyos Manb'aj, tuk'i'l ja te k'u'lb'il, tk'i'xi' kytx'otx' aj Leb'i ex te nintnam.

Kytx'otx' txqantl tnej tyajajil Israel

23-27Majx xini kytx'otx' txqantl tnej tyajajil Israel tu'me'l tnayajkya'j. Teyile junjun tnej kyyajajil ktk'ma' jun tnej ttx'otx' tzajx toju' nqach tjawetzq'ij pomnix toj tkub'exq'ij, a nuk'b'ente ja'lu:

B'enjamin

Simeon

Isakar

Sab'ulon

Kad

28Aju' nqach tuk'i'l tx'otx' Kad te tnayajkya'j, ktzajelx Tamar, tu'n tik' ja ta'qe' t-xiklil a' Merib'a-kades ex jata' a' te Ejipt, tu'n tpon tzmax toj ninnjab' Mediteraney.

29Atzun tx'otx'ju' kyk'ma' tnej tyajajil Israel te kyetzb'il, ex ikytu'me'lju' tu'n txi' kypa'ne'. Ayine' Dyos Manb'aj nchin q'mante.

Aye' tjpel Jerusalen

30-34Kjpetel ti'ju' nintnam tu'n jun nintapi, te jo'k'al kab'lajnaq lajoj (2,250) metr tnuqub' junjun plaj te kykyajil plaj. Ktenb'el oxe' tjpel junjun plaju' nintapi, teyile junjun ati toklen tuk'i'l junjun tnej tyajajil Israel, ex a ttxolil ja'lu: Aye' tjpel toj tb'a'nq'ob'kya'j: kye Rub'en, Juda ex Leb'i; aye'tzu'n toj tjawetzq'ij: kye Jse, B'enjamin ex Dan; aye'tzu'n toj qnayaj kya'j: kye Simeon, Isakar ex Sab'ulon; aye'tzu'n toj tkub'exq'ij: kye Kad, Aser ex Neptali.

35Junmutx' kab'k'al lajnaq (9,000) metr tqanju' nintapi tu'n tkyaqil, ex a tb'i nintnamju' k'okyel yajxi'tl: Atite Qman Dyos tzalu.