Lv 17 - Mam Ostuncalco Bible

O'kxku' jun ja xjan

1Tzaj tma'n Qman Dyos te Moyses

2tu'n t-xitma'n kye Aaron kyuk'i'lju' tk'wal ex kye kykyaqil aj Israel qa matxitoq che tzaj tq'o'nju' chaq'b'il ikjalu:

3Alkyexku' jun aj Israel makub' tb'yo'n jun tman wakx, jun tman rit mujqa jun ttxu chib' toju' najb'il mujqa ti'jxi',

4exqa min saj tiq'i'n ttziju' Ja te Mujb'ab'ltib'il tu'n tkub' tq'o'n te jun oyaj weye' twitzju' njaye' xjan, atitzun tiltz tu'nju' matz'el chik' tu'n, qu'mtzun k'elex iq'et kyxolju' twnaqil.

5K'ajb'elju' lu kyu'ne' aj Israel tu'n kytzaj kyiq'i'ne' alu'mj inche kub' kyb'yo'ne' toj kojb'il nwitze', ex tu'n t-xi' kyiqi'ne' teju' pale ttziju' Ja te Mujb'ab'ltib'il, tu'ntzun tkub' tq'o'n pale te chojb'il kyu'nele' te b'inchjtib'il.

6Kxel twitxk'a'n paleju' chik' tib'aju' q'olb'eb'l weye' ttziju' Ja te Mujb'ab'ltib'il, ex kttz'e'ysa'ju' unt te k'ok'sb'il tb'anil nwitze'.

7Ex mixti'tl tu'n tkub' kyq'o'ne' chojb'il kyeju' tajaw il lu, ju' e k'ulune' kye ex e'txalpuje' kyu'n. Jun kawb'ilte' lu majx kjelten kyeye', k'ajb'el kyeye' ex kye kyk'wale' toj wiqi'n.

8Ex alkyexku' aj Israel mujqa najchaq xjal najli kyxole' qama kub' tq'o'n jun chojb'il k'ok'sb'il mujqa alkyexku' juntl chojb'il,

9exqa min xxi' tiq'i'n ttziju' Ja te Mujb'ab'ltib'il tu'n tkub' tq'o'n nwitze', ati tu'n tex iq'et kyxolju' ttanam.

Min q'o'n tu'n t-xi' ch'yetju' chik'

10Kchin q'ojile' kyi'j kykyaqil aj Israel mujqa najchaq xjal najli kyxole' qama ch'yon chik', alkyexku' tu'me'l matxa' tch'yo'n, k'elex wiq'i'ne' toj ttanam.

11Qu'n kykyaqilju' txkup' itz'qe' tu'nju' kychk'el ati, ex oje txi' nq'o'ne' kyeye' tu'n tpon kyiq'i'ne' tib'aj q'olb'eb'l te chojb'il tu'n tklet kychwinqlale', qu'n tu'nju' chik' in kolpeta' tchwinqlal xjal.

12Qu'mtzun inma'ne' kyeye' aj Israel, mix-a'lo' junkye' ex mix-a'lo' jun najchaq xjal najli kyxole' tu'n tch'yon chik'.

13Alkyexku' jun aj Israel mujqa najchaq xjal najli kyxole' matzyet jun txkup tu'n mujqa pich'ju' b'a'n tu'n kych'yet, ati tu'n tel tqo'n tchk'elju' xtzyet tu'n ex tu'n tmqunte toj tx'otx',

14qu'n tu'nju' chik' inche anq'ina' kykyaqilju' itz'qe'. Qu'mtzun in xa' nma'ne' kyeye' tu'n lalun txi' kych'yo'nju'ye' chik', qu'n a chwinqlalju' kye kykyaqilju' itz'qe', alkyexku' matxi ch'yonte k'elex xla'jet kyxolju' ttanam.

15Alkyexku' jun aj Israel mujqa najchaq xjal matxi ch'yonte tchib'jil jun txkup kyimnitl mujqa b'ajni tzaqu'n tu'n jun tojk'ul txkup, ati tu'n ttx'jonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj. Yajxi'tzuntel kjelten ẍtilun.

16Qatzun min xttx'aju' t-xb'alun ex min xb'aj ttxjo'ntib', kjelten toj il, chi Dyos.