Sal 37 - Mam Ostuncalco Bible

Qek tk'u'ja ti'j Qman Dyos

1Lalun tzaj ttx'u'jila tu'n kypaju' b'inchal myab'a'n,

ex lalun tzaj tx'a'lti'j tk'u'ja kyi'ju' b'inchal il,

2qu'n ikyqe'ju' kse'n k'ul lwiy nche kub' tzqij;

¡ex nche kub'ch'u'ẍix kse'n itzaj!

3Qek tk'u'ja ti'j Qman Dyos ex b'inchamju'ya b'a'n,

tz'anq'ina twitz tx'otx' ex we'ku'ya toj tokslab'la.

4K'u'jlama Dyos tu'n tkyaqil tanmiya,

ktzajel q'onte' tkyaqilju' tajb'ila.

5Q'onkja tchwinqlala toj tq'ob' Qman Dyos;

qek tk'u'ja ti'j, tzulte' onilteya.

6Tu'nte kqoptz'ajelju' ttxolilti'j ex tnik'alilti'j ntb'incha'na

kse'n nqoptz'aj q'ij te wanq'ij.

7Numeku'ya twitz Qman Dyos;

naq tz'ayona te ajtul onilteya.

Lalun tzaj ttx'u'jila ti'ju' xjal xi'tjaw b'ent,

ti'ju' nximan tu'n tb'inchante myab'a'n.

8Tzaqpinkju'ya q'oj, ex lalun tx'u'jintla;

qu'n tu'nju' q'oj nche kub'a' ichinxi'xju' ti'xti'.

9Kna' che elix xla'ja'nkye' b'inchal myab'a'n toju' tnam,

aye'tzu'n q'uqlok kyk'u'j ti'j Qman Dyos

kche etzal ti'ju' tx'otx'.

10Naqch'inxtl kyb'aju' b'inchal myab'a'n;

b'a'n qama jyona kyi'j, lay che okyaltl tu'na.

11Aye'tzu'n me'sqe' kkyetza'ju' tx'otx'

ex kche anq'il tojxi'x nak'b'il.

12Intjyo'n b'inchal myab'a'n tu'me'l tu'n tb'inchan taq'wixil ti'ju' xjal tnik'alti'j,

ex aj t-xika'yin te ntx'a'lti'j tk'u'j.

13Atzunte Qman Dyos naq ntze'n,

qu'n kanli twitz qa tzma nq'naxju' b'inchal myab'a'n.

14In jatz kyiq'i'n aj il kyk'uẍtx'e'nb'il toj tja ex inel kyqinu'n kysmaj

tu'n kykub'ju' prow exqe'ju' me's kyu'n,

¡tu'n kyb'yetju' b'a'n kychwinqlal!

15Axtzu'n kyk'uẍtx'e'nb'il k'okyix xuyli toj kyanmi,

exqe'tzu'n kysmaj che b'ajel toqj.

16Aju' ch'i'n ati teju' xjal b'a'n

tb'anilxi'x kyetwitz txqan kyq'inumalu' b'inchal myab'a'n.

17Qu'n che kb'el tnajsa'n Qman Dyosju' xjal aj il,

aye'tzu'n b'a'n xjal lalun che kub' tnajsa'n.

18Nxq'uqinte Qman Dyos kyi'ju' xjal mixti' kytz'ilil,

ex ktenb'elju' kyetzb'il tejumajx.

19Lay tz'el kych'ixaw toju' tq'ijlalil yajb'il,

ajttzaj we'yaj, qu'n ktenb'il kywa nim.

20Kche k'antelju' b'inchal myab'a'n, naku'j tzqij k'ul;

Exqe'ju' ajq'oj ti'j Qman Dyos che kb'el naj kse'n sib'.

21In qanin tch'exju' b'inchal myab'a'n ex min ntchjo'ntl,

atzu'n xjal tnik'alti'j nchjon tk'as ex inq'on chjonte.

22Aye' nche tky'iwla'n Qman Dyos, kkyetza'ju' tx'otx',

aye'tzu'n txko'n taq'wix kyb'aj, che b'elt-xitu'n.

23Ate Qman Dyos ẍaqlulkye xjal

ex nche kub' tq'o'n toju' b'e b'a'n toj twitz;

24exqa mache jaw tz'aq, lay che kyejten axtzu',

qu'n tzyu'nqe' tu'n Qman Dyos.

25Machin nokye' ku'xun, ja'lo matxi' chin tijine',

ex min ẍewil jumaju'ye' ichan tnik'alkyi'j, ma'wt che kyej ttzaqpi'n Dyos

ex mixjaloja ẍe oka' nka'yi'n jumajuye' kyk'wal inwt che mon.

26Tkyaqil maj nq'aq'an tk'u'j, ex inq'on ch'ex;

ky'i'wla'nqe'ju' tk'wal.

27Pa'mil tib'a ti'ju' taq'wix, ex b'inchamju'ya b'a'n,

ktenb'iltzun jun najb'iltzu' teya ja knajala'ya.

28Qu'n intk'u'jla'nte Qman Dyos tnik'alilti'j

ex min nche kyajttzaqpi'nju' wa'lqe' toj kyokslab'l;

aye'tzu'n b'inchal myab'a'n nche kub't-xitu'n

ex mixti' nkyajtq'o'n kyyajil.

29Kche etzalju' xjal tnik'alkyi'j ti'ju' tx'otx'

ex kche anq'il twitz tejumajx.

30Nyolinju' xjal tnik'alti'j tuk'i'l nab'l;

ex ax yolin.

31Atiju' t-xnaq'tzb'il Qman Dyos toj tanmi;

¡layx che jaw jiktz'aju' tqan!

32Inche ka'ylaju' b'inchal myab'a'n kyi'ju' xjal tnik'alti'j,

tu'n kykub' tb'yo'n;

33atzunte Dyos lay taj tu'n kykub'tz'aq toj kyq'ob',

expe' lay taj tu'n tjaw chan il kyi'j.

34Qek tk'u'ja ti'j Qman Dyos, ex okslanku'ya,

kjawil nima'nta tu'n, ex ktzajel tq'o'nju' tnam te tetzb'ila.

¡Ktka'yi'ya ajtkub' tz'e'ysa'n kywitzu' b'inchal myab'a'n!

35Matxi' wile' b'inchal myab'a'n, nojni tu'n nimjtib'il,

kse'n jun tze pujin toj t-xaq;

36makub'naj;

machin jyone' ti'j, ex mixti' sokyal.

37Ka'yinxpe'ju'ya xjal tnik'alti'j ex mixti' til:

ktenb'el nak'b'il te toju' tq'ijlalil tzul.

38Aye'tzu'n b'inchal myab'a'n che kb'el xitu'n;

lay che anq'intl toju' tq'ijlalil tzul.

39Atzu' ntzaja' o'nb'il kyeju' xjal tnik'alkyi'j tk'etz Dyos,

qu'n a kolb'ilju' kye kyoju' tq'ijlalil ch'uẍ.

40A Qman Dyos noninkye tu'n kytzaqpaj.

Inche ttzaqpi'n toj kyq'ob'ju' b'inchal myab'a'n, ex nche tklo'n,

qu'n ti'j te nkyjyo'na'ju' kolb'ilkye, chiju' b'itzal.