Jue 15 - Mam Ostuncalco Bible

1Tb'ajlenxi'tzun jte' q'ij, toj tq'ijlalil tu'n tjoyet triy, xi' Sanson ka'yilte t-xu'jil, xitiq'i'n jun qpoj tman chib' te. Tej tpon xitma'n ikjalu:

—Chin okxch'i'nwe' ka'yilte nxu'jile' tuja, chij.

Atzunju' tji min taj tu'n tokx tuja,

2ape' xitma'nju' te:

—Nchina'we' qa min tajb'iltla, qu'mtzun matxinq'o'nwe' te jun tamiwa. Atitzun juntl titz'in tb'anilxi'x ka'yin kyetwitz: q'inxa te t-xelju' ttzik, chij.

3Atzunte Sanson xittzaq'we'n te:

—¡Myatzun npaje' ja'lo qa ti' xnb'inchaye' kyi'j pilistey! chij.

4Xi'tzun Sanson tzyul o'lajnaq (300) saqb'in, b'jo'k tk'lo'n kyje kakab' kyten, ex oktk'lo'n tzaj ttxa'nile kyje junjun muj;

5b'jo'ktzun ttxqo'n kytxa'n tzajtz ex exi' ttzaqpi'nju' saqb'in kyoj kyawal pilistey. Iktzu'n kub'a' ttz'e'ysa'n kytriy matxitoq jaw b'u'yi'n, exju' atixtoq toj tqan, ex ikqe'xju' tqan ub'a ex tqan olib'o.

6Kyjoytzun pilistey tqanil alkye b'inchante ja'lu, kyb'i qa a Sanson tji jun ichan aj Timnat, qu'n elq'i'n t-xu'jil tu'n tji ex xiq'o'n te jun q'a ten tuk'i'l toju' tmjeb'le'n, exi'tzuntz tz'e'ysalte txin tuk'i'lxi' tman.

7Xi'tzun tma'n Sanson kye ikjalu:

—Tu'ntzunte' xkyb'inchaye' lu, ¡Lay chin ojlanwe' qa min soknq'o'n tu'me'l t-xele' kyeye'! chij.

8Oktzaqpajtzuntz kyi'j tuk'i'l ttx'u'jil ex nim xjal e'kub' tb'yo'n. Xi'tzuntz najal toju' jyom toju' pik te Etam.

Jun tb'incha Sanson tu'n tb'aqil txpetx b'ur

9E'tzaju' pilistey, e'kub'ten Juda ex e'ponx Leyi,

10xi'tzun kyqani'n aj Juda kye:

—¿Tiqu'n ẍe ula'ye' q'ojil qi'je'? chechij.

Aye'tzunkye xikytzaq'we'n:

—Maqo tzaje' tzyulte Sanson tu'n tchjonteju' matxi' b'aj tb'incha'n qeye', chechij.

11Tetzunj kyb'inte ja'lu, exi' wuqk'al lajnaq (3,000) ichan tyajajil Juda tk'etzju' jyom toj pik te Etam ex xikyma'n te Sanson ikjalu:

—¿Ma min b'i'n tu'na qa aye' pilistey nche kawin qib'aj? ¿Tiqu'ntzun saja' tiq'i'nju'ya lu qi'j? chechij te.

Xitzun ttzaq'we'n Sanson kye:

—O'kxnawe' xnb'incha tu'n toknq'o'n t-xelju'ye' taq'wix xkyb'incha weye', chij.

12Xi'tzun kyma'ntz te:

—Maqo tzaje' tzyulteya tu'n t-xi' qq'o'na toj kyq'ob' pilistey, chechij.

Xitzun ttzaq'we'n Sanson kye:

—Kymantzna'ye' axxi'x qa myaye'xe' kche b'el b'yonweye', chij.

13Aye'tzunkye xikyma'n te:

—Axxi'x, layna' kub' qb'yo'nta. Naq o'kx qajb'ile' tu'n ttzyeta qu'ne' ex tu'n t-xiqq'o'na toj kyq'ob' pilistey, chechij.

Kub' kyk'lo'ntzuntz tu'n kab'e' aqwil ak'a'j ex etzkyiq'i'n ja intoq ewana'.

14Tetzunj kypon toj Ley, e'etzju' pilistey k'lulte, inxi'xtoq che ẍch'in tu'n kytzalajb'il. Kb'u'ltzu'n t-xew Qman Dyos tib'aj Sanson, eb'je'l tlaqu'n aqwil k'alb'il kyeju' tq'ob', naku'j q'in tz'e'ynaqqe'tl ela' te;

15jawtzun tiq'i'n jun tb'aqil txpetx b'ur atitoq atzu', na'mxtoq ttzqijxi'x, ex e'kub' tb'yo'n kab'k'al lajnaq (1,000) pilistey tu'n.

16Tmatzuntz ikjalu:

Mab'aj jun mo kab'e' chquj xjal wu'ne'

tu'n jun tb'aqil t-xpetx b'ur;

mache kub' nb'yo'ne' kab'k'al lajnaq (1,000) ichan

tu'n jun tb'aqil t-xpetx b'ur chij.

17Xi' t-xontzun tb'aqil t-xpetx b'urtz, ex oktq'o'n tb'i najb'il lu, Twi' Tb'aqil Ttzi B'ur.

18Inxi'xtoqtzun k'wajti Sanson, kub'san twitz Qman Dyos ex xitma'n ikjalu: ¿Se'n taq'witzun tzaj tq'o'na wipumale' tu'n tkub'kyi'j txqan xjal wu'ne', atzu'n ja'lo nchin kyajtq'o'na' tu'n nkyime' tu'n k'waj ex toj kyq'ob' ma' xjal na'j min nche okslan teya? chij.

19Tjaqtzun Qman Dyos jun xoch ati Twi' Tb'aqil Ttzi B'ur, k'wantzun Sansontz ti'ju' a' in jatz toju' xoch, ex oktl tipumal. Qu'mtzun oktq'o'n tb'iju' t-xiklil a' Twi' Tb'aqil Ttzi B'ur te T-xiklil a' te Nkub'san. Ex majx kyej tenju' xoch lu.

20Winqi'n ab'q'i ten Sanson nejenel kye aj Israel, toju' tq'ijlalil intoq che kawin pilistey toju' tx'otx' lu.