1Tetzunj tb'inte nimaqkawil Esekyiy ja'lu, kub' tlaqu'n t-xb'alun ex oktq'o'n ti'j te b'is te techlal k'ixk'oj, ex xi' toju' tja Qman Dyos.
2Ex exi' tchq'o'n Elyakyim, ju' ka'yilte toj tja nimaqkawb'il; ex Seb'na tz'ib'al tqanil, exqe' pale tijwnaqqexi'x, tok kyi'j te techlal k'ixk'oj, tk'etz Isayiy tk'wal Amos,
3ex tu'n t-xikyma'n te toj tb'i nimaqkawil kjalu: Ato'qo'ye' toj jun tch'uẍal, tz'e'ysb'il witzb'aj ex ch'ixaw; kse'n jun qya ch'inxtl tb'anix, mixti'tl tipumal.
4Noqwit matxi' tb'i Dyos Manb'aj janajb'ena'ya tyolju' nejenel kye t-xjal nimaqkawil aj Asirya, te i'lb'ilte Qman Dyos itz', ex naqwitj kub' tz'e'ysa'n twitz tu'nju' tyol aku' Qman Dyos xb'inte. Qu'mtzun b'inchama xtalb'il, na'n Dyosa kyi'ju' ate'qe'x, chi nimaqkawil xitma'n tq'umli.
5Exi'tzunju' nche kawin tuk'i'l nimaqkawil Esekyiy q'malte te Isayiy,
6atzunte Isayiy xitab'tzi'n kye tu'n t-xikyma'n te Esekyiy kjalu: Chi Qman Dyos kjalu:
Lan xob'a te kyolju' tmajin nimaqkawil aj Asirya xkyma wi'je'.
7Knb'incha'ye' tu'n tul q'mab'aj jun tqanil te tu'ntzun tanjtlti'j toju' ttanam, atzuntzu' knb'incha'ye' tu'n tkub' b'yo'n, chi Qman Dyos chechiku'ye' te, chi Isayiy.
8Tb'itzu'n nejenel kye xjal te q'oj aj Asirya matxi'toq tzik'b'et nimaqkawil aj Asirya toju' nintnam Lakyis. Eiky'b'ettzuntz Jerusalen, ex knet nimaqkawil aj Asirya tu'n ntoq q'ojin ti'ju' tnam Lib'na.
9Tb'itzu'n nimaqkawil aj Asirya atzu' qa matxi'toq ljet jun q'oj ti'j tu'n nimaqkawil Tiraka aj Etyopya. E'tzaj tchq'o'n jumajtlju' nimaqkawil aj Asirya t-xel q'malte te nimaqkawil Esekyiy te Juda kjalu:
10Matxi' tzaj tma'n Tdyosa ja q'uqloka' tk'u'ja teya qa lay kub'tz'aqa toj nq'ob'e'; lantzun tq'a' sb'u'tib'a te.
11Matxi' tb'iteya nb'ajkye nimaqkawil aj Asirya kyi'j kykyaqilju' tnam kyajb'il tu'n kyxitun. ¿Ma oktzun kletelta?
12¿Ma eklettzu'n txqantl tnam kyu'n kydyos, ju' eb'ajkub' xitu'n kyu'n ojtxi' qchmane': aye' Kosan, Aran, Resep, exqe' xjal aj B'et-eden najlqe'toq Telasar?
13¿Jatzun ta'qe' nimaqkawil aj Amat, aj Arpad, aj Separb'aym, aj Ena ex aj Ib'a?, chij xitma'n tq'umli.
14Xittzyu'n Esekyiyju' u'j xiq'o'n te kyu'n sanjelal, ex jawt-ẍch'i'n. Xi'tzuntz toj tja Dyos, ex jawtjqo'n u'j twitz Qman Dyos,
15na'n Dyos ikjalu:
16Nman Dyos, nimtipumala, nche ajb'en aj Israel teya, tkub' tq'uqb'ila te kawb'il kyib'aj kyerb'in, o'kxta Dyos kye kykyaqilju' kawb'il twitz tx'otx', aya b'inchante kya'j ex tx'otx'.
17Taye, b'inchama xtalb'il, b'intzpe'ya. Nman Dyos, ka'yintzpe'ya, b'intzpe'ju'ya tyol Senakyerib' saj tma'n weye', taq'wix tyol ti'ja, aya Dyos itz'.
18Axte' Nman Dyos qa matxi' che kub' kyxitu'n nimaqkawil aj Asirya kykyaqil nimaqtnam ex kytx'otx',
19ex matxi' che b'jo'kx kyq'o'n kydyos toj q'aq', qu'n myana' dyosqe', naq tzeqe' ex ab'j b'incha'n tu'n xjal. Qu'mtzun ekub'a' kyxitu'n.
20Atzu'n ja'lo Nman Dyos, qo' tkloma toj tq'ob', tu'ntzun kyb'inte kykyaqil tnam twitz tx'otx' qa o'kxta Dyos, Taye, chij.
21Xi'tzun tma'n Isayiy tq'umli te Esekyiy kjalu: Lu xtma Qman Dyos janche ajb'ena' aj Israel: Matxi' nb'iju'ye' tna'j Dyosa saj tma'na ti'j Senakyerib', nimaqkawil aj Asirya, chij.
22A tma Qman Dyos ja'lu ti'ju' nimaqkawil aj Asirya:
Intze'n nintnam Syon ti'ja Senakyerib',
kse'n jun txin.
Inxi'x xmayin tnam Jerusalen ti'ja
ajtanj ti'ja.
23¿Alkyetzu'n soktik'le'na ex mayolina taq'wix ti'j?
¿Alqi'j xjawa' tzaqpaja'ya
ex majaw nima'ntib'a twitz?
¡Ti'jku' Dyos xjan te Israel!
24Majaw ilina te Qman Dyos kyu'nelju' nche kawin tuk'i'la.
Matmaya:
Machin jaxe' kywi' witz
kyuk'i'l txqan nkarwaje' te q'oj,
tojxi'xju' k'ul jupli kyu'n tze Lib'ano.
E'kub' wik'sa'ne' k'ute nimaqxi'x kywe',
exqe' tzaj tb'anilqexi'x.
Njapune' kywi' witz nimaqxi'x kywe',
ex kyoju' k'ul naku'j awal.
25Ku'x nlku'ne' xoch toj junxi'tl tx'otx'
ex nk'wane' ti'ju' a' lu,
ex e'kub' tzqiju' a' toj Ejipt wu'ne'
tu'n nqane', chija.
26¿Mixtzunti' b'i'n tu'na qa ayine' Dyos Manb'aj,
inkub' nk'unkyeju' ti'xti' lu?
Nk'u'niletl wu'ne' atxi'x ojtxi',
ex matxi' japun wu'ne' ja'lo;
qu'mtzun nche t-xitu'na nimaqtnam kuwsa'n
ex naq kyik'lenxtl nche kyej tu'na.
27Mixti' kyipumalju' xjal najlqe' toj,
inxi'x che xob' ex nche ch'ixwi,
ikyqe' kse'n cha'x k'ul toj kojb'il,
naku'j k'ul ntzaj ch'iy twi' ja
ex nb'ajtzqij tu'n kyq'iq' ntzaj tjawetzq'ij.
28Kanliwe' nwitz tkyaqilju' ntb'incha'na
ex tkyaqilju' taq'una;
b'i'n wu'ne' matxi' tzaj ttx'u'jila wi'je'.
29Wojtzqi'ne' ttx'u'jila ex ntnima'n tib'a,
k'okyex nq'o'ne' jun arwoy toj ttxa'na,
atzun jun k'uxb'il toj ttziya tu'n tjk'eta,
ex k'anjel jumajtlti'ja wu'ne'
toju' b'e jasaja'ya, chi Qman Dyos.
30Xi'tzun tma'n Isayiy te Esekyiy:
Lu jun techlal tiju' kb'ajel:
kche wale' ti'ju' triy ntzaj ch'iy tu'nxtib'
toju' ab'q'i ja'lo ex toju' juntl,
tojtzun toxi'n ab'q'i che awale' ex kajwil twitz kyawale',
tu'n tok kyawale' ub'a ex tu'n kywane' ti'ju' twitz.
31Che okyelju' che kjel anq'in toj Juda kse'n awal:
che lok'al ex che witzal,
32qu'n kjelten jni'toj Jerusalen;
ate'qe' xjal che kjel anq'in twi' witz Syon.
Kb'ajel ikju' tu'nju' nim tk'u'jlalil Qman Dyos nimtipumal.
33Intma'n Qman Dyos ti'ju' nimaqkawil aj Asirya:
Lay tz'okx toj Jerusalen,
laype' b'ent txi' t-xon jun talsmaj ti'j,
lay q'ojin ti'j tuk'i'l kolb'il
ex lay jawkych'uqi'n tx'otx' ti'jile.
34K'anjelti'j tojxju' b'e jasaja';
lay b'ent tokx toju' nintnam lu.
Ayinku'ye' Dyos Manb'aj nchin q'mante.
35Oknkla'we' nintnam lu,
naq tu'n nk'u'jlalile' ti'ju' nmajine' Dab'i
ex tu'nju' woklene', chi Qman Dyos, chi Isayiy.
36Xi'tzu'n tanjl Qman Dyostz ex e'kub'tb'yo'n junaq oxmutx' kab'k'al lajnaq (185,000) xjal te q'oj aj Asirya; tojtzun jun q'ijtl kykyaqil matxi'toq che kyim.
37Eb'jawtzun tiq'i'n Senakyerib', nimaqkawil aj Asirya, t-xjal te q'oj ex anjtlti'j Ninib'e.
38Tetzun jun q'ij intoq k'ulun toju' ja te k'u'lb'il te Nisrok, ju' tdyos, kub' b'yo'n kyu'n tk'wal, aye' Adramelek ex Sareser, exi' oqtzuntz toju' tx'otx' Ararat. Atl Esaradon ju' tk'wal kawin te t-xel.
Who We AreWhat We EelieveWhat We Do
2025 by iamachristian.org,Inc All rights reserved.
