Pr 14 - Mam Ostuncalco Bible

1Aju' qya ati tnab'l nonin tuja;

atzunju' qya mixti' tnab'l noq nxitun.

2Alkyete' nb'et toj tnik'alti'j nniman Dyos;

atzunju' myab'a'n nb'eta' nel tik'u'n Dyos.

3Xnakte' xjal nyolin tuk'i'l nimjtib'il;

atzunju' xjal ati tnab'l nyolin yol te kolb'il.

4Qa mixti'qe' alu'mj onilte xjal, mixti'xte' wab'j nb'uyit;

kyu'nju' kyonb'il alu'mj nchmet awal.

5Aju' b'a'n tziyal minti' nchan yol;

atzunju' jk'ulyol noqx chajyolil ntma'n.

6Njyon pi's ti'ju' nab'l ex min nkanb'et tu'n;

Atzu'n xjal k'atz lwiy nkanb'et tu'n.

7Pa'mil tib'a ti'ju' xtrak,

qu'n mixti'te' ojtzqib'l tuk'i'l.

8Tu'n nab'l nkaneya' toj twitzju' ati tnab'l se'n tz'anq'in,

atzu'n xtrak nkub' sb'u'n tu'nxju' t-xnakyil.

9Naq nche tze'n xnak ti'ju' kyil,

aye'tzu'n xjal tnik'alkyi'j b'a'n che b'in.

10teyele junjun k'u'nju' tb'is exju' ttzalajb'il, ex tkyaqilxju' nik'a'.

11Kb'el xitu'n kyja b'inchal myab'a'n;

atzu'n kyja tnik'alkyi'j kchmetel.

12Ate' b'e nakuj tzinun kyi'j,

atzun b'ajsb'il, tb'eyil kamik.

13Noqpena' qa nqotze'n nch'yon qanmi,

tb'ajlenxitzun tzalajb'il oq'e'ntlte' nb'aj.

14Taq'wixju' ktkotzi' b'inchal myab'a'n;

atzu'n b'a'nxjal ktk'ma' jun tu'me'l t-xel b'a'n.

15Nxitoksla'n xjal mixti' tnab'l tkyaqilju' nxiq'ma'n te;

atzu'n xjal ati tnab'l ntka'yi'n b'a'nxi'x ja tu'me'l nb'eta'.

16Aju' ati tnab'l nxob' teju' myab'a'n ex nel tpa'ntib' ti'j,

atzunju' mixti' tnab'l mixti'x toklen teju' ati twitz.

17aju' xjal mixti' tnab'l minti' inximan ajt-xi' b'inchal jun ti'xti';

atzunju' ati tnab'l nb'aj t-xima'n tnejelxi'x.

18A kyetzb'il mixti' kynab'lju' kyxnakyil;

aye'tzu'n k'atzkywi' nten kyojtzqib'l.

19Che kb'el tzipeju' b'inchal myab'a'n kytwitzju' b'a'n xjal;

aye'tzu'n txkupqe' kche kub'sal ttzi kyja tnik'alkyi'j.

20Jun prow, aye'ku' amiw nche el ik'unte;

atzunte q'inun nimte' tuk'i'l.

21Alkyete' nel ik'unte tuk'i'l nb'inchan il,

tzalajb'il teju' xjal ntzaj q'aq'an tk'u'j ti'j prow.

22Aye'ju' jyol il nche' tzpet ti'ju' kb'e;

aye'tzun b'inchal b'a'n kyk'ma' tk'u'jlalil ex nak'b'il.

23Tkyaqilju' noktilil tu'n ati tkanb'ab'l;

atzunju' la'j noqx nkub' prowix.

24Kq'inumaxela tu'n nab'l;

atzu'n xnakyil nqo'x tiq'i'n toj xnakyil.

25Aju' b'a'n tziyal che kletil kychwinqlal xjal tu'n;

atzun chalyol tziyal in tjyo'n kamik.

26Aye' nche niman te Qman Dyos nqexi'x kyk'u'j ti'j

ex a Qman Dyos klol kye ex q'olte kyipumalju' kyk'wal.

27Chwinqlalte' ninb'ilte Qman Dyos a'

in qo tzoqpaj tu'n kyoj t-sb'ub'l kamik.

28Aju' kawb'il kyib'aj txqan xjal ninb'ilte' te nimaqkawil;

atzunju' kawb'il kyib'aj jte' xjal xitb'il te' te.

29Aju' ati tnab'l ati tpasens;

atzunju' mixti' tnab'l lwiyxi'x injaw tx'u'jin.

30Qa che'w qwi' jun chwinqlal te qxmilal,

atzunju' tx'a'lti'j k'ub'aj majx nb'ajtwan qb'aqil.

31Alkyete' inkub' tyaju'n prow in nok tq'o'n t-tx'u'jil Dyos,

alkyetzunte' ink'u'jlante, in niman te Dyos.

32Axju' tb'inchb'enju' b'inchan myab'a'n nkub' xitunte;

atzunju' tnik'alti'j inklet tu'nxju' tnik'alilti'j.

33Atzu' ta' nab'l toj kynab'lju' nche ximan,

atzu'n kyxolju' mixti' kynab'l, mixti'x ojtzqi'n.

34Aju' tnik'alilti'j a ninb'ilju' te nintnam;

atzunju' il a tch'ixawju'.

35Aju' majen ati tnab'l in tkanb'a'n t-xtalb'il nimaqkawil,

atzunju' mixti' tnab'l intzaj ttx'u'jil nimaqkawil tu'n.